2 Korinthiko 3 - সান্তালী বাইবেল

Nãwã bondobos

¹ Ale do noako kathate cetʼ arhõ apnarte sarhaokʼle ńamjoṅ kana? Adom adom hoṛko cetʼleka jạruṛakokan, onkage ale hõ cetʼ ape ṭhen khon sarhaokʼ reakʼ ciṭhi jạruṛale kana? Tis hõ baṅ.

² Aleakʼ ontorre olakan ciṭhi ma apege coṅ. Ona ciṭhi reakʼ katha do sanam hoṛgeko baḍaea ar sanam hoṛge onako paṛhao akada.

³ Apege Mạsiyakʼ ciṭhi ar aleakʼ kạmiko reakʼ jo kanpe ona do pusṭạutege ńelogokʼ kana. Noa ciṭhi kạlite olakʼ do baṅkana menkhan jiwetʼ Isorren Jiu hotetege olakana. Noa do jãhãn dhiri paṭare baṅ olakana, menkhan manwakoakʼ ontorrege olakana.

⁴ Mạsi hotete Isorre ale do nonkan khạṭi biswạsge menakʼtalea.

⁵ Menkhan apnarte jãhãnakʼ cekae reakʼ daṛe menakʼtalea mentele dạbi daṛeakʼa ona do baṅ, bickom ona lektetʼ do Isor ṭhen khonge hijukʼ kana.

⁶ Mitʼṭecʼ nãwã bondobos reakʼ katha baḍae ocole lạgitʼ uni doe lek ocoketʼlea. Noa bondobos do eken ạn-ạriko manao reaṅ do baṅ, menkhan sonot Jiuakʼ ạyurte ontorre gobolokʼ reaṅ kana; ente ạn-ạrikote do gogocʼgea menkhan sonot Jiu do jione emokʼa.

⁷ Dhirire olakʼ oka bondobos hotete moron hijukʼkan ona bondobos emokʼ jokhecʼ Isorakʼ do ṭhonok sodorlena. Onate Moseyakʼ mẽtãhã hõ Isorakʼ ṭhonokte perecʼlena. Ar ona ṭhonok do bại bạite komao idiyenre hõ Israelko do Moseyakʼ mẽtʼãhã secʼ bako beṅgetʼ daṛeada.

⁸ Ona bondobos reakʼ jo do nunạkʼ ṭhonokanakʼ hoydaṛeakʼ khan, enḍekhan sonot Jiuakʼ kạmi reakʼ jo do tinạkʼ artetʼ ṭhonokakʼge hoyokʼa!

⁹ Oka bondobos hotete manwa do dusi menteye ṭarhaokʼkan ar uniyakʼ kạmiko ṭhonokte perecʼge khan, enḍekhan manwa dhorom menteye ataṅokʼre uniyakʼ kạmiko do artetʼ ṭhonokte perejokʼtaea.

¹⁰ Sạrige, okaṭakʼ do lahare ṭhonokte perecʼ tahẽkan, ńitokʼ ona reakʼ jãhãn ṭhonok do bạnukʼa, ente ona khon ńitokʼakʼ bondobos reaṅ ṭhonok do artetʼ ḍhergea.

¹¹ Ar caba hijukʼakʼ nunạkʼge ṭhonokte perecʼ tahẽkan khan enḍekhan okaṭakʼ jaejug hạbicʼ tahenkan ona do artetʼ ṭhonokte perecʼgea!

¹² Ale do nonkanakʼ as menakʼtalete sodortele roṛetʼkana.

¹³ Ar Mose lekanko dole baṅkana, ente Mose do acʼakʼ mẽtʼãhãe betʼ esetʼetʼ tahẽkana, jemon acʼakʼ caba idikʼkan mẽtʼãhã reakʼ marsal Israelko aloko ńelńam.

¹⁴ Menkhan onko hoṛkoakʼ mon do keṭecʼlen takoa. Onate teheń hạbicʼ hõ ona mare bondobos reakʼ katha paṛhao jokhecʼ onkoakʼ ontorre inạ mitʼ lekanakʼ bedokʼakʼ orwal do tahenkan getakoa, ente eken Mạsi tulucʼ mitʼlen khange ona orwal do ocogokʼa.

¹⁵ Menkhan teheń hạbicʼ hõ Moseyakʼ ạn-ạri puthiko paṛhao jokhecʼ Israelkoakʼ ontor do ona orwalte esetʼge tahenkana.

¹⁶ Menkhan onko modre jãhãege Probhu Isor secʼ mon ạcurlentako khan ona orwal do ocogokʼa.

¹⁷ Probhu Isor kangeae sonot Jiu do; ar okare Probhu Isorren Jiue tahenkan onḍege sạdhintetʼ do menakʼa.

¹⁸ Onate okoe Mạsi tulucʼ bon mitʼ akan, abo sanamko do baṅ betʼ akan mẽtʼãhã ạrsire ńelokʼkan muṭhạn leka Probhu Isorakʼ ṭhonok ńel ńelte apnar hõ ṭhonokte hara rakabokʼte uni leka bon hoyokʼ kana. Probhu Isor, metakʼme sonot Jiu reaṅ daṛetege noa do hoyokʼ kana.