2 Bõsbudạ 28 - সান্তালী বাইবেল

Jihudạre Ahas raj

¹ Ahas do bargel bochor umer tahẽkantaere raje hoylena ar Jerusalemre gel turui bochor raje calaokeda. Uniren hapṛam Dạud cetʼ leka Probhu Isorakʼ mẽtʼre bhageakʼe kạmikan tahẽkan onka uni do bae kạmikan tahẽkana.

² Uni do Israelren rajko lekageye calakʼkan tahẽkana ar Bakʼal debota sewawae lạgitʼ chańcre dulakʼ muṭhạne benao ocoleda.

³ Uni do Bin Hinomakʼ buru lodamre dhupkoe jeretʼetʼ tahẽkana ar Probhu Isor do Israelko samaṅ khon okoe jạtrenkoe laga ńirletʼko tahẽkan onkoakʼ bạṛicʼakʼ kạmiko lekage uni hõ acʼren hoponko seṅgelreye samaṅletʼkoa.

⁴ Uni do than boṭkocʼkore, buru cetankore ar mimitʼ hạriạṛ dare buṭạkore janwarkoe dãṛẽyetʼko tahẽkana ar dhupkoe jeretʼetʼ tahẽkana.

Siriạ ar Israelkoakʼ lạṛhại

^5-6 Ona iạtege Probhu Isor do Aram rajakʼ tire uniye jimạkadea. Aramrenko do uniko bhagaokedea ar uniren ḍher hoṛko bondiketʼkote Damesekteko idiketʼkoa. Uni hõ Israelren raj Pekawakʼ tireye jimạ ocoyena. Israelren raj do uniren ạḍi utạr hoṛkoe gocʼketʼkoa. Remaliạ hopon Peka do mitʼ dinte Jihudạren mitʼ lakh bargel hajar lạṛhại phạdkoe gocʼketʼkoa, ente Jihudạren hoṛko do akoren hapṛamkoren Probhu Isorko bạgi giḍi akade tahẽkana.

⁷ Sikri ńutuman Ephrayimren mitʼṭen bir banṭa hoṛ do rajren hopon Makʼaseya ar raj oṛakʼren mukhiyạ Asrikam, ar raj latarrenicʼ Elkana takoe gocʼketʼkoa.

⁸ Israelko do onkoren jạt boehako tala khon maejiuko ar koṛa hoponko ar kuṛi hoponkoko bondi idiketʼkoa. Onkoakʼ lekha do bar lakh tahẽkana. Onko do ḍher jinisko hõ Samariạteko luṭ idikeda.

Oded nạbi

⁹ Probhu Isorren Oded ńutuman mitʼṭen nạbi do Samariạreye tahẽkana. Uni do lạṛhại phạdko tinre Samariạteko ruạṛ hecʼena unre onko sãote ńapamenteye menkeda, “Aperen hapṛamkoren Probhu Isor do Jihudạ upạrteye raṅgaoente onko do apeakʼ tireye jimạketʼkoa. Menkhan raṅgao khạtirte cetʼlekape gocʼketʼko ona katha do serma hạbicʼ seṭer akana.

¹⁰ Ar ńitokʼ ape do Jihudạ ar Jerusalemren hoṛko aperen golam hoyocokope menjoṅkana. Menkhan aperen Probhu Isor ṭhen ape do cetʼ dusipe baṅkana?

¹¹ Ńitokʼ ape do ińakʼ katha ańjompe. Aperen jạt boehako tala khon okoe bondikatepe ạgu akatʼko onko do kol ruạṛkakope, ente Probhu Isorakʼ raṅgao do ape cetanre menakʼa.”

¹² Unre lạṛhại khon okoeko ruạṛ hecʼlen Ephrayimren adom mukhiyạko do onko upạrteko teṅgoyena. Onko mukhiyạko doko hoyokʼkana Johanan hopon Asariạ, Mesillemot hopon Berekiạ, Salumren hopon Jehiskiạ ar Hadlalren hopon Amasa.

¹³ Onkoko menkeda, “Bondi hoṛko do nonḍe alope ạgukoa; arpe ạguleko khan Probhu Isor ṭhen ale hõ dusile hoyokʼa. Aleakʼ kại ar dos sãote cetʼ ape do arhõ jãhãnakʼ jutucʼakʼpe khojkana? Ape dope dusigea ar Probhu Isorakʼ edre hõ Israelko cetanre menakʼtaea.

¹⁴ Unre lạṛhại phạdko do mukhiyạko ar sanam hoṛko samaṅre onko bondiko ar luṭ reakʼ jinisko jimạkeda.

¹⁵ Onko mukhiyạko do unre luṭ reakʼ jinisko khon kicricʼko hataokate bondi akanko modre okoe do uluṅgeko tahẽkan onko sanamko ematʼkoa. Onko do akoakʼ kicricʼko, jomakʼko ar panahekoko ematʼkoa ar onkoakʼ ghaokore sunume dulatʼtakoa. Ar laṅga akanko do gadhakore ladekate Jerikho, metakʼme Khijur nagrahate onkoren hoṛko ṭhenko ruạṛkatʼkoa. Tayomte onko do Samariạteko ruạṛ hecʼena.

Ahas do Ạsurakʼ goṛoy hataoetʼkan

¹⁶ Ona jokhecʼ Ahas raj do goṛo ńam lạgitʼ Ạsurren raj ṭhen hoṛkoe kolketʼkoa.

¹⁷ Niạ reakʼ karon do hoyokʼkana, Edomrenko do arhõ hecʼkate Jihudạ cetanre jhãpko emketʼte hoṛkoko bondi idiketʼkoa.

¹⁸ Ar Philisṭiko hõ buru latar ṭoṭha reakʼ atoko ar Jihudạ reakʼ Negebre arhõ jhãpko emkeda. Onko do Bet-semes, Aijalon, Gederot ar aḍepase reakʼ Soko, Timnạ, ar Gimsoko ạidạriante onḍe girobasokʼ ko ehopʼena.

¹⁹ Ahas raj iạte Probhu Isor do Jihudại copotʼ ocokeda, ente Ahas do Jihudạre bạṛicʼakʼoe ḍher ocokeda ar Probhu Isor sãote hõ bepạtiạranicʼe tahẽkana.

²⁰ Ạsurren raj Tiglat-Pileser do uni ṭhene hecʼlengea menkhan uni do daṛe ocoye bodolteye cipạkedea.

²¹ Unre Ahas do Probhu Isorakʼ oṛakʼ ar raj oṛakʼ khon ar mukhiyạko ṭhen khon mitʼ bar damanakʼ jiniskoe hataoketʼte Asurren raj do khajna menteye emadea, menkhan onate uni do cetʼge baṅ hoylentaea.

Ahasakʼ kại

²² Ahas raj do niạ kosṭo oktere Probhu Isor cetanre artetʼgeye bepạtiạrena.

²³ Uni do Damesekren debotakoko bhagaoledete onko lạgitʼ dãṛẽkoe samaṅketʼkoa. Uni doe hudiskeda, “Aram rajren debotako do onkoko goṛowako kana, onate iń hõ goṛo ńam lạgitʼ onko debotako ṭhen janwariń dãṛẽkoa.” Menkhan onko debotageko hoyokʼkana uniyakʼ ar goṭa Israelre sorbonas hoyokʼ reakʼ karon do.

²⁴ Ahas do Isorakʼ oṛakʼ reakʼ jinisko mitʼ ṭhene jarwaketʼte onakoe makʼ khanḍa khunḍikeda. Ar Probhu Isorakʼ oṛakʼ reakʼ duạrkoe bondkada ar Jerusalem reakʼ goṭa jaegare pinḍkoe benaokeda.

²⁵ Uni do debotako ńutumte dhup jered lạgitʼ Jihudạ reakʼ mitʼke mitʼ nagraha ar atokore than boṭkocʼkoe benao ocoketʼte uniren hapṛamkoren Probhu Isorakʼ edreye rakapʼ ocoketʼtaea.

²⁶ Ahasakʼ eṭakʼ sanam kạmiko reakʼ katha ar uniyakʼ cạl-colonko reakʼ katha do pạhil khon mucạtʼ hạbicʼ “Jihudạ ar Israelkoren rapajkoakʼ Itihãs” ńutumanakʼ puthire ol menakʼa.

²⁷ Tayomte Ahas do acʼren hapṛamko ṭhene calaoena ar Jerusalem nagrahareko topakadea, menkhan Israelkoren rapajkoakʼ topare do bako topaledea. Ar uniyakʼ jaegare do uniren hopon Hiskiạko rajkedea.