2 Bõsbudạ 6 - সান্তালী বাইবেল

Hoṛko ṭhen Solomonakʼ ṭhikạna

^1-2 Unre Solomone menkeda, “E Probhu Isor, am do rimil talarem tahena mentem menleda. Iń do ńitokʼ am lạgitʼ napae okocʼ mitʼṭecʼ oṛakʼ iń benao akada; ar noa do jaejug lạgitʼ amakʼ tahen oṛakʼ hoyokʼa.”

³ Niạ menkate raj do jarwa akan sanam Israelko secʼe ạcurente onkoe bhoratʼkoa. Unre hoṛko doko teṅgo akan tahẽkana.

⁴ Ona tayom uniye menkeda, “Israelkoren Probhu Isorakʼ sarhao hoyokʼtaema. Uni do ińren ạpuń Dạud ṭhen acʼakʼ mocate okae gokʼletʼ ona do acʼgeye purunkeda. Uni doe menleda,

⁵ ‘ińren hoṛko Misor disạm khoniń oḍok ạguketʼko tayom ińiń sodorokʼ reakʼ ṭhạ̃i lekate mitʼṭecʼ oṛakʼ benao lạgitʼ Israelkoakʼ jãhãn gusṭi reakʼ nagraha hõ bạń bachaoana, se ińren hoṛ Israelko cetanre mukhiyạ hoyokʼ lạgitʼ hõ jãhãe hoṛko bạń bachao akawana,

⁶ menkhan ńitokʼ do ińakʼ tahen oṛakʼ lekate Jerusalemiń bachaoana ar ińren hoṛ Israelko ḍanṭaoko lạgitʼ do Dạudgeń bachao akadea.’

⁷ “Israelren Probhu Isor lạgitʼ mitʼṭecʼ oṛakʼ benao reakʼ monsubạ do ińren ạpuń Dạudakʼ ontorre tahẽkangea.

⁸ Menkhan Probhu Isor do ińren ạpuń Dạude metade tahẽkana, ‘iń lạgitʼ mitʼṭecʼ oṛakʼ benao reakʼ monsubạ ontorre menakʼtam ona do bhagegea.

⁹ Tobe oṛakʼ do alom benaoa, ona do amren hopone benaoa, one okoe doe amren hoponkan. Unige iń lạgitʼ ona oṛakʼe benaoa.’

¹⁰ “Probhu Isor do acʼakʼ gokʼakʼe purạu akada. Ińren ạpuń oka hudạreye tahẽkan iń do ona hudạgeń ńam akada. Probhu Isorakʼ gokʼakʼ lekate iń do Israelkoakʼ siṅghạsonreń duṛupʼ akana ar Israelren Probhu Isor lạgitʼ niạ oṛakʼgeń benao akada.

¹¹ Ar onḍe do Probhu Isorakʼ goha sinduk dohoakada one onare Israelko reakʼ bondobos menakʼ.”

Solomonakʼ koejoṅ

¹² Ona tayom Solomon do onḍe jarwa akan Israelko samaṅre Probhu Isorakʼ pinḍ ṭhen teṅgokate banar tiye tulketʼtaea.

¹³ Uni do mõṛẽ moka jeleń, mõṛẽ moka osar ar pe moka usul pitạl reakʼ mitʼṭecʼ macane benao ocoletʼte tala racareye dohokeda. Uni do ona macanre decʼkate sanam Israelko samaṅreye ikhṛumena ar banar ti serma secʼ tiyạr ketʼteye menkeda,

¹⁴ “E Probhu Isor, Israelkoren Isor, coṭ sermare se latar otre am lekan do ar cele Isorge bạnukʼkoa. Amren gutiko okoe do mon ar ontorte amakʼ horteko calakʼ onko secʼ amakʼ asambheṛ dulạṛ reakʼ bondobos baṛe rukhiyại me.

¹⁵ Amren guti ińren ạpuń Dạud ṭhen okam gokʼletʼ am do onam purạu akada. Ar mocate okam menletʼ kạmite hõ onam purạu akada, ar ona do ale hõle ńeletʼ kana.

¹⁶ “Ńitokʼ do E Israelren Probhu Isor, amren guti ińren ạpuń Dạud ṭhen okam gokʼletʼ ona baṛe purạume. Amem menleda, uniren hoponko uni leka amakʼ ạn-ạri leka calakʼ reakʼko moneyakʼ khan Israelakʼ siṅghạsonre duṛubokʼ lạgitʼ uniyakʼ bõsren hoṛkoakʼ okulạn do baṅ hoyokʼa.

¹⁷ E Israelren Isor, amren guti ińren ạpuń Dạud ṭhen okaṭakʼem gokʼletʼ ona baṛe purạukʼ ma.

¹⁸ “Menkhan Isor do cetʼ sạrige dhạrtiren manwako sãoteye girobasokʼa? Sermare, se coṭ serma reakʼ sanamakʼ jaegare hõ amakʼ okulạn hoyokʼ khan ińakʼ benaoakʼ niạ oṛakʼre amakʼ jaega do cetʼ hoyokʼgea?

¹⁹ Enhõ E ińren Probhu Isor, amren gutiyakʼ koejoṅ ar nehõr baṛe luturakʼme. Teheń amren guti do am ṭheniń rakʼjoṅ kana ariń nehõr joṅ kana ańjomtińme baṛe.

²⁰ Ar okaṭakʼ jaega reakʼ katham menakatʼ, nonḍege amakʼ koejoṅ reakʼ oṛakʼ do hoyokʼa ona jaega secʼ metakʼme, niạ koejoṅ oṛakʼ secʼ amakʼ mẽtʼ do siń ńindạ beṅgetʼ akae baṛe tahenma. Ar niạ ṭhạ̃i secʼ samaṅkate amren guti do tinreye koejoṅa unre uniyakʼ koejoṅ baṛe ańjomtaeme.

²¹ Niạ ṭhạ̃i secʼ samaṅkate amren guti ar amren Israel hoṛko am ṭhenko nehõrokʼre onkoakʼ hõ luturakʼtako me. Amakʼ tahen ṭhạ̃i serma khon ańjomtakome ar ikạkakome.

²² “Jãhãe hoṛ eṭakʼ hoṛ upạrte behok iạteye dusilen khan ar acʼ apnar cetanre sarap ạgui lạgitʼe kiriạ ocokʼ khan ar amakʼ oṛakʼre senkate uni do pinḍ samaṅreye kiriạlen khan,

²³ enḍekhan serma khon uniyakʼ katha ańjomtaeme ar ona leka kạmime. Unre amren gutikom bicạrkote dos akatʼ reakʼ jo do bohokʼrem ladeaete dusi mentem sạbudea ar bin dusiyicʼ do uniyakʼ kạmi leka kuṛạiyem emaete bin dusi kanae mentem sạbudea.

²⁴ “Am upạrte kại gunạkʼte amren hoṛ Israelko do akoren bạiri ṭhen khonko bhagao ocokʼte arhõ am ṭhenko ruạṛ hijukʼ ar koejoṅ oṛakʼre amko sarhaome am ṭhenko koejoṅ arko nehõram,

²⁵ unre serma khon ańjomtakome ar amren Israel hoṛkoakʼ kại ikạitakome ar okaṭakʼ disạm onkoren hapṛamkom ematʼko tahẽkan onḍe arhõm ruạṛ ạgukoa.

²⁶ “Am upạrte amren hoṛkoakʼ kại gunạkʼte tinre rimil esedokʼte bae daga unre onko do niạ jaegare ruạṛkate amko sarhaome ar am ṭhenko koejoṅ ar kosṭo iạte kại khonko ruạṛokʼ,

²⁷ enḍekhan am do serma khon ona ańjomtakome ar amren gutiko, metatʼme amren hoṛ Israelkoakʼ kại ikạ katakom. Ar jionre ṭhik leka calakʼ cetʼakome ar somppoti lekate okaṭakʼ disạmem emakawatʼko ona disạm cetanre dakʼ ńur ocoyme.

²⁸ “Disạmre akal se mahamạri ńellenre, ar phosol jhãoralenre se gocʼlenre, ar phosolko pohokoko jom maraoletakore, ar bạiriko onkoakʼ jãhã nagrahako gherao esetʼlekore, ar jãhãlekan ruạ se muhinko hecʼakore,

²⁹ amren Israel hoṛko unre jãhãege kastaokate mon reakʼ dukte niạ mundil secʼ ti tiạrkateko koejoṅ se am ṭhenko nehõrokʼ,

³⁰ enḍekhan amakʼ tahen ṭhạ̃i serma khon onkoakʼ ańjomtakome ar ikạkakome. Ar onkoakʼ kạmiko lekate bicạrtakome, ente am do onkoakʼ mon reakʼ jotom baḍaea ar eken amge sanam manwakoakʼ ontorem baḍaekana.

³¹ Am dom onkaea jemon aleren hapṛamko okaṭakʼ disạmem emakawatʼko onḍe amren hoṛko piṛhike piṛhiko botoram ar amakʼ horteko taṛam idi.

³² “Ona chaḍa amren Israel hoṛko baṅkan nonkan jãhãe bidisiạ hoṛko amakʼ maraṅ ńutum ar amakʼ daṛeanakʼ ti reakʼ katha ańjomkate sạṅgiń disạm khon hecʼkate niạ koejoṅ oṛakʼ secʼ ạcurkateko koejoṅ,

³³ enḍekhan amakʼ tahen ṭhạ̃i khon ańjomtakome. Ar onko okako khoj onage onka akome jemon dhạrtiren sanam hoṛko baḍae daṛeam ar amren Israel hoṛko leka onko hõ amko sewawam arko baḍae daṛeakʼ, iń benaoakʼ niạ oṛakʼ do amakʼ oṛakʼ kangea mente.

³⁴ “Am do tinre amren hoṛko onkoren bạiriko upạrte lạṛhại lạgitʼem kollekore onko jãhãregeko tahen onḍe khon amem bachao akatʼ niạ nagraha secʼ ar am lạgitʼ iń benao akatʼ niạ oṛakʼ samaṅkate am ṭhenko koejoṅ,

³⁵ enḍekhan serma khon onkoakʼ koejoṅ ar nehõr baṛe ańjomtakome ar onko sejokʼme.

³⁶ “Onko do am upạrteko kại lekhan: ar bako kạiya nonkan hoṛ do bạnukʼkoa: ar onko cetanrem edrekʼte bạirikoakʼ tirem jimạko ar sạṅgiń disạmte bondikateko idi ocokʼ,

³⁷ ar bondi dosarege ona disạmre monko ạcurtako arko kastaokʼte nehõrokʼteko men, ‘ale dole kại akada, arle behok akada ar bạṛicʼ hortele taṛam akada,’ enḍekhan onkoakʼ koejoṅ ańjomtakome. ”

³⁸ Ona disạmre mon ar ontorte am secʼko ạcur ruạṛokʼ ar okaṭakʼ disạm onkoren hapṛamkom emakawatʼko ona disạm secʼ, amem bachao akawan nagraha secʼ, am lạgitʼ iń benao akatʼ niạ oṛakʼ secʼ samaṅkateko koejoṅ,

³⁹ enḍekhan amakʼ tahen ṭhạ̃i serma khon onkoakʼ koejoṅ ar nehõrjoṅakʼ ańjomtakome ar onko sejokʼme. Amren okoe hoṛko do am upạrteko kại akatʼ onko hoṛ hõ ikạkakome.

⁴⁰ “E ińren Isor, niạ jaegare okako koejoṅ hoyokʼ ona secʼ jemon ńitokʼ amakʼ mẽtʼ ar lutur jhicʼge baṛe tahenma.

⁴¹ “E Probhu Isor, ńitokʼ do amakʼ jirạukʼ ṭhạ̃ite hijukʼme; dela hijukʼme ar amakʼ daṛeanakʼ sinduk hijukʼma. E Probhu Isor, amren naekeko do dhorom reakʼ kicricʼko horogma. Am okam bhạlại akatʼ ona lạgitʼ am bhuktiamko doko rạskạ joṅma.

⁴² E Probhu Isor, amem ojokʼ bahal akatʼko hoṛkoakʼ koejoṅ do alom dea giḍikakʼa; amren guti Dạud okaṭakʼ khạndri dulạṛem udukʼ akawade ona baṛe disạ dohokakʼme.”