2 Bõsbudạ 9 - সান্তালী বাইবেল

Solomon ṭhen Seba disạmren rạni

¹ Seba disạmren rạni do Solomonakʼ namḍak ańjomkate kuṭhin kuṭhin kuklikote uni biḍạue lạgitʼ Jerusalemteye hecʼena. Uni do ḍher hoṛko ar ũṭkoante Solomon ṭhene seṭerena. Ar ạḍi utạr jut so mosolako, sona ar moni muktako hõe ạgu darakeda. Uni do Solomon ṭhen hecʼkate monre cetʼko tahẽkantae ona jotowakʼe baḍae ocokedea.

² Ar Solomon do uniyakʼ joto kukli reakʼ roṛ ruạṛe emadea; Solomon ṭhen nonkan cetʼge kuṭhin do baṅ tahẽkana one okaṭakʼ do bae bujhạu oco daṛeade.

³ Sebaren rạni do Solomonakʼ ạkil ar uniyakʼ raj dolankoe ńelkeda.

⁴ Uni do arhõe ńelkeda uniyakʼ ṭebil reakʼ jomakʼ, uniren kạmiyạkoakʼ tahen jaega, mońj horokʼ bande akatʼ uniren sapʼsosorko, uniren darkha rasa dudulko ar ona siṛhi, one okaṭakʼ siṛhite uni do Probhu Isorakʼ oṛakʼteye rakapʼ calakʼkan tahẽkan. Ar noako ńelte uni doe ṭhak utạrena.

⁵ Uni do raje metadea, “Ińakʼ disạm khon amakʼ kạmi ar ạkil reaṅ okaṭakʼ kathań ańjomletʼ ona do sạrikangea.

⁶ Menkhan nonḍe hecʼkate ińakʼ mẽtʼte ạuriń ńel hạbicʼ bạń pạtiạukʼkan tahẽkana. Sạrige, niạ reakʼ adha hõ iń ṭhen do baṅ lại akana. Okaṭakʼ khobor iń ńamakatʼ amakʼ ạkil ar dhon do ona khon hõ ḍher bạ̃ṛtigea.

⁷ Amren hoṛ do ạḍi sukre menakʼkoa! Okoe do jao okte am samaṅreko tahenkan ar amakʼ ạkil reakʼ kathako ańjometʼ onko kạmiyạko doko bhạgangea.

⁸ Amren Probhu Isorakʼ sarhaoge baṛe hoyokʼtae ma, okoe do am cetanreye kusi akante acʼakʼ siṅghạsonreye duṛupʼ akatʼme jemon amren Probhu Isorakʼ rajosṭim benao daṛeakʼ. Uni do Israelkoe dulạṛetʼkoa ar jaejug hạbicʼ ṭarhao ocoko lạgitʼte uni do hok reakʼ bicạr ar dhorom rukhiyại lạgitʼgeye raj akatʼmea.”

⁹ Uni do pon ṭon tala khon hõ bạ̃ṛti sona raje emadea, ar ạḍi utạr jut so mosolako ar damanakʼ mạnik dhiriko hõe emadea. Seba rạni do Solomon oka lekan mosolakoe emade onkan jut so mosola do ar tisge baṅ ńelakan tahẽkana.

¹⁰ Ona chaḍa Hirạm ar Solomonren okoe gutiko do Ophir khon sonako ạguyetʼ tahẽkan onko do condon kaṭko ar mạnik dhiriko hõko ạguyetʼ tahẽkana.

¹¹ Ar Solomon raj do onako condon kaṭte Probhu Isorakʼ oṛakʼ ar raj oṛakʼ reakʼ siṛhi ar sekʼreń dolko lạgitʼ binạ banamko ar peṛesaṅkoe benao ocokeda. Noa lahare Jihudạ disạmre nunạkʼ chondon kaṭ do Jihudạ disạmre ar baṅ ńelakan tahẽkana.

¹² Seba rạni okae monsubạketʼ are koeketʼ ona jotowakʼge Solomon raj do uniye emadea. Ar rạni uni lạgitʼ okae ạguletʼ ona khon hõ bạ̃ṛtiye emadea. Inạ tayom rạni do acʼren hoṛkoante acʼakʼ disạmteye ruạṛ calaoena.

Solomon rajakʼ jak jomok

¹³ Jao bochor Solomon ṭhen oka sona hijukʼkan tahẽkan ona reakʼ ojon do bargel turui ṭon leka.

¹⁴ Ona chaḍa bekʼpariko ar bạnij bepariko hõ sonako ạguyetʼ tahẽkana ar Arobren sanam rapajko ar disạm cakʼlaoko hõ Solomon ṭhen Sona ar rupạko ạguyetʼ tahẽkana.

¹⁵ Solomon raj do sona kuṭạm capṛa ocokate barsae ḍhalkoe benao ocokeda. Mimitʼ goṭecʼ ḍhalre eae keji irạl sae gram sona lagaolen tahẽkana.

¹⁶ Kuṭạm capṛa akatʼ sonate pe sae kạṭicʼ ḍhalko hõe benao ocoletʼ tahẽkana. Ona mimitʼ goṭecʼ ḍhalre pe keji are sae gram sona lagaolena. Uni do Lebanon reakʼ bir oṛakʼre onakoe dohokada.

¹⁷ Inạ tayom raj do hạti sonḍa reakʼ mitʼṭecʼ maraṅ okocʼ siṅghạsone benao ocokeda ar khạṭi sonateye tol ocokeda.

¹⁸ Ona siṅghạson reakʼ siṛhi do turui goṭecʼ dhapko tahẽkana ar ona sãote sona reakʼ jaṅga lebedokʼakʼ mitʼṭecʼ ganḍo hõe lagao ocoakatʼ tahẽkana. Duṛubokʼ jaega reakʼ banar tire do hatol tahẽkana ar hatol aṛere do dhạcri kule teṅgo akan reakʼ muṭhạn tahẽkana.

¹⁹ Ona turui goṭecʼ dhap reakʼ banarsa aṛere jotote gelbar goṭen dhạcri kulakʼ muṭhạn tahẽkana. Eṭakʼ jãhãn rajosṭire nonkan siṅghạson do tishõ baṅ benao akan tahẽkana.

²⁰ Solomonakʼ ńuńuakʼ sanam bhajanko do sona reakʼ tahẽkana ar Lebanon bir oṛakʼ reakʼ sanamakʼ bhajanko hõ khạṭi sonate benao tahẽkana. Solomon oktere rupạ reakʼ dam ḍher do baṅ tahẽkana.

²¹ Ar rajakʼ adomakʼ maraṅ maraṅ jahajko do Hiramren hoṛko soṅgekate Tạrsiste calakʼkan tahẽkana. Pe bochor por por ona Tạrsis reakʼ jahajko do sona, rupạ, hạti sonḍa, hạṛũko ar marakʼkoko ạguyetʼko tahẽkana.

²² Solomon raj do dhạrtiren eṭakʼ sanam rajko khon ạkilanicʼ ar kisạ̃ṛe tahẽkana.

²³ Isor do Solomonakʼ ontorre oka ạkile emade tahẽkan ona ạkilte perecʼ katha ańjom lạgitʼ dhạrtiren sanam rapajko do uni sãote ńapamokʼ lạgitʼko kurumuṭuyetʼ tahẽkana.

²⁴ Ar okoeko hijukʼkan tahẽkan onko do sanamkoge thoṛa baṅ thoṛa jãhãnakʼ sandesko ạguyetʼ tahẽkana. Onako modre sona ar rupạ reakʼ jinisko, kiricʼ khạnḍwạkʼko, khanḍa bhanḍako, jut so mosolako, sadomko khaccarko tahẽkana. Ar bochorke bochor nonkage calakʼkan tahẽkana.

²⁵ Sadom ar rãt gạḍiko lạgitʼ Solomonakʼ do pon hajar oṛakʼ tahẽkana. Uniren do gelbar hajar aswariko tahẽkana; onko do rãt gạḍi dohoy reakʼ nagrahakore ar Jerusalemre apnar ṭhene dohoyetʼko tahẽkana.

²⁶ Uni do Phurạt gaḍa khon Philisṭikoakʼ disạm ar Misor disạm reakʼ simạ hạbicʼren rapajko cetanreye rajokʼkan tahẽkana.

²⁷ Solomon raj do Jerusalemre rupạ do dhiri lekae jarwakeda ar debdạru kaṭko do latar buru reakʼ loa dareko lekae hoyocokeda.

²⁸ Solomonren Sadomko do Misor ar eṭakʼ disạm khonko ạguyetʼko tahẽkana.

Solomonakʼ gujukʼ

²⁹ Solomonakʼ eṭakʼ eṭakʼ kạmi reakʼ katha do pạhil khon ses utạrakʼ hạbicʼ Nathan nạbiyakʼ olakʼre, Siloni Ahiawakʼ nạbi kathare olakana ar Nabatren hopon Jerobiam reaṅ do “dorson ńeńelicʼ Idoakʼ dorson” ńutumanakʼ puthire ol menakʼa.

³⁰ Solomon do Jerusalemre pongel bochor hạbicʼ goṭa Israel jạtrenko cetanreye rajokʼkan tahẽkana.

³¹ Ona tayom uni do acʼren hapṛamko ṭhene calaoena; uni do acʼren apat Dạudakʼ nagrahareko topakadea. Ar ona tayom do uniren hopon Rehobiam do uniyakʼ jaegare raje hoyena.