2 Korinthiko 5 - সান্তালী বাইবেল

¹ Baḍaegea bon, noa dhạrtire oka kumbạ oṛakʼre bon tahenkan metakʼme, oka nijor hoṛmowante menakʼ bon ona rạputʼlenre hõ aboakʼ do Isor emakʼ mitʼṭecʼ oṛakʼ menakʼ tabona. Ona oṛakʼ do manwa tite benaoakʼ do baṅkana, ona do jaejug khonge sermare menakʼa.

² Niạ hoṛmore tahen jokhecʼ abo dobon sãhetʼeda ar goṭa monte bon khojkana jemon serma reakʼ ona nãwã hoṛmote bon abhran ocokʼ;

³ ente noa katha do sạrikana je, ona hoṛmo bon ńamle khan laṅgaṭ do ar babon tahena.

⁴ Sạrige noa laṅga hoṛmore tahen jokhecʼ hamal bojha iạte lologe bon sahẽtʼeda; ar koṭokʼ do baṅ sanayetʼ bona bickom oyo ocokʼgebon khojkana jemon abonakʼ gujukʼakʼ hoṛmo do jaejug jiwetʼ hoṛmote pheraokʼ.

⁵ Ar noa lạgitʼge Isor doe sirjạu akatʼbona ar acʼakʼ pạhil hĩs lekate uni do acʼren sonot Jiu baena lekateye em akawatʼbona.

⁶ Onate aboakʼ dil do tishõ baṅ ṭonṭakʼkan tabona, arbon bujhạu daṛeakʼ kana, niạ hoṛmo kumbạ oṛakʼre tinạkʼ din bon tahen unạkʼ din Probhu Isor khon sạṅgińre bon tahenkana.

⁷ Oka ńelokʼkan ona hotete do babon calakʼkana, bickom biswạs hotete bon dãṛãnkana.

⁸ Aboakʼ dil do menakʼgea ar hoṛmo oṛakʼ khon pharakokʼte Probhu Isor ṭhen thamgạḍi akanbon kusiyakʼ kana.

⁹ Onate hoṛmo oṛakʼre bon tahen ar babon tahen, aboakʼ kurumuṭu do hoyokʼ kana Probhu Isore kusi ocoyege.

¹⁰ Ente Mạsiyakʼ bicạr duṛupʼakʼ samaṅre abo sanamkoakʼ jotowakʼ do sodorokʼa, jemon abo mimitʼko noa hoṛmore tahẽkate oka bon kạmiakatʼ, baṅ do boge ar baṅ do bạṛicʼ ona lekage kuṛại bon ńama.

Isor tulucʼ midokʼ reaṅ

¹¹ Probhu Isor bon botoraekante abo do apnar reaṅ manwakoakʼ monre biswạs janam ocoy lạgitʼ bon kurumuṭuyeda. Ar abo bon oka lekanko kan, ona do Probhu Isor ṭhen sodorgea ar asiń dohoya apeakʼ bibek ṭhen hõ ona do pusṭạugea.

¹² Niạte ape ṭhen arhõ lek mente apnar do bale sarhaokʼkana bickom ale ńutumte sarhaokʼ reakʼ dãole emapekana, okoe ontor baṅ ńelkate bahre reakʼ rup ńelteko sarhaokʼkan onko jemonpe roṛ ruạṛ daṛeako.

¹³ Alele pagla akan khan enḍekhan do Isor lạgitʼgele hoyakana, ar napae monankole hoyakan khan enḍekhan ape lạgitʼgele hoyakana.

¹⁴ Mạsiyakʼ dulạṛge ale doe gobol akatʼlea, ente khạṭigele bujhạuakada je, sanamko lạgitʼ mitʼ hoṛe gocʼena, ar ona iạte sanamgeko gocʼena.

¹⁵ Uni do sanamko ńutumteye gocʼlena jemon okoe jiwetʼ menakʼko onko do apnar lạgitʼ jiwetʼ aloko tahen, bickom okoe onko lạgitʼe gocʼlen are jiwetʼ beretʼen uni lạgitʼ jiwetʼko tahen.

¹⁶ Onate ńit khon manwawakʼ bahre secʼ ńelte do bale bicạra. Ale hõ Mạsi do pạhilte onkagele baḍaeledea, menkhan ńitokʼ onka do ar bale baḍaeyede kana.

¹⁷ Jãhãege Mạsi tulucʼ mitʼakae menae khan enḍekhan uni do nãwãteye sirjạu akana. Ar mareakʼ sanamakʼ do parom calaoena ar jotowakʼ do nãwã akana.

¹⁸ Noako do Isor secʼ khonge hoyakana. Uni do Mạsi hotete apnar tulucʼe samgeketʼ bona, ar acʼ tulucʼ eṭakʼ sanamko lạgitʼ dạyike emakatʼbona.

¹⁹ Metakʼme, Isor do manwawakʼ ghạṭko bae lekhayetʼtakote Mạsi hotete acʼ tulucʼe samgeyetʼkoa, ar ona samge reakʼ kathako baḍae ocoko reakʼ dạyik do aleye emakatʼlea.

²⁰ Onate Mạsi ńutumte paṭhaonako lekate ale do kathale roṛeda. Isor hõ acʼge ale hotete hoṛko ṭhene nehõrokʼ kana. Onate Mạsi ńutumte noale ajijokʼ kana, “Jemon Isor tulucʼpe mitʼ ruạṛokʼ.”

²¹ Jisu Mạsire jãhãn kại do baṅ tahẽkana; menkhan Isor do aboakʼ kạiko unireye ladekeda ar unige kạiyicʼe hoyocokedea, jemon Mạsi tulucʼ jopoṛao akan bon tahente Isorakʼ dhoromte dhorom bon hoyokʼ.