2 Bõsbudạ 8 - সান্তালী বাইবেল

Solomonakʼ judạ judạ kạmiko

¹ Probhu Isorakʼ oṛakʼ ar acʼakʼ oṛakʼ benaote Solomon do bargel bochor lagaoade tahẽkana.

² Ar Hiram okako atoye emade tahẽkan Solomon do bargel bochor tayom onako arhõe benao rakapʼkeda ar Israelko onḍeye girobas ocoketʼkoa.

³ Ona tayom Solomon do Homat-Sobatre senkate onae dokholkeda.

⁴ Uni do hahaṅkar ṭoṭha reakʼ nagraha ar Homat ṭoṭha reakʼ sanamakʼ khajańci nagrahako arhõe benao rakapʼkeda.

⁵ Uni do cetan reakʼ Bet-horon phaṭok duạr ar huṛkạṛakʼ pạcrikoe benaoketʼte onae keṭecʼkeda.

⁶ Uni do Balat nagraha ar ona reakʼ joto do gola nagrahae benaokeda ar rãt gạḍiko ar aswariko lạgitʼ hõ mitʼ bar nagrahakoe benaokeda. Jerusalemre, Lebanonre ar acʼakʼ ḍanṭao gobolre okako rajosṭi tahẽkan onako modre okako benao dohṛae menletʼ ona sanamakʼkoe benaokeda.

⁷ Ar okoe do Israelko baṅkan, metakʼme Amoriko, Hittiko, Peresiko, Jebusikoren bõsko do unhõ jiwetʼko tahẽkana,

⁸ ar Israelko okoe jạtrenko bako marao giḍiletʼko Solomon do onkoge golam lekate kạmi lạgitʼe sapʼ paṭetʼletʼkoa. Ar teheń hạbicʼ hõ onko do ona kạmigeko kạmikana.

⁹ Menkhan Israelko do acʼakʼ kạmi lạgitʼ golam mente bae benaoletʼkoa; onko do acʼren lạṛhại birko tahẽkana, uniren subedarko ar uniyakʼ rãt gạḍi cakʼlaoko ar aswarikoren senaputiko hõko tahẽkana.

¹⁰ Ona chaḍa Solomonren do bar sae mõṛẽgel sordar kạmiyạkoko tahẽkantaea onko do golamkoakʼ kạmiko ńel todarotetʼkan tahẽkan.

¹¹ Solomon do Pharaoren hoponera lạgitʼ okaṭakʼ oṛakʼe benaoletʼ tahẽkan uni do Dạud nagraha khon onḍeye ạgukedea. Uni doe menkeda, “Ińren bạhu do Israelren raj Dạudakʼ oṛakʼre do bae tahena, ente okako jaegare Probhu Isorakʼ sinduk ạgu hoylen onako ṭhạ̃i do sonotgea.”

¹² Koejoṅ oṛakʼ reakʼ pinḍạ samaṅre Solomon do Probhu Isorakʼ oka pinḍe benaoletʼ tahẽkan ona cetanre Probhu Isorakʼ ńutumte jeredokʼ samaṅokʼakʼ porobe porobokʼkan tahẽkana.

¹³ Moseyakʼ hukum leka jirạukʼ mãhãre, ambasre ar bochorre pea porob, metakʼme bin khạmiyanakʼ piṭhạ porobre, eae hapta reakʼ porobre, ar ḍera porobre- onako din reakʼ niạm lekate samaṅokʼakʼ porobko porobokʼ kan tahẽkana.

¹⁴ Uniren apat Dạudakʼ hukum lekate uni do naekeko dạyike emako lạgitʼ eṭakʼ eṭakʼ dolreye hạṭińketʼkoa ar dinạm hilokʼ reakʼ kạmi lekate sarhao sereń lạgitʼ ar naekeko goṛowako lạgitʼ uni do Liwikoe bahalketʼkoa. Mitʼke mitʼ phaṭok duạr lạgitʼ uni do rurukhiyạko dol lekateye bahalketʼkoa, ente nonkage Isorren hoṛ Dạud doe hukumletʼ tahẽkana.

¹⁵ Dạud raj do khajańci reakʼ jãhãnakʼ babotre ar eṭakʼ jãhãnakʼ babotre naekeko ar Liwiko okaṭakʼ hukume em oṭowatʼko tahẽkan ona do bako bemanot leda.

¹⁶ Probhu Isorakʼ oṛakʼ reakʼ rehetʼ khon ehopʼkate ona sạtokʼ reakʼ din hạbicʼ Solomonakʼ sanam kạmiko do ṭhik lekage hoyokʼkan tahẽkana. Ar nonkate Probhu Isorakʼ oṛakʼ do benao sạtena.

¹⁷ Ona tayom Solomon do Edom disạm reakʼ doreão aṛere menakʼ Esion-Geber ar Elotteye calaoena.

¹⁸ Ar Huram do acʼren hoṛko, jahajko ar adom gạkhuṛ cakʼlaoko Solomone koladea. Noko do Solomonren hoṛko soṅgekate Ophirte senkate eaegel tala ṭon sonako ạguketʼte Solomon rajko emadea.