2 Korinthiko 7 - সান্তালী বাইবেল

¹ E dulạṛiạ gateko, abon lạgitʼ noako gokʼakʼ menakʼte delabon, jel ar jiu reakʼ joto chut khon apnar bon saphakʼma, ar Isor botorae tulucʼ sonot reakʼ hortebon laha idikʼma.

Pạulakʼ rạskạ

² Apeakʼ monre jaega aṛakʼ alepe. Ale do okoe hõ bale behok akatʼkoa, okoeyakʼ hõ bale loksan akatʼtakoa, ar okoe hõ bale eṛe lipukʼ akatʼkoa.

³ Bicạr dusipe lạgitʼ noa katha do bạń roṛeda. Pạhilregeń menakatʼpea, ape do aleren nunạkʼ dulạṛiạko kanape je, ape tulucʼ gujukʼ hõle rạjigea ar jiwetʼ tahen hõle rạjigea.

⁴ Apere ạḍi pạtiạu menakʼtińạ ar ape iạte ạḍitetʼ iń sarhaokʼ kana. Aleakʼ joto duk sasetre ińakʼ rạskạ do sareṛokʼ kana ar ạḍi jiwi raṛecʼ iń ńameda.

⁵ Makedoniạte seṭerkatere hõ hoṛmore jãhãn aosan bale ńamlakʼa; ale do joto secʼ khonge dukle ńametʼ tahẽkana; ar sanam secʼge gulmal ar ontorre botor tahẽkana.

⁶ Menkhan Isor, one okoe do dukokʼkanko jiwi raṛecʼe emakokan, uni do Titusakʼ hijukʼ hotete jiwi raṛecʼe ematʼlea.

⁷ Eken ona do baṅ, Titus acʼge ape hotete jiwi raṛecʼe ńamakatʼte ale hõ jiwi raṛecʼle ńamakada. Apeakʼ gagoj ar duk reakʼ katha uni doe lại akatʼlea are baḍae ocoakatʼlea, ape do ạḍipe uihạrediń kana, onate iń do artetʼ rạskạń ạikạukeda.

⁸ Ińakʼ laha reakʼ ciṭhiteń mon duk ocoakatʼpere hõ iń do bạń kastaokʼkana. Enteń ńelkeda ona ciṭhite thoṛa ghạṛi lạgitʼpe mon duklena ar iń hõ thoṛa doń duklengea, menkhan ńitokʼ doń rạskạkʼ kana.

⁹ Dukpe ńamletʼte do bạń rạskạkʼ kana, bickom duk iạte kại khon monpe ạcurakatʼteń rạskạkʼ kana. Isorakʼ mone lekatege noa duk dope ńamleda, onate ale hotete apeakʼ jãhãn loksan do baṅ hoyakana.

¹⁰ Isor okaṭakʼ duke emokʼ onate do kại khon mon ạcur ruạṛokʼa ar bańcao ńamokʼa, ar dukokʼ reakʼ cetʼge baṅ tahena. Menkhan dhạrti reakʼ duk do manwakoakʼ morone ạguiyeda.

¹¹ Hudiskate ńelpe, Isor duke ematʼpe tahẽkanre ape do bape pạclena, ar bin dusạnko mente sạbudokʼ lạgitʼ tinạkʼ jid tahẽkantapea, kạipe hirkhạwatʼ tahẽkana, monre botor tahẽkantapea, tinạkʼpe gagojlena, tinạkʼpe hudisokʼkan tahekana ar kại reakʼ sạjại lạgitʼ tinạkʼpe jidlena. Nonkate joto secʼtegepe sạbudleda je, ape dope bin dusạnko kana.

¹² Iń do ona ciṭhiń olletʼgea, menkhan okoeye behok ocoakan uni lạgitʼ do bạń olakada, bickom Isor samaṅre ape ṭhen sodorokʼma, ape do sạrigepe dulạṛetʼlea.

¹³ Ar noa hotete ale do jiwi raṛecʼle ńam akada. Ona jiwi raṛecʼ sãote Titusakʼ rạskạ ńelte ale hõle rạskạkʼkana, ente ape sanamko ṭhen khon uni do monre ạḍi suluke ńam akada.

¹⁴ Iń doń kusiakana, ente ape iạte uni ṭheniń sarhaolena, ar onate iń do bạń lajao ocolena. Ona bodolte ape ṭheniń lạiletʼ aleakʼ sanamakʼ katha cetʼleka sạri tahẽkan, onkage Titus ṭhen ape iạte aleakʼ sarhaokʼ hõ sạriyakʼ mente sạbud akana.

¹⁵ Ape sanamko cetʼleka botor ar manot salakʼ unipe ataṅkedete gobolre menakʼpea mentepe udukʼletʼ, ona disạte ape lạgitʼ uniyakʼ dulạṛ do arhõ bạ̃ṛtiyentaea.

¹⁶ Iń doń kusiakana, ente jotowakʼre ape cetanreń bhorsa daṛeakʼa.