2 Bõsbudạ 3 - সান্তালী বাইবেল

¹ Solomon do Jerusalem reakʼ Mạriạ burure Probhu Isorakʼ oṛakʼ benao lạgitʼe ehopʼena. Niạ bururege Jibusiạ Arownakʼ khạrạire Probhu Isor do uniren apat Dạud ṭhene ńel ocolena. Ar Dạud do niạ ṭhạ̃ige koejoṅ oṛakʼ lạgitʼe ṭhik dohoakatʼ tahẽkana.

² Solomonakʼ rajokʼ ponakʼ bochor reakʼ dosar cando reakʼ dosarakʼ dinre Solomon do kạmiye ehopʼkeda.

³ Isorakʼ oṛakʼ benao lạgitʼ uni do jokha lekate turuigel moka jeleń bargel moka osar rehetʼe bạisạukeda.

⁴ Oṛakʼ samaṅ reakʼ pinḍạ reakʼ jokha do osarte bargel moka ar ona reakʼ chat do mitʼsae bargel moka usul benao hoyena ar ona reakʼ bhitritetʼ do khạṭi sonateye dapalkada.

⁵ Oṛakʼ reakʼ asolakʼ kandha do pạhilre saro kaṭ reakʼ toktateye dapalkeda ar ona tayom do khạṭi sonateye tolkeda, ar khijur dare ar sikṛi reakʼ muṭhạnkoe noksawada.

⁶ Ona chaḍa damanakʼ dhirikote uni do oṛakʼe sajaokeda. Okaṭakʼ sonae beoharketʼ ona do Parawayim disạm reakʼ sona tahẽkana.

⁷ Ar bhitkore do Kerubkinakʼ muṭhạne lakʼ rokʼ ocokeda ar ona reakʼ saṅghako, duạr reakʼ ganaḍeko, bhit ar duạr do sonateye tol ocokeda.

⁸ Ona tayom uni do sonot utạrakʼ ṭhạ̃iye benaokeda. Ona do bargel moka osar ar bargel moka jeleńe dohokeda. Ar bhitri do bargel pe ṭon ponsae keji khạṭi sonateye tolkeda.

⁹ Sona reakʼ gojalko do turui sae mõṛẽgel gram ojon tahẽkana. Uni do cetan kandhako hõ sonateye tol ocokeda

¹⁰ Sonot utạrakʼ ṭhạ̃ire uni do Kerubkinakʼ muṭhạne benaokeda ar sonateye tolketʼkinạ.

^11-13 Ar unkin banar Kerubkinakʼ phạ̃kṛạ̃kʼ do mõṛẽ moka jeleń tahẽkana. Mitʼṭen Kerubakʼ phạ̃kṛạ̃kʼ do mitʼ bhitre ar eṭakʼ Kerubakʼ phạ̃kṛạ̃kʼ do eṭakʼakʼ bhitre jakʼ tahẽyena, ar oṛakʼ talare unkinakʼ eṭakʼ phạ̃kṛạ̃kʼ do ạkin ạkinakʼ phạ̃kṛạ̃kʼ jakʼ tiyạkʼ akan tahẽkana. Nukin Kerubkinakʼ phạ̃kṛạ̃kʼ reakʼ jokha do lap lapa akatʼre bargel moka tahẽkana. Unkin do jaṅgatekin teṅgo akan tahẽkana ar mul kandha secʼkin samaṅ akatʼ tahẽkana.

¹⁴ Solomon do nil, beguni, ar arakʼ sutạm ar mĩhĩ musnạ sutạmte orwalkoe benao ocokeda ar onare Kerubkinakʼ muṭhạne rokʼ jalatʼada.

Pitạl reakʼ khunṭikin

¹⁵ Koejoṅ oṛakʼ samaṅre uni do barea tham khunṭiye benaokeda. Onakin do pegel mõṛẽ moka usul tahẽkana. Ar mimitʼ muthni reakʼ jokha do mõṛẽ moka kate tahẽkana.

¹⁶ Uni do uńakʼ sikṛi benaokate tham reakʼ muthnikin cetanreye dohokeda, ar mitʼsae ḍạlim jo benaokate ona sikṛireye gathaoada.

¹⁷ Ona tham khunṭikin do koejoṅ oṛakʼ samaṅ reakʼ mitʼṭecʼ do dạkhinre ar eṭakʼakʼ do utạrreye teṅgo dohokeda. Ar dạkhinre okaṭakʼ tahẽkan ona reakʼ ńutum do Jạkine dohokeda (metakʼme “okoeye bạisạuketʼ ”) ar utạr secʼre okaṭakʼ tahẽkan ona reakʼ ńutum do Boase dohokeda (metakʼme “Onarege daṛetetʼ do”).