2 Bõsbudạ 7 - সান্তালী বাইবেল

Koejoṅ oṛakʼ uḍhạukʼkan

¹ Solomonakʼ koejoṅ mucạtʼen são sãote serma khon seṅgel do pheḍ hecʼente jeredokʼ samaṅokʼakʼ ar eṭakʼ eṭakʼ samaṅokʼakʼ jotowakʼ jiniskoe atarkeda ar koejoṅ oṛakʼ do Probhu Isorakʼ ṭhonokte perecʼena.

² Onate naekeko do onḍe bako bolo daṛeada.

³ Seṅgel pheḍ hijukʼko ńelketʼte ar koejoṅ oṛakʼ coṭre Probhu Isorakʼ ṭhonokko ńelketʼte sanam Israelko do dhirite tol akatʼ racareko ombakʼente Probhu Isorko ḍobokʼadea ar niạ menkateko sarhaokedea, “Uni doe bhạgangea; uniyakʼ daya do jaejug hạbicʼ tahenkana.”

⁴ Ona tayom raj ar sanam hoṛko do Probhu Isor samaṅre samaṅokʼakʼ porobko porobena.

⁵ Solomon raj do bargel bar hajar ḍaṅgra ar mitʼ lakh bargel hajar bheḍae samaṅketʼkoa. Nonkate raj ar sanam Israelko do Isorakʼ oṛakʼko uḍhạukeda.

⁶ Naekeko do akoakʼ ṭhạ̃ireko teṅgoyena ar Liwiko hõ Probhu Isor ńutumte banam ar rui lạgitʼ akoakʼ jaegareko teṅgoyena. Ar naekeko ar Liwiko do samna sạmniko teṅgoyente sakwako oroṅkeda ar sanam Israelko doko teṅgo tahẽyena. Liwikoakʼ niạ banam ar ruruwakʼko Dạud raj do Probhu Isor sarhaoe lạgitʼe benao ocoleda ar onakoe banam are ruyetʼ tahẽkana ar Probhu Isor sarhaoateye menetʼ tahẽkana, “Uniyakʼ dulạṛ do jaejug hạbicʼ tahenkana.”

⁷ Solomon do Probhu Isorakʼ oṛakʼ reakʼ samaṅ senakʼ raca reakʼ tala hĩs do Probhu Isor ńutumteye begar dohokeda ar onḍe uni do jeredokʼ samaṅokʼakʼ reakʼ porobe porobena ar sulukren samaṅokʼakʼ reakʼ itile samaṅkeda, ente pitạl reakʼ okaṭakʼ pinḍe benaoletʼ tahẽkan ona do jeredokʼ samaṅokʼakʼ ar anaj samaṅokʼakʼ ar itil samaṅokʼakʼ lạgitʼ do huḍińge tahẽkana.

^8-9 Ona jokhecʼ Solomon ar uni sãoten sanam Israelko do, metakʼme Homat ṭoṭha khon Misor reakʼ rohoṛ gaḍa hạbicʼ sanam ṭoṭha khonko hecʼakan maraṅ utạr dolko do eae din hạbicʼ pinḍ samaṅokʼakʼ porobko porobena. Ar irạlakʼ dinre onko do mitʼṭecʼ sabhako hoyocokeda ar eae din hạbicʼ arhõko porobena.

¹⁰ Ar eae cando reakʼ bargel pe din hilokʼre raj do hoṛko nij nij oṛakʼteye kolkatʼkoa. Dạud, Solomon ar uniren hoṛ Israelko cetanre Probhu Isor do okae bhạlại akatʼko onate rạskạte ar kusi monte oṛakʼteko ruạṛ calaoena.

Probhu Isor do Solomon ṭhene ńel ocoyen

¹¹ Probhu Isorakʼ oṛakʼ ar raj doṅgol benao lạgitʼ Solomonakʼ monre okako tahẽkan ona sanamakʼ uni do napaeteye sạtkeda.

¹² Tayomte mitʼ din ńindạ jokhecʼ Probhu Isor do Solomon ṭhene ńel ocoyenteye metadea, “Iń do amakʼ koejoṅ iń ańjom akada ar samaṅokʼakʼ porobokʼ reakʼ oṛakʼ lekate iń lạgitʼ niạ jaegageń bachao akawana.

¹³ “Iń do tinre sermań bonda ar dakʼ bạń emokʼa, se disạm ḍahao marao lạgitʼ pohokoń hukumako, se ińren hoṛko talare moṛokiń kola,

¹⁴ unre ińren hoṛko, okoe do ińren hoṛ menteko hoho ocokʼkan onko do mạ̃hir seletʼko koejoṅ se ińakʼ dayako khoj ar bạṛicʼ hor khonko ruạṛ, enḍekhan serma khon onań ańjomtakote onkoakʼ kạikoń ikạ katakoa ar lahate leka onkoakʼ disạm iń teṅgo ruạṛakoa.

¹⁵ Niạ jaegare okaṭakʼ koejoṅ hoyokʼ ona lạgitʼ ińakʼ mẽtʼ ar lutur do jhicʼge tahena.

¹⁶ Niạ koejoṅ oṛakʼ iń doń bachao akawante ińakʼ tahen oṛakʼ lekate iń ńutumteń begar dohoakada. Niạ cetanre jao okte ińakʼ mẽtʼ ar ontor do jhicʼge tahena.

¹⁷ “Amren ạpum Dạud cetʼ lekae calakʼkan tahẽkan am hõ onkage iń samaṅre calakʼme ar ińakʼ sanam hukum ar niạmko dohoyme,

¹⁸ enḍekhan amakʼ raj siṅghạson do jaejug hạbicʼ iń ṭikạu dohoya, ente iń do amren ạpum Dạud ṭhen iń gokʼletʼ tahẽkana, ‘Israelko ḍanṭaoko lạgitʼ amakʼ bõsren hoṛkoakʼ okulạn do baṅ hoyokʼa.’

¹⁹ “Menkhan ińakʼ hor khonpe pharakokʼ ar okako niạm ar hukumkoń emakawatʼpe onape bạgiyakʼte debotakope sewawako arpe ḍobokʼako,

²⁰ enḍekhan iń okaṭakʼ disạmiń emakawatʼpe ona khon rehetʼ sudhạń totʼ giḍikapea ar iń ńutumte okaṭakʼ koejoṅ oṛakʼ iń begar dohoakatʼ ona hõ ińakʼ mẽtʼãhã samaṅ khoniń sạṅgiń giḍikakʼa. Unre sanam jạtrenko ṭhen ona oṛakʼ do landa-dhutʼakʼ iń hoeocoya.

²¹ Niạ koejoṅ oṛakʼ do ńitokʼ nunạkʼ maraṅakʼ hoyakanre hõ unre okoe noa aṛeteko parom senokʼ onko do comkao godokʼteko kuliya, ‘Probhu Isor do cedakʼ niạ disạm ar niạ koejoṅ oṛakʼ cetanreye onkakeda?”

²² Ar hoṛkoko roṛ ruạṛa, ‘noa reakʼ karon do hoyokʼkana, okoe do Misor disạm khone oḍok ạguletʼko onko hapṛamkoren Probhu Isor do onkoe bạgi giḍi akatʼkoa. Onko do debota secʼko ghańjeṛ akana ar onkoko sewawako kana; ar onatege uni do onko cetanre noa bạṛicʼakʼe paṛao ocoakada.’ ”