2 Korinthiko 13 - সান্তালী বাইবেল

Ses cehaona

¹ Iń do nõkʼõe tesar dhao ape ṭheniń hijukʼkana. Sostorre ol menakʼa “Bar se pe goha reakʼ mocate mimitʼ katha reakʼ sạṛiyakʼtetʼ do ṭarhaokʼa.”

² Dosar dhao ape ṭheniń tahẽkanre okoe lahateko kại akatʼ onko ar eṭakʼko joto doń sontor akatʼko tahẽkana. Ar ńitokʼ hạjir bạnuńre hõ arhõń sontoretʼpe kana, iń do arhoń hijukʼre okoe hõ bạń mãyãwakoa,

³ ente Mạsi iń hotete kathae roṛetʼkan ona reakʼ sạbudpe khojkana. Uni do apeakʼ babotre bae nijora, bickom uniyakʼ daṛe do apereye udukʼeda.

⁴ Uni do nijorreye kurus ocolena, menkhan Isorakʼ daṛete jiwetʼ menaea. Ale do uni sãote mitʼakantele nijorakana, menkhan ape lạgitʼ Isorakʼ daṛete uni tulucʼ jiwetʼle tahena.

⁵ Apnarge biḍạu aṭkarokʼpe, Mạsire sạri biswạs menakʼtapea se baṅ. Apnarge biḍạu sạbudokʼpe. Ape do cetʼ bape bujhạueda, Jisu Mạsi do apeakʼ ontorre menaea mente? Ar sạbudokʼre belek mente alope ṭarhaokʼa.

⁶ Menkhan ińiń asokʼkana apepe baḍae daṛeakʼa je, belek mente ale do bale biḍạu ṭarhao akana.

⁷ Ale do Isor ṭhenle koejoṅkana jemon bạṛicʼakʼ jãhãnakʼ alope kạmi. Eṭakʼko jemon khạṭi menteko bujhạule onate noale khojkana ona do baṅa. Aleakʼ monejoṅakʼ do noage, khạṭi mente bako bujhạulere hõ ape do jemon okaṭakʼ bhageakʼkan onape kạmi.

⁸ Sạriyakʼtetʼ upạrte jãhãn ektiạri do bạnukʼtalea menkhan sạriyakʼtetʼ lạgitʼ do menakʼtalegea.

⁹ Ente alele nijorlenre ar ape do jorankope hoylenre unre ale dole rạskạkʼ kana. Arle koejoṅkana jemon jotowakʼpe sudhrạute sạbit utạrokʼ secʼpe laha idikʼ.

¹⁰ Onate ape ṭhen bạnuńre hõ noakoń olape kana, jemon ape ṭheniń senlenre Probhu Isor okaṭakʼ ektiạriye emakawạdiń ona ajhaṭte aloń beohar. Ona ektiạri reakʼ monsubạ do apeko benao rakapʼpe lạgitʼge, dhaṅ-dhaserpe lạgitʼ do baṅa.

Mucạtʼ johar

¹¹ E boehako, jotowakʼko sudhrạupe ar sạbitokʼpe. Ińakʼ katha luturakʼpe, ar mitʼ monokʼpe, ar sulukte tahenpe. Enḍekhan dulạṛren ar sulukren Isor do ape tulucʼe tahena.

¹² Sonot cokʼte cokʼjoṅpe ar ape apere jopoharpe.

¹³ Isorren sanam hoṛ do apeko joharape kana.

¹⁴ Aboren Probhu Jisu Mạsiyakʼ daya ar Isorakʼ dulạṛ ar sonot Jiu reakʼ helmel ape jotoko tulucʼ baṛe tahenma.