2 Bõsbudạ 5 - সান্তালী বাইবেল

¹ Nonkate Solomon raj do Probhu Isorakʼ oṛakʼ reakʼ sanamakʼe kạmi sạtkeda. Ona tayom uni do acʼren apat Dạud okako jinis Probhu Isor ńutumteye begar doholetʼ onakoe ạgukeda. Onako modre do sona, rupạ ar eṭakʼ eṭakʼ bhajanko tahẽkana. Onako uni do Isorakʼ oṛakʼ reakʼ dhon bhanḍarreye dohokada.

Goha tạmbu koejoṅ oṛakʼre ạgukʼkan

² Inạ tayom Solomon raj do Dạud nagraha, metakʼme Sion khon Probhu Isorakʼ bondobos sinduk ạgui lạgitʼ Israelren murubbiko, gusṭiren mathako ar Israelren mukhiyạko Jerusalemre acʼ ṭhene jarwaketʼkoa.

³ Onate eaeakʼ candore porobokʼ jokhecʼ Israelren onko sanam hoṛ do Solomon raj ṭhenko hecʼena.

⁴ Israelren sanam murubbikoko jarwayen khan Liwiko do sindukko gokʼkeda.

⁵ Onko ar naekeko do sinduk, ńapamokʼ tạmbu ar sanamakʼ sonotakʼ bhajanko gokʼ idikeda.

⁶ Solomon raj ar uni ṭhenko jarwa akan sanam Israelko do sinduk samaṅre nunạkʼ bheḍa ar ḍaṅgrako samaṅketʼkoa, onko do bako lekha daṛeatʼkoa.

⁷ Ona tayom naekeko do Probhu Isorakʼ bondobos sinduk do niṭ akatʼ ṭhạ̃ire, koejoṅ oṛakʼ reakʼ bhitri kandhare, metakʼme sonot utạrakʼ ṭhạ̃ire Kerubkinakʼ phạ̃kṛạ̃kʼ latarreko dohokada.

⁸ Onate Kerubkinakʼ lap lapa akan phạ̃kṛạ̃kʼte sinduk ar ona gokʼ ạguakʼ ḍaṅkin do danaṅge tahẽyena.

⁹ Onakin ḍaṅ do nonka jeleń tahẽkana, onakin reakʼ mitʼ mucạtʼ do bhitri kandha reakʼ samaṅ secʼakʼ asolakʼ kandha, metakʼme sonot utạrakʼ ṭhạ̃i khon ńel ńamokʼkan tahẽkana, menkhan sonot utạrakʼ ṭhạ̃i bahre khon do baṅa. Ar teheń hạbicʼ ona do onḍege menakʼa.

¹⁰ Israelko Misor disạm khonko oḍok hecʼen tayom Horeb burure Probhu Isor do onko lạgitʼ tinre bondobose bandhaokeda unre Mose okakin dhiri cạkti do sinduk bhitrireye doholetʼ ona chaḍa ar cetʼge onare do ar baṅ tahẽkana.

Probhu Isorakʼ ṭhonok

^11-14 Ona tayom sanam naekeko do sonot utạrakʼ ṭhạ̃i khonko oḍok hecʼena. Onko do jãhã dolren liwi kangeko, unre jotogeko sapha ocolena. Ar okoe naekeko doko sereńetʼ tahẽkan, metakʼme Asaph, Hemen, Jiduthon ar onkoren hoponko ar onko bõsren hoṛko do mĩhĩ musnạ kicricʼ horokʼkate pinḍ reakʼ purub secʼre teṅgokate kortal, peṛesaṅ, binạ banamko banametʼ tahẽkana. Ar naekeko do tinre bahreteko oḍok hecʼena unre sakwa oroṅko ar sereńko do mitʼdomte mitʼ rạṛte Probhu Isorko mạhimawadea arko sarhaokedea. Sakwa, kortal ar eṭakʼ bajnako sãote onko do ãṭ aṛaṅate Probhu Isor ńutumte niạ sereńko sereńkeda, “Uni doe bhagegea, uniyakʼ daya do jaejug hạbicʼ tahenkana.” Unre Probhu Isorakʼ oṛakʼ do rimilte perecʼena. Ona rimil iạte naekeko do sewa kạmi bako kạmi daṛeada, ente Probhu Isorakʼ ṭhonokte oṛakʼ do perecʼ akan tahẽkana.