2 Bõsbudạ 29 - সান্তালী বাইবেল

Jihudạren Hiskiạ raj

¹ Hiskiạ do bargel mõṛẽ bochor umerre raje hoylena ar Jerusalemre bargel are bochor raje calaokeda. Uniren eṅgatakʼ ńutum do Abi tahẽkana; uni do Sakariạren hoponerae tahẽkana.

² Hiskiạ do acʼren hapṛam Dạud lekage Probhu Isorakʼ mẽtʼre oka bhageakʼkan onageye kạmikan tahẽkana.

Mundil oṛakʼ saphakʼkan

³ Uniyakʼ rajokʼ pạhil bochor reakʼ pạhil candore uni do Probhu Isorakʼ oṛakʼ reakʼ duạrkoe jhicʼkeda are jut arokeda.

⁴ Uni do purub secʼakʼ racare naeke ar Liwiko jarwa ketʼkoteye metatʼkoa,

⁵ “E Liwiko, ińakʼ katha ańjompe; ape do apnarren ar aperen hapṛamkoren Probhu Isorakʼ oṛakʼ saphaepe. Niạ sonot jaega khon sanam besapha jinisko sạṅgiń giḍikakʼpe.

⁶ Aboren hapṛam doko bepạtiạr ocoakana; onko do aboren Probhu Isorakʼ mẽtʼre oka bạṛicʼakʼ kan onageko kạmi akada ar uniko bạgi giḍi akadea. Probhu Isorakʼ tahen oṛakʼ khon eṭakʼ secʼko ghańjeṛ akana ar uniko dea giḍi akadea.

⁷ Onko do pinḍạ reakʼ duạrko bond akada ar diuheko ĩṛĩcʼ akada. Niạ sonot oṛakʼre Israelren Isor ńutumte dhup do bako jeretʼleda se jãhãn jeredokʼ samaṅokʼakʼ hõ bako samaṅleda.

⁸ Onate Jihudạ ar Jerusalem cetanre Probhu Isorakʼ edre do pheḍ hecʼakana. Ape do apnarakʼ mẽtʼtegepe ńeleda onko cetanre botoranakʼ ar jarkharakʼe hoyocoakada; onko ńelte hoṛko do ṭiṭkạri kathako roṛeda.

⁹ Noa iạtege aboren hapṛamko do lạṛhạireko gocʼena ar aboren bạhuko ar koṛa hoponko ar kuṛi hoponkoko bondi ocoakana.

¹⁰ Iń do ńitokʼ Israelren Probhu Isor sãote mitʼṭecʼ bondobos reakʼ iń khojkana jemon uniyakʼ botoranakʼ edre abo cetanre alo paṛaokʼ.

¹¹ E ińren hoponko, ape do ńitokʼ ar alope duṛupʼ hapekokʼa, ente Probhu Isor samaṅre teṅgokʼ ar uniren sapʼ sosoricʼ lekate kạmi ar dhup jered lạgitʼ uni do apegeye bachao dohoakatʼpea.”

¹² Unre onko Liwiko do kạmireko dhurạuena- ar Kohatrenko mod khon Amasiạren hopon Mahat ar Asariạren hopon Joel: Merarirenko mod khon Abdiren hopon Kis ar Jehalelren hopon Asariạ; Gersonrenko mod khon Simaren hopon Joah ar Joahren hopon Edon;

¹³ Elisaphan bõsrenko mod khon Simri ar Jeuel; Ashap bõsrenko mod khon Sekariạ ar Mataniạ;

¹⁴ Hemanren bõsko mod khon Jehuel ar Simại ar Jeduthunren bõsko mod khon Semaya ar Usiyel.

¹⁵ Onko do akoren Liwi boehakoko jarwaketʼkoa ar Probhu Isor ńutumte apnartetʼko begarena. Ona tayom Probhu Isorakʼ hukum leka ar rajakʼ katha leka Probhu Isorakʼ oṛakʼ saphae lạgitʼ bhitriteko boloyena.

¹⁶ Ar onḍe tinạkʼ besaphawakʼ jinisko ńamketʼ onako joto do Probhu Isorakʼ oṛakʼ reakʼ racareko oḍok ạgukeda. Ar Liwiko do Kedron lodamteko oḍok giḍikeda.

¹⁷ Onko sanamkoge pạhil cando reakʼ pạhil hilokʼre Probhu Isorakʼ oṛakʼ sonot lạgitʼko ehopʼena ar irạl din hilokʼ do pinḍạ hạbicʼko hecʼena. Arhõ irạl din hạbicʼ onko do Probhu Isorakʼ oṛakʼko saphakeda ar pạhil cando reakʼ gel turuiyakʼ dinre onako sạtkeda.

Mundil benao arokʼkan

¹⁸ Ona tayom onko do Hiskiạ raj ṭhen senkateko menkeda, “Ale do jeredokʼ samaṅokʼakʼ reakʼ pinḍ ar ona reakʼ bhajanko ar samaṅakʼ piṭhạ dohowakʼ ṭebil ar ona reakʼ jotowakʼ jinisko seletʼ Probhu Isorakʼ oṛakʼle sapha akada.

¹⁹ Probhu Isorre bepạtiạu iạte Ahas raj do acʼakʼ rajokʼ oktere okako jinise badletʼ tahẽkan onako ale do arhõ ṭhik baṛakatele sapha akada. Onako do ńitokʼ Probhu Isorakʼ pinḍ samaṅre menakʼa.”

²⁰ Dosar hilokʼ ạḍi setakʼre Hiskiạ raj do nagraharen maraṅ hudạren kạmiyạkoe jarwaketʼkote Probhu Isorakʼ oṛakʼteye boloyena.

²¹ Onko do rajosṭi lạgitʼ, mundil oṛakʼ lạgitʼ ar Jihudạ hoṛko lạgitʼ kại samaṅokʼakʼ lekate eae goṭen ḍaṅgra, eae goṭen bheḍa, eae goṭen bheḍa hopon ar eae goṭen meromko ạguketʼkoa. Ona tayom raj do naekeko, metakʼme Aronren bõsko Probhu Isorakʼ pinḍ cetanre onko samaṅko lạgitʼe hukumkeda.

²² Naekeko do pạhilre onko ḍaṅgrako gur maṛaṅketʼkote onko mimitʼkoakʼ mãyãm do pinḍreko irciyada; ar ona tayom do bheḍako ar mucạtʼre bheḍa hoponko gurketʼkote onko mimitʼkoakʼ mãyãm hõko ircikeda.

²³ Ona tayom naekeko do kại ńutumte samaṅokʼren meromko raj ar sanam hoṛko samaṅreko ạguketʼkoa jemon onko do onkoakʼ bohokʼre tiko dohoytako.

²⁴ Inạ tayom naekeko do onko meromkoe gurketʼkoa ar sanam Israelkoakʼ kại ńutumte pinḍ cetanre ona mãyãmte kại reakʼ puruchune hoyocokeda. Sanam Israelko lạgitʼ jeredokʼ samaṅokʼakʼ ar kại iạte samaṅokʼakʼ lạgitʼ hukum do rajgeye ematʼko tahẽkana.

²⁵ Dạud raj, ar uniren ńeńelicʼ Gad ar Nathan nạbiyakʼ hukum lekate Hiskiạ raj do Liwikoe metatʼkoa jemon onko do kortal, binạ banam ar peṛesaṅ banamante Probhu Isorakʼ oṛakʼteko bolokʼ. Ar Probhu Isorge acʼren nạbiko hotete niạ hukume emlen tahẽkana.

²⁶ Ona iạte Liwiko do Dạudakʼ bajnako ar naekeko do akoakʼ sakwakoante onḍe senkateko teṅgoyena.

²⁷ Ona tayom Hiskiạ do pinḍ cetanre jeredokʼ samaṅokʼakʼ porob reakʼe hukumkeda. Ar niạ samaṅokʼakʼ porob ehopʼen khan Probhu Isor ńutumte sereń hõko sereńkeda ar ona sãote Israelren raj Dạudakʼ bajna ar sakwa hõko oroṅkeda.

²⁸ Sekʼreń dolko do sereń ar sakwa oroṅko do sakwa oroṅtegeko tahẽyen khan sanam hoṛko do otre taberkate Probhu Isorko ḍobokʼadea. Jeredokʼ samaṅokʼakʼ porob ạuri mucạdokʼ hạbicʼ onkageko hoyocokeda.

²⁹ Ado samaṅokʼakʼko sạten khan raj ar uni sãoten sanamko doko ikhṛumente Probhu Isorko ḍobokʼadea.

³⁰ Hiskiạ raj ar uniren gutiko do Dạud ar ńeńelicʼ Ashapakʼ joṛao akatʼ sereńate Probhu Isor ńutumte oṛhẽ sereń lạgitʼ Liwikoe hukumatʼkoa. Unre onko do kusite sarhao sereńko sereńkeda ar otre ombakʼkateko sewawadea.

³¹ Inạ tayom Hiskiyại menkeda, “Ńitokʼ do Probhu Isor ṭhen apnrartetʼpe emakana. Ape do ńitokʼ hijukʼpe ar janwar samaṅokʼakʼ ar sarhao samaṅokʼakʼ jinisko Probhu Isorakʼ oṛakʼte ạguipe.” Unre sanamkoge onako ạgukeda ar okoe do jeredokʼ samaṅokʼ reakʼko menetʼ tahẽkan onko do ona jiniskoko ạgukeda.

³² Onko do jeredokʼ samaṅokʼakʼ lạgitʼ eaegel ḍaṅgrako, mitʼsae bheḍako ar barsae bheḍa hoponko ạguketʼkoa. Noko do Probhu Isor ńutumte jeredokʼ samaṅokʼakʼren dãṛẽko tahẽkana.

³³ Samaṅokʼ lạgitʼ okoe janwarkoko begar doholetʼko onkoakʼ lekha do turui sae ḍaṅgra ar pe hajar bhiḍi ar meromko tahẽkana.

³⁴ Naekekoakʼ lekha thoṛage tahẽkante onko do jeredokʼ samaṅokʼakʼren sanam janwarkoakʼ harta do bako ur daṛeada; onate kạmi ạuriko sạt hạbicʼ ar eṭakʼ naekeko ạuriko saphakʼ hạbicʼ onkoren Liwi boehako do onkoko goṛowatʼkoa, ente apnar saphakʼ babotre naekeko khon Liwikoge bạ̃ṛtiko moneyakʼkan tahẽkana

³⁵ Sulukren samaṅokʼakʼ reakʼ itil jeredokʼ porob ar jeredokʼ samaṅokʼakʼ reakʼ porob ar ona sãote coḍor samaṅokʼakʼ porobko seletʼ aema samaṅokʼakʼ porobko porobena. Nonkate Probhu Isorakʼ oṛakʼ reakʼ sapʼsor kạmi do arhõ ehopʼena.

³⁶ Isor do acʼren hoṛko lạgitʼ ạḍi usạraye kạmiletʼte Hiskiạ ar sanam hoṛko doko rạskạyena.