2 Bõsbudạ 27 - সান্তালী বাইবেল

Jihudạren Jotham raj

¹ Jotham raj do bargel mõṛẽ bochor umerre raje hoylena ar Jerusalemre gel turui bochor raje calaokeda. Uniren eṅgattetʼakʼ ńutum do tahẽkana Jerusa; uni do Sadokren hoponerae tahẽkana.

² Jotham do uniren apattetʼ leka Probhu Isorakʼ mẽtʼre oka bhageakʼ kan onageye kạmiyetʼ tahẽkana. Ona chaḍa uni do uniren apattetʼ leka do bae bhulleda; dhup jered lạgitʼ Probhu Isorakʼ oṛakʼte do bae bololena. Enhõ hoṛko do bạṛicʼakʼko kạmikan tahẽkana.

³ Jotham do Probhu Isorakʼ oṛakʼ reakʼ cetan senakʼ duạre jut aro ocokeda ar Ophel buru pạcri reakʼ ḍher jaegakoe kajakkeda.

⁴ Uni do Jihudạ reakʼ burukore pạcrite esetʼ atokoe benaokeda ar bir ṭoṭhakore do gaṛkoe benaokeda ar usul pahra oṛakʼko hõe benaokeda.

⁵ Amonikoren raj upạrteye lạṛhạiyente onkoe bhagaoketʼkoa. Onate Amoniko do ona bochor pe hajar are sae keji rupạ, mitʼ hajar irạlsae ṭon guhum ar mitʼ hajar irạlsae ṭon jaoko emena. Dosar ar Tesar bochorre hõ onko do inạkʼkategeko emkeda.

⁶ Nonkate Jotham doe daṛe idiyena, ente uni do pạtiạr salakʼ Probhu Isorakʼ horteye calakʼkan tahẽkana.

⁷ Jothamakʼ eṭakʼ sanam kạmiko reakʼ katha, uniyakʼ sanam lạṛhại reakʼ katha ar uniyakʼ cạl-colonko reakʼ katha do Israelren rapajkoakʼ Itihãs” ńutumanakʼ puthire ol akana.

⁸ Uni do bargel mõṛẽ bochor umerre raje hoylena ar Jerusalemre gel turui bochorre rajena.

⁹ Tayomte Jotham do acʼren hapṛamko ṭhene calaoena ar uni do Dạudakʼ nagrahareko topakadea. Ona tayom uniren hopon Ahas do uniyakʼ jaegare raje hoyena.