2 Bõsbudạ 32 - সান্তালী বাইবেল

Ạsurren raj Senakeribe bhagao ocokʼkan

¹ Hiskiạ do pạtiạr salakʼ jotowakʼe sạtketʼ tayom Asurren raj Senakerib do hecʼkate Jihudạ cetanre jhãpe emkeda. Uni do pạcrite esetʼ ato ar nagrahakoe gheraokeda, are hudiskeda onako doe jitạujoṅa.

² Hiskiạ doe ńelkeda Senakerib doe seṭer lạgidokʼ kana ar Jerusalem upạrte lạṛhại lạgitʼe mon muruk akada.

³ Unre uni do acʼren subedar ar birbanṭako sãote sopolhakate nagraha bahre reakʼ dakʼ jharnako dhapao esetʼ lạgitʼe goṭakeda. Ar ona kạmire onko do uniko goṛowadea.

⁴ Ḍher hoṛko jarwayente sanam dakʼ jharna ar disạm talate calakʼ kan ạtukʼ dakʼko bondkeda. Onkoko menkeda, “Ạsurren raj hecʼkate cedakʼ nunạkʼ dakʼ doe ńama?

⁵ Hiskiạ do pạcri reakʼ joto rạputʼ akan hĩsko ar usul pahra oṛakʼkoe jut aro ocoketʼteye keṭecʼkeda. Ona chaḍa pạcri bahrete uni do ar mitʼṭecʼ bhite benaokeda ar Dạud nagraha reakʼ Miloye kajakkeda. Uni do ạḍi utạr khanḍa bhanḍa ar ḍhalkoe benao ocokeda.

⁶ Uni do hoṛko cetanre subedarkoe bahalketʼkoa ar nagraha phaṭok duạr ṭhenakʼ phaelao jaegareye jarwaketʼkote niạ menkateye udgạuketʼkoa,

⁷ “Ape do daṛean ar dilanko hoyokʼpe. Ạsurren raj ar uniren saṅge lạṛhại phạdko ńelte alope botorokʼa se alope hadosokʼa, ente uni sãote okoe menakʼko onko khon abo soṅgete okoe menae uni do arhõe maraṅgea.

⁸ Uni sãote do eken manwakoakʼ daṛe menakʼa, menkhan abo goṛowabon lạgitʼ ar abo secʼte lạṛhại lạgitʼ do aboren Probhu Isor menaea.” Hoṛko do Jihudạren Hiskiạ rajakʼ katha ańjomkate uniyakʼ kathareko ṭehãḍena.

⁹ Tayomte Ạsurren Senakerib raj ar uniren sanam lạṛhại phạdko do Lakisko gheraokeda ar adom hoṛ do Jerusalemteye kolkatʼkoa. Uni do Jihudiren Hiskiạ raj ṭhen ar onḍe jarwa akan Jihudạren sanam hoṛko ṭhen noa kathae roṛ gotʼkada,

¹⁰ “Ạsurren raj Senakerib doe meneda, ‘cele cetanrepe ṭehãḍ akante ape do gherao ocoakanre hõ Jerusalemrege menakʼpea?

¹¹ Reṅgecʼ ar tetaṅte jemonpe gujukʼ onate Hiskiạ do niạ kathateye bulạuetʼpea baṅma, aperen Probhu Isorge Ạsurren rajakʼ ti khone bańcaopea mente.

¹² Hiskiạ do cetʼ apnartetʼge ona than boṭkocʼ ar pinḍko bae marao giḍi akada? Jihudạ ar Jerusalemren hoṛko do cetʼ bae menakatʼkoa, eken mitʼṭecʼ pinḍrege sewae hoyokʼa ar ona cetanre dhup do jered hoyokʼa mente?

¹³ “ ‘Eṭakʼ eṭakʼ disạmren sanam jạtrenko lạgitʼ iń ar ińren hapṛamko okaṭakʼle ceka akatʼ ona do cetʼ bape baḍaea? Onko jạtrenkoren debota do cetʼ ińakʼ ti khon akoakʼ disạmko rukhiyạ daṛe akawada?

¹⁴ Noko jạtrenko okoe do ińren hapṛamkoko marao giḍiletʼko onkoren debotako modre okoe do ińakʼ ti khon uniren hoṛkoe bańcao daṛeatʼko tahẽkana? Enḍe khan cekate aperen Isor do ińakʼ ti khon apeye bańcaopea?

¹⁵ Ńitokʼ Hiskiạ do nonka alo baṛeye eṛepe are bulạupe ma. Uni do alope pạtiạuaea, ente jãhãe jạtren se jãhã rajosṭiren debota iń se ińren hapṛamkoakʼ ti khon acʼren hoṛko bae bańcao daṛeakatʼkoa. Enḍekhan tinạkʼ khạṭigea je, aperen debotako do ińakʼ ti khon bako bańcao daṛeapea mente.’ ”

¹⁶ Senakerib ren hoṛko do Probhu Isorren hoṛko ar uniren guti Hiskiạ upạrte arhõ aema kathako roṛkeda.

¹⁷ Ona chaḍa Senakerib do Israelren Probhu Isor opomane lạgitʼte ciṭhire uni upạrte niạ kathae olkeda, “Eṭakʼ eṭakʼ disạmren jạtkoren debotako cetʼleka ińakʼ ti khon akoren hoṛko bako bańcao daṛeakatʼko, ṭhik onkage Hiskiạren Isor hõ ińakʼ ti khon acʼren hoṛko bae bańcao daṛeakoa.”

¹⁸ Ar Jerusalemren okoeko hoṛ do pạcri cetanre tahẽkan onko botor udukʼako lạgitʼ Ibri pạrsite ãṭ aṛaṅte memenko ehopʼena jemon nagrahako dokhol daṛeakʼ.

¹⁹ Onko do manwa titeko benaokʼ dhạrtiren sanam jạtkoren debotako reaṅ okako roṛketʼ onkage Jerusalemren Isor reaṅ hõko roṛkeda.

²⁰ Ona iạte Hiskiạ raj ar Amosren hopon Jesaea do koejoṅ hotete sermaren Isor ṭhen rakʼ joṅkin ehopʼena.

²¹ Onate Probhu Isor do mitʼṭen goḍete kolkedea uni do Ạsurren rajakʼ ḍeraren sanam lạṛhại birko, mukhiyạko ar subedarkoe marao giḍikatʼkoa. Onate Senakerib doe lajaoente apnarakʼ disạmteye ruạṛ calaoena. Ar acʼren debotawakʼ mundilteye boloyen khan unire adom hoponko do uniko gocʼkedea.

²² Nonkate Probhu Isor do Ạsurren raj Senakerib ar eṭakʼ sanamkoakʼ ti khon Hiskiạ raj ar Jerusalemren hoṛkoe rukhiyạketʼkoa. Uni do jotowakʼ secʼ khon nirạiteye dohoketʼkoa.

²³ Ar ḍherkoge Jerusalemre Probhu Isor ńutumte dan-sandesko ạgukeda ar Jihudạ raj do Hiskiạ lạgitʼ damanakʼ sandese ạgukeda. Onate ona okte khon sanam jạtren hoṛko do ạḍiko manotkedea.

Hiskiạwakʼ bạḍại ar ruạ

²⁴ Onako dinre Hiskiạ do gujukʼ dạkhile ruạyena. Ar Hiskiạ do Probhu Isor ṭhene koeketʼ khan Probhu Isor doe roṛ ruạradea ar mitʼṭecʼ hahaṛa cinhại emadea.

²⁵ Menkhan Hiskiạ do monre bạḍại hecʼadea. Uni cetanre cetʼleka bhore ńamketʼ ona leka do bae kạmileda; onate uni cetanre, Jihudạ ar Jerusalem cetanre Probhu Isor doe edreyena.

²⁶ Unre Hiskiạ do acʼakʼ mon reakʼ bạḍạitetʼe bujhạuketʼ khan uni doe nindhạnena ar uni sãote Jerusalemren hoṛko hõ. Ona iạte Hiskiạ oktere Probhu Isorakʼ edre do onkore baṅ hecʼ paṛaolena.

Hiskiạwakʼ dhon-durib ar jak jomok

²⁷ Hiskiạwakʼ do ạḍi utạr dhon-durib tahẽkantaea. Uniyakʼ sona, rupạ, muni, mukta, jut so mosola, ḍhal ar sanam lekan damanakʼ jinisko dohoy lạgitʼ uni do mitʼṭecʼ khajańci oṛakʼe benaokeda.

²⁸ Ona chaḍa anajko, nãwã darkha rasa ar sunum dohoy lạgitʼ hõ murạikoe benao ocokeda ar eṭakʼ eṭakʼ janwar ar bhiḍi-merom dohoko lạgitʼ oṛakʼko hõe benao ocokeda.

²⁹ Uni do apnar lạgitʼ ạḍi utạr atoko ar nagrahakoe benao rakapʼkeda. Uniren ḍaṅgra, bhiḍi, meromkoakʼ lekha do ạḍi ḍher hoyena, ente Isor do ạḍi utạr dhonkoe emade tahẽkana.

³⁰ Hiskiạ do Gihon dakʼ jharna reakʼ nalaye dhapao esetʼketʼte Dạud nagraha reakʼ pạchim secʼte dakʼe idiketʼa. Uni do joto kạmiregeye jo bahayena.

³¹ Disạmre okaṭakʼ hahaṛa kạmi ńellen ona reaṅ kuliye lạgitʼ tinre Babelren mukhiyạko do goḍetko kolkedea unre Isor do uni biḍạue lạgitʼ iạteye bạgi oṭo akade tahẽkana, jemon uniyakʼ monre menakʼakʼ sodorokʼtae.

Hiskiạwakʼ gujukʼ

³² Hiskiạwakʼ eṭakʼ sanam kạmiko reakʼ katha ar Isor botorae reaṅ do Amosren hopon Jesaea nạbiyakʼ dorson puthire ar “Jihudạ ar Israel rapajkoakʼ Itihãs” ńutumanakʼ puthire ol menakʼa.

³³ Tayomte Hiskiạ do acʼren hapṛamko ṭhene senena ar Dạud bõsrenkoakʼ topa ṭạnḍi aṛereko topakadea. Uniye gujukʼ jokhecʼ Jihudạ ar Jerusalemren sanam hoṛ do uniko manotkedea. Ar uniren hopon Manase do uni bodolteye rajena.