2 Korinthiko 12 - সান্তালী বাইবেল

Pạulakʼ dorson

¹ Iń do arhõ thoṛań sarhaokʼ kana. Ente jãhãn lab bạnukʼtińre hõ okako dorson Probhu Isore ńel ocoakadiń ar okako iń ṭhene sodorakatʼ ona reaṅ iń do ńitokʼiń lạiya.

² Mạsire pạtiạuicʼ mitʼ hoṛiń baḍae akadea; uni do gelpon bochor lahare serma hạbicʼe rakapʼ ocolena. Unre uni do acʼakʼ hoṛmoreye tahẽkana se baṅ ona do bạń baḍaea, Isorgeye baḍaea.

³ Ińiń baḍaea, uni hoṛ do Paradesteye rakapʼ ocolena. Uni do nonkanakʼ kathae ańjomleda one oka do lạite baṅ sodorokʼ, ar manwawakʼ hõ lạlại do baṅ ganokʼa.

⁴ Unre uni do acʼakʼ hoṛmoreye tahẽkana se baṅ, ona do bạń baḍaea; Isorgeye baḍaea.

⁵ Nonkan hoṛ lạgitʼ doń sarhaokʼgea, menkhan iń apnar lạgitʼ do baṅ, eken ińakʼ nijortetʼ reaṅ iń sarhaokʼa.

⁶ Menkhan ińiń sarhaokʼre bebuj do ohoń hoylena, ente iń do sạriyakʼgeń roṛa. Enrehõ bạń sarhaokʼa, ente ińakʼ kạmi ńelte se ińakʼ katha ańjomte hoṛko okalekako bujhạuediń ona khon bạ̃ṛti jemon okoe hõ aloko bujhạuiń.

⁷ Iń ṭhen ạḍi lekanakʼko sodorakante alo jemoniń usulokʼ, onate kosṭo emạń lạgitʼ ińakʼ hoṛmore mitʼṭecʼ jạnum, metakʼme Soetanren goḍete emadiń tahẽkana.

⁸ Probhu Isor do pe dhaoiń nehõrade tahẽkana jemon iń ṭhen khon onae sahaṛkakʼ.

⁹ Menkhan uni doe metadińa, “Ińakʼ dayage am lạgitʼ ḍhera, ente nijorrege ińakʼ daṛe do sodorokʼa.” Onate ińakʼ nijorakʼko reaṅakʼre ạḍi kusikateń sarhaokʼa, jemon Mạsiyakʼ daṛe ińre tahen.

¹⁰ Onate Mạsi iạte nijorakʼkore, bemanot ocokʼre, kucit ocokʼre, santao ar khed ocokʼre ar joṅjalkore iń doń rạskạkʼ kana, ente tinreń nijorokʼa, unrege daṛeanakʼiń hoyokʼa.

Korinthiko lạgitʼ Pạulakʼ bhabna

¹¹ Iń do bebujgeń hoyakana, menkhan apegepe jormoṭkedińa; ente apege sarhaoiń reakʼ lek tahẽkantapea. Ar cele hõń baṅkanre hõ enhõ aperen onko “Soros utạr” apostolko khon cetʼte hõ bạń komaoa.

¹² Ạḍi sombhuri salakʼ ape talare cinhạko ar hahaṛawakʼko ar daṛe kạmikote apostol kạnạń menteń sạbud akada.

¹³ Eṭakʼ eṭakʼ manḍerko khon ape do oka secʼte hõ bape huḍińa; eken mitʼṭecʼtepe huḍińgea, ona do noage, aperen bojha bạń hoyakana. Ar noa behokakʼ do ikạ kạtińpe baṛe.

¹⁴ Iń do ńitokʼ tesar dhao ape ṭhen calakʼ lạgitʼiń sapṛaogea. Ińakʼ bojha do apere bạń ladeapea, ente apeakʼ dhon do bạń khojkana, bickom apegeń khojetʼpea. Gidrạko do go-baba lạgitʼ ṭaka-poesa jarwae reakʼ dạyik kanako ona do baṅ, bickom gidrạko lạgitʼ jarwae do go-baba koakʼge lek kana.

¹⁵ Iń do ạḍi kusikatege oka menakʼtiń ona jotowakʼ ape lạgitʼiń khoroca ar apnartetʼ hõń emokʼa. Asambheṛeń dulạṛetʼpe khan cetʼ ape do komgepe dulạṛińạ?

¹⁶ Bogegea, aperen bojha do bạń hoyakana, menkhan jãhãeko men botecʼkea, iń do bondhekteń bulạu akatʼpea.

¹⁷ Okoe ape ṭheniń kolletʼko onko modren jãhãe hotete cetʼ iń ṭhoka tanakʼ akatʼpea?

¹⁸ Iń do Titus calakʼ lạgitʼ iń nehõrade tahẽkana, ar uni sãote uni boeha hõń kolledea. Titus do cetʼ apeye eṛe lipukʼ akatʼpea? Tishõ baṅ. Titus ar iń do mitʼ mon ar mitʼlekage cetʼ bạliń kạmi akada?

¹⁹ Cetʼpe hudiseda, noa ciṭhite ale do apnarakʼ kathale roṛeda? Ale do Mạsirele mitʼ akante Isor samaṅrele roṛeda. E dulạṛiạ gateko, ape benao rakapʼpe lạgitʼge noakole roṛeda.

²⁰ Botorokʼ kạnạń, ape ṭheniń hijukʼre ińiń monejoṅ leka hoedaṛeakʼa bạń ńampea ar ape hõ cetʼleka ńeleńpe menjoṅkan onka do bape ńameńa. Ente botorokʼ kạnạń, reṭha reṭhi, hiskạ, raṅgao, torpha-turphi, okta, cugli, phulạukʼ gulmalge pasecʼ apere ńamokʼ.

²¹ Iń doń botorokʼ kana, pase ape ṭhen arhõń senlenre ińren Isor do ape samaṅreye lajao ocoyiń, ar okoeko lahateko kạiletʼ tahẽkan onko do pase loṭghuṭi, lucạ lamoṭ bin napaeakʼ khon mon bako ạcurakatʼtako, ar onko ḍherko iạte iń do dukiń ńama.