2 Korinthiko 11 - সান্তালী বাইবেল

Pạul ar eṛe apostolko

¹ Ińakʼ kạticʼ talaṅ bebuj baṛe sahaokạtińpe. Hẽ sahao hõpe sahaoetʼkangea.

² Iń do ape lạgitʼ ińakʼ ontorre Isor reakʼ khạndri ãṭteń ãṭokʼkana, ente iń do eken mitʼṭen jãwãe tulucʼ, metakʼme Mạsi tulucʼge apeakʼ bapla reaṅ iń ṭhik dohoakada, jemon niphuṭ kũạ̃ri kuṛi leka uni tireń jimạ daṛeape.

³ Menkhaniń botorokʼ kana, uni biń do acʼakʼ bạṛicʼ phorphundite cetʼleka Hawae bulạulede onkage Mạsire menakʼtape soṛatetʼ ar napaetetʼ khon apehõkoe bulạu botecʼpea.

⁴ Ente okoe Jisu reakʼ kathale porcarakatʼ, uni chaḍa jãhãe eṭakʼ Jisu reakʼ kathae porcarape se okoe sonot Jiupe ńamakade uni chaḍa eṭakʼ lekan Jiupe ńame, se oka bhage sombatpe ataṅakatʼ ona khon eṭakʼ lekan bhage sombatpe ńametʼre ape do rạskạ salakʼ ạḍi usạra onape ataṅetʼkana.

⁵ Menkhan ińakʼ bujre onko “Soros utạr” apostolko khon do oka secʼte hõ bạń komaoa.

⁶ Iń do ạḍi bes okocʼte katha roṛ bạń daṛeakʼre hõ akel do menakʼgetińa ar ona do joto secʼte ar joto lekate ape ṭheniń sodorakada.

⁷ Isor emakʼ bhage sombat apeko ṭhen begor damteń porcar akatʼte apnariń copotʼ akana jemonpe usul ocokʼ. Noa iạte cetʼ iń doń kại akada?

⁸ Ape sapʼ sorape lạgitʼ iń do eṭakʼ eṭakʼ manḍer khon goṛokoń hatao akada, men daṛekeape luṭ hõń luṭ akada.

⁹ Ape ṭhen tahẽkateń ṭonṭalenre okoe hõ bhar do bạń ladeyatʼpe tahẽkana, ente Makedoniạ khon okoe boehako hecʼlen onkoge ińakʼ ṭonṭawakʼko purunletʼa. Ar okalekate hõ iń do aperen bojha bạń hoyokʼa ar bạń hoyakana.

¹⁰ Ińre Mạsiyakʼ oka sạriyakʼtetʼ menakʼ ona lekateń menkea, Akhaea disạm reakʼ oka jaegare hõ ińakʼ noa sarhao do okoe hõ bako bond daṛeakʼa.

¹¹ Cetʼ iạte noa doń meneda? Ape bạń dulạṛetʼpe iạtege cetʼ baṅa? Isor doe baḍaegea, apeń dulạṛetʼpea mente.

¹² Okoe apnarko sarhaokʼre ale somanko udugokʼkan onko jemon ona ạt aloko ńam onate okań kạmikan onageń kạmi idiya.

¹³ Ente onkanko hoṛ do eṛe apostol ar phạsiara kạmiyạko kanako. Ar Mạsiren apostolko mente udugokʼ lạgitʼ onko do apnartetʼko bodolokʼ kana.

¹⁴ Noa iạte hahaṛakʼ reakʼ do cetʼge bạnukʼa, ente Soetan hõ marsalre do serma goḍet lekae udugokʼ lạgitʼ apnartetʼe bodolokʼ kana.

¹⁵ Ar Soetanren sapʼdapʼko hõ apnartetʼ bodolkate dhoromren sapʼdapʼ menteko udugokʼkan khan, enḍekhan hahaṛakʼ reaṅ cetʼ menakʼa? Onko do kạmi mucạtʼre oka kuṛại menakʼtako onageko ńama.

Apostol lekate Pạulakʼ harkhet saset

¹⁶ Iń do arhõń meneda, okoe hõ bebuj jemon aloko hudisiń. Ar onkagepe bujhạuedeń khan enḍekhan bebuj mentege ataṅińpe, jemon thoṛaganiń sarhao daṛeakʼ.

¹⁷ Ńitokʼ okań menetʼkan ona do Probhu Isorakʼ hukum leka do bạń meneda, menkhan apnar reaṅakʼko sarhao iạte bebuj lekań roṛeda.

¹⁸ Manwa okaṭakʼteko sarhaokʼ, onate ḍherkogeko sarhaokʼkan khan enḍekhan iń do cedakʼ bạń sarhaokʼa?

¹⁹ Ape dope budanko kante bebujkoakʼ kusitepe sahaoetʼtakoa.

²⁰ Ar eken ona do baṅ, jãhãege golame benaolepere, jãhãegeye jom reṅgecʼlepere, jãhãegeye sapʼlepere, jãhãege acʼteye maraṅlenre ar jãhãege mẽtʼãhãreye thapalepere, ape dope sahaoetʼtakoa.

²¹ Iń do lajaokʼ tulucʼ iń aṅgocetʼ kana, noako babotre ale do ape ṭhen nijorgele tahẽkana. Okaṭakʼte eṭakʼko sarhaokʼ lạgitʼko diletʼkan onate iń hõ sarhaokʼ doń diletʼgea; ar noa katha do bebuj lekategeń roṛeda.

²² Okoeko sarhaokʼkan onko do cetʼ Ibri kanako? Iń hõ kangeạń. Onko do cetʼ Israel kanako? Iń hõ kạnạń. Onko do cetʼ Abrahamren bõs kanako? Iń hõ kạnạń.

²³ Onko do cetʼ Mạsiren sapʼ dapʼko kanako? Iń do arhõ ḍhertetʼ kạnạń. Disạipe, iń do bạulạha hoṛ lekań roṛeda. Mạsiyakʼ sapʼdapʼ kạmire iń do onko khon ḍheriń khaṭao akana, ar ạḍi dhaoiń hajot akana, arhõ ạḍi dhao daleń jomakada, ar ạḍi dhao gujukʼ dạkhilreń paṛaolena.

²⁴ Jihudiko ṭhen mõṛẽ dhao mitʼṭecʼ kom pongel iń cạbuk ocolena,

²⁵ bẽtte pe dhaoiń dal ocolena. Dhirite mitʼ dhaoiń tiń ocolena; ar pe dhao ińakʼ jahaj unumlena. Mitʼ siń mitʼ ńindạ doreão reakʼ athantar dakʼreń tahẽkana.

²⁶ Aema disạmiń dãṛã akada. Ḍubạ dakʼ, ḍạkuko hotete, apnar jạtren hoṛ ar boṅgan hoṛ jạtrenko hotete muhinreń paṛaolena. Ona chaḍa iń do nagrahakore, hahaṅkar jaegare, doreãore ar phạsiạra boehako talarehõ muhinreń paṛaolena.

²⁷ Mạsiyakʼ sapʼdapʼ kạmire kosṭoreń paṛaolenre hõ ạḍiń khaṭao akana. Aema ńindạ jagwariń tahẽkana, reṅgecʼ ar tetaṅreń paṛaolena begor jomteń tahẽkana, rabaṅ ar laṅgaṭteń kosṭolena.

²⁸ Noako chaḍa dinạmge sanam manḍerrenkoakʼ dạndi do iń cetanre ladekʼkan tahẽkana.

²⁹ Jãhãeye nijorlenre cetʼ uniyakʼ nijortetʼre bạń bhạgiyạdarokʼ kana? Jãhãege kạireye ńurlenre cetʼ iń do jiwi baṅ lokʼkantińạ?

³⁰ Iń do sarhaokʼ jạruṛgetiń khan enḍekhan ińakʼ nijortetʼ iạtegeń sarhaokʼ kana.

³¹ Isor, Probhu Jisu Mạsiren Baba, okoe do jaejug hạbicʼ ṭhonok ńam lek kane, uniye baḍaea iń do eṛe bạń roṛeda.

³² Damesekre Aretas rajren disạm cakʼlaoyicʼ do sabeń lạgitʼ Damesek renkoakʼ nagraha pahra reakʼe hukumleda.

³³ Menkhan pạcrire oka jalna tahẽkan ona bhitrite mitʼṭecʼ khạclạkʼte onko do bahreteko paromgotʼ kạdińạ, ar nonkate iń do uniyakʼ ti khoniń ńir bańcaolena.