2 Korinthiko 10 - সান্তালী বাইবেল

Pạulakʼ kạmi reaṅ

¹ Mạsiyakʼ mạ̃hir ar daya reakʼ katha disại tulucʼ iń Pạul do apeń nehõrape kana. Hoṛko mena, ape ṭhen tinreń tahen unre doń nindhạnokʼ kana, menkhan tinre bạń tahen unre do dilanicʼ iń hoyokʼkana.

² Jel lekatele coloneda mente okoeko hudisetʼle, onko upạrte tinạkʼ dil udukʼ jạruṛ, ińiń hecʼlenre unạkʼ dil jemon udukʼ baṅ lagaoạń.

³ Cedakʼ je abo do jel ar mãyãmren hoṛ kanrehõ bon okaṭakʼ lạṛhại bon lạṛhạikan ona do jel ar mãyãm reakʼ do baṅkana.

⁴ Jel ar mãyãm reakʼ gobolre tahẽkate okako khanḍa bhanḍate manwako lạṛhạikan onate ale do bale lạṛhại kana, menkhan Isorakʼ daṛete aboakʼ khanḍa bhanḍa ar kajak gaṛko hõ dhaṅ dhaserokʼa.

⁵ Ale do manwakoakʼ eṛeteakʼle nosṭoyeda ar Isor baḍaeye horre tạkicʼakʼ leka oka hudis bundisko usulokʼe menjoṅkan ona dole dhaṅ dhasereda; ar mon reakʼ mimitʼ hudis bundisko do Mạsi ṭhenle gobol ocoyeda.

⁶ Ape do tinre purạtepe gobolokʼa unre okoe bin gobolreko tahen onko sạjạiko lạgitʼle sapṛao tearokʼa.

⁷ Ape do bahre reakʼ muṭhạngepe ńeleda. Ar jãhãege apnar do Mạsiren kanae menteye pạtiạukʼkan khan, enḍekhan noa hõe hudisjoṅma, uni cetʼlekae Mạsirenkan onkage ale hõ Mạsiren kanale.

⁸ Probhu Isor okaṭakʼ ạidạriye emakatʼle ona ạidạri reakʼ monsubạ do hoyokʼkana apeko benao rakapʼpe, menkhan lokshanpe lạgitʼ do baṅ. Ente noa ạidạri iạte thoṛań sarhaokʼre hõ ona lạgitʼ do bạń lajao ocokʼa.

⁹ Ińakʼ noa katha iạte alope hudisa, ciṭhiteń botor ocoyetʼpea.

¹⁰ Adom adom hoṛko meneda, “Uniyakʼ ciṭhiko do monre gaḍaokʼ leka keṭecʼ ar joranakʼ kana, menkhan sorreye tahẽlen khan uni doe nijorgea ar uniyakʼ roṛ do cetat reakʼ hõ baṅkana.”

¹¹ Ar onkan hoṛ doe bujhạuma, hạjir bạnukʼlere hõ aleakʼ ciṭhite oka kathale roṛetʼkan, onkage hạjirlenre hõ kathale roṛa.

¹² Ape modren adomko do apnarko sarhaokʼkana. Onko dolre apnar lekha midokʼ se onko tulucʼ jurikʼ do bale dileda. Onko doko bebujgea, ente apnarte oka bhageko hudisetʼ ona tulucʼgeko jurikʼ kana arko bicạrokʼkana.

¹³ Menkhan tinạkʼ sarhaokʼ lek kanle ona bahre ale do bale sarhaokʼ kana, bickom Isor aleakʼ kạmi lạgitʼ okaṭakʼ simạnakoe ṭhik dohoakatʼ ona khongele sarhaokʼ kana; ar ape hõ ona simạna bhitrirege menakʼpea.

¹⁴ Onate apeakʼ katha iạtele sarhaokʼre simạnạ bahre do cetʼhõ bale roṛeda. Ar ape ṭhen bale senlen khan aleakʼ nonkan sarhaoakʼ do simạ bahre hoykokʼtalea. Menkhan ale do Mạsi reaṅ bhage sombat porcar porcarte ape ṭhenhõle senlena.

¹⁵ Ona chaḍa eṭakʼkoakʼ kạmi iạtehõ ale do bale sarhaokʼkana, arle onka lekhan enḍekhan ona do simạna bahre hoykokʼtalea. Ale do noale asokʼ kana je, apeakʼ biswạs hara idikʼ são sãote ape talare arhõ bạ̃ṛtile kạmi daṛeakʼa.

¹⁶ Onate ape ṭhen khon senkate sạṅgiń jaegakore arhõ bhage sombatle porcar daṛeakʼa. Onate okoe hõ bako mendaṛeakʼa, ale do eṭakʼ hoṛko kạmiakatʼ ṭhenakʼ iạtele sarhaokʼ kana.

¹⁷ Menkhan sostor reakʼ katha leka, “Sarhaokʼicʼ do Probhu Isorrege baṛeye sarhaokʼma;”

¹⁸ ente apnarte sarhaokʼicʼ do okoe hõ bhage mente bae sạbudokʼa, bickom Probhu Isor okoeye sarhaoe unige bhage menteye sạbudokʼa.