2 Bõsbudạ 4 - সান্তালী বাইবেল

Koejoṅ oṛakʼ reakʼ sorońjamko

¹ Solomon do bargel moka jeleń, bargel moka osar ar gel moka usul mitʼṭecʼ pitạl reakʼ pinḍe benao ocokeda.

² Ona tayom uni do pitạl reakʼ chãńchreye dulketʼte dakʼ dohoy lạgitʼ maraṅ okocʼ mitʼṭecʼ gulạnḍge karaheye benao ocokeda. Karahe reakʼ kaṅkha khon kaṅkha hạbicʼ jokha do gel moka tahẽkana, khạndri do mõṛẽ moka ar kaṅkha beṛhaeteakʼ jokha do pegel moka tahẽkana.

³ Karahe reakʼ bahre secʼ beṛhaeteakʼ latarre mimitʼ moka reakʼ jaegare gel goṭecʼkate bar sạrte ḍaṅgrawakʼ muṭhạn tahẽkana. Okaṭakʼ chańch talare karahe benao hoylen ona chańch talarege ḍaṅgrakoakʼ muṭhạn tahẽkante jotoge mitʼṭecʼ jinisge hoyena.

⁴ Karahe do gelbar goṭecʼ pitạlren ḍaṅgrako cetanre doṛom akan tahẽkana. Onko modre pea do utạr secʼ, pea do pạchim secʼ, pea do dạkhin secʼ ar pea do purub secʼko samaṅ akatʼ tahẽkana ar onkoakʼ ṭiki do bhitri secʼ tahẽkana.

⁵ Karahe do pon kạṭupʼ dạriạ tahẽkana. Ona reakʼ kaṅkha do bạṭi reakʼ kaṅkha leka tahẽkana ar sikiyạm baha leka tahẽkana. Onare do turuigel turui hajar liṭar dakʼ sahobokʼ kan tahẽkana.

⁶ Uni do gel goṭecʼ karaheye benao ocokeda ar mõṛẽ goṭecʼ do dạkhin secʼre ar mõṛẽ goṭecʼ do utạr secʼreye dohokeda. Onakore do jeredokʼ samaṅokʼakʼ jiniskoko ạrupʼ saphayetʼ tahẽkana, menkhan naekeko do ona maraṅakʼ karahege akoakʼ ti jaṅga ạbukokʼ lạgitʼko beoharetʼ tahẽkana.

^7-8 Ar okaleka roṛlen onkage uni do gel goṭecʼ sona reakʼ diuhe dohowakʼe benao ocoketʼte koejoṅ oṛakʼ talare dạkhin secʼre mõṛẽ goṭecʼ ar utạr secʼre mõṛẽ goṭecʼe dohokeda. Ona chaḍa uni do gel goṭecʼ ṭebile benao ocoketʼte koejoṅ oṛakʼ bhitrire mõṛẽ goṭecʼ do dạkhinre ar eṭakʼ mõṛẽ goṭecʼ do utạrreye dohokeda. Uni do mitʼsae sona reakʼ bạṭiko hõe benao ocokeda.

⁹ Uni do naekeko lạgitʼ mitʼṭecʼ racae sapṛaokeda; ar ona tayom do ar mitʼṭecʼ maraṅ racae benao ocoketʼte ona lạgitʼ silpińkoe benao ocokeda ar ona silpińko do pitạlteye tol ocokeda.

¹⁰ Ar maraṅ utạrakʼ karahe do raca reakʼ dạkhin purub kona secʼreye dohokeda.

¹¹ Ona chaḍa Hirạm do eṭakʼ eṭakʼ bhajanko, bạṭiko ar kạ̃ṛchukoe benaokeda. Nonkate uni do Isorakʼ oṛakʼ lạgitʼ Solomon raj hotete okako kạmiye ehopʼletʼ onae sạtkeda. Onako do hoyokʼkana:

¹² Barea tham khunṭi, ar onakin cetan reakʼ gulạnḍge barea muthni, ar ona muthni cetanre sajaokʼ lạgitʼ banar sạr noksa akatʼ uńakʼ sikṛiko;

¹³ Ar ona sikṛiko lạgitʼ pon sae ḍạlim jo ar tham khunṭi muthni reakʼ chatna sajao lạgitʼ mimitʼ sạr sikṛi lạgitʼ bar sạr dạlim jo tahẽkana;

¹⁴ karahe ar onako bạisạu lạgitʼ baksa;

¹⁵ maraṅ okocʼ karahe ar ona latarren gelbar goṭen ḍaṅgrako;

¹⁶ karaheko, kạ̃ṛchuko ar jel rakapʼakʼ kạ̃ṛchuko hõ tahẽkana. Hirạm do Solomon rajakʼ hukumte Probhu Isorakʼ oṛakʼ lạgitʼ okako jiniskoe benaoletʼ ona do jhak jhak pitạl reakʼ tahẽkana.

¹⁷ Raj do onako Jordan reakʼ bilạn ṭạnḍire Sukot ar Sorethan tala reakʼ mitʼ jaegare noako jinis do ot reakʼ chãchreye dul benao ocoleda.

¹⁸ Niạko jinis Solomon do nunạkʼ ḍhere benao ocoleda je, onate pitạl reakʼ ojon do baṅ baḍaelena.

¹⁹ Isorakʼ oṛakʼre Solomon do okako jinise benao ocoletʼ onako do hoyokʼkana: sona reakʼ pinḍ; samaṅakʼ piṭhạ dohowakʼ ṭebil;

²⁰ ar okaleka lại hoylen onkage sonot utạrakʼ jaega samaṅre jered lạgitʼ khạṭi sona reakʼ diuhe dohowakʼ ar ona reakʼ diuheko;

²¹ khạṭi sona reakʼ bahako, diuheko ar cimṭạko;

²² sultạ saphae lạgitʼ khạṭi sona reakʼ cimṭạko, sona reakʼ bạṭiko, kạ̃ṛchuko ar seṅgel aṅgra dohoy reakʼ celaṅko; ar bhitri kandha reakʼ, metakʼme sonot utạrakʼ jinis reakʼ duạr lạgitʼ ar mundil oṛakʼ reakʼ maraṅ kandha lạgitʼ sona reakʼ kobjako. Ar duạrko do sonategeye tol ocoakatʼ tahẽkana.