2 Bõsbudạ 26 - সান্তালী বাইবেল

Jihudạren Usiạ raj

¹ Ona tayom Jihudạren sanam hoṛko do uniren apatakʼ jaegare Usiạko rajkedea. Unre uniyakʼ umer do gel turui bochor tahẽkana.

² Amasiạ do acʼren hapṛamko ṭhene calaoen khan Usiạ do Elot nagraha arhõe benao rakapʼkeda ar Jihudạ gobolreye ạgukeda.

³ Usiạ do gel turui bochor umerre raje hoylena ar Jerusalemre mõṛẽgel bar bochor raje calaokeda. Uniren eṅgattetʼakʼ ńutum do Jekoliạ tahẽkana; uni do Jerusalemren maejiue tahẽkana.

⁴ Usiạ do acʼren apat Amasiạ lekage Probhu Isorakʼ mẽtʼre oka bhageakʼ kan onageye kạmiyetʼ tahẽkana.

⁵ Sakariạwakʼ oktere uni do Isorakʼ sana lekageye calakʼkan tahẽkana. Sakariạ do Isor botorae reakʼ sopolhae emaekan tahẽkana. Tinạkʼ din Probhu Isorakʼ sana lekae calaoen unạkʼ din Isor hõ uniye jo baha ocoyede tahẽkana.

⁶ Uni do Philisṭiko upạrteye lạṛhạiyena ar Gat, Jabne, ar Asdod reakʼ bhitkoe rạputʼ giḍikada. Ona tayom uni do Asdod ṭoṭhare ar Philisṭikoakʼ judạ judạ jaegare pạcrite esetʼ adomakʼ atoko arhõe benao rakapʼkeda.

⁷ Isor do Philisṭiko, Gurbakʼalre girobasokʼ kan Arabrenko ar Meuniko upạrteye goṛowadea.

⁸ Amonrenko do Usiạ khajnako emaekan tahẽkana. Uni doe daṛe idikʼkan tahẽkante Misor reakʼ simạ hạbicʼ uniyakʼ ńutum do pasnao idiyentaea.

⁹ Usiạ do Jerusalem reakʼ konacʼ duạr ṭhen, sokṛa duạr ṭhen, ar pạcri reakʼ konacre usulge pahra oṛakʼe benaoketʼte onakoe kajakkeda.

¹⁰ Uniren do latar buru ṭoṭhakore ar bilạn ṭạnḍikore ạḍi utạr ạsul janwarko tahẽkantaea; ar onate uni do hahaṅkarre usul usul pahra oṛakʼkoe benaokeda ar aema kuńkoe la ocokeda. Uniren hoṛko do bhage hasareko cas abadetʼ tahẽkana ar burure darkha bagwanko benaoetʼ tahẽkana, ente uni do cas baskoe kusiyakʼkan tahẽkana.

¹¹ Usiạren do gạkhuṛ lạṛhại phạdko tahẽkantaea. Onko do Hananiạ ńutuman mitʼṭen subedar tabereko tahẽkana ar Jeiyel ar Makʼaseya sordar tạkinakʼ lekha lekate onko do mimitʼ dolkate lạṛhại lạgitʼko sapṛao tahenkan tahẽkana.

^12-13 Onkoakʼ lekha do jotote pe lakh eae hajar mõṛẽ sae tahẽkana. Noko lạṛhại birko do bar hajar turui sae bõsren mukhiyạko tabereko tahẽkana.

¹⁴ Usiạ do goṭa lạṛhại phạdko lạgitʼ ḍhal, borlom, bohokʼ aḍokʼakʼ, hoṛmo aḍokʼakʼ, ar akʼ sarko ar ginḍwạriko lạgitʼ do dhirikoe benao ocokeda.

¹⁵ Uni do Jerusalemren gạkhuṛ hoṛkoakʼ benaoakʼ khanḍa bhanḍa do usul pahra oṛakʼkore ar pạcri konac reakʼ cetanreye dohokada jemon onḍe khon sarko tuń daṛeakʼ ar lạṭu lạṭu dhirikoko ṭuṭi daṛeakʼ. Uniyakʼ ńutum do sạṅgiń disạm hạbicʼ pasnaoena. Uni do Isorakʼ daṛe ńamkateye daṛe idiyena.

Usiạwakʼ bạḍại iạteye sạjại

¹⁶ Usiại keṭecʼ idiyen khan uniyakʼ monre bạḍại boloyena ar onate uni doe ńurena. Uni do Probhu Isorakʼ oṛakʼre bolokate dhudhup pinḍre dhup jeredkate Probhu Isor upạrteye kạikeda.

¹⁷ Onate maraṅ naeke Asariạ ar Probhu Isorren irạlgel dilan naekeko do raj tayom tayomte bhitriteko boloyena.

¹⁸ Onko do uni teṅgo daramkedeteko metadea, “E Usiạ, Probhu Isor ńutumte amakʼ dhup jered reakʼ ektiạri do bạnukʼtama. Aronren bõsko, okoe do dhup jered lạgitʼko begar ocoakan, eken onko motoge ạidạri menakʼtakoa. Niạ sonot ṭhạ̃i khon do oḍok calakʼme, ente am dom ghạṭ akada. Noa iạte Probhu Isor do khạṭigeye sạjạimea.”

¹⁹ Ar Usại do ạḍitetʼe raṅgaoena; unre uniyakʼ tire dhup jered lạgitʼ mitʼṭecʼ dhup dạni tahẽkana. Ar Probhu Isorakʼ oṛakʼre dhup pinḍ samaṅre naekeko cetanre tinreye raṅgaoena unre uniyakʼ moloṅre murhucʼ jom rog ńelena.

²⁰ Unre maraṅ naeke Asariạ ar eṭakʼ sanamko do uni secʼko beṅgetʼketʼ khan uniyakʼ moloṅre murhucʼ jom rogko ńelkeda. Onate onko do usạrateko oḍok giḍikadea. Ar acʼhõ usạrate oḍok hijukʼe khojkeda, ente Probhu Isor do uniye ńẽtʼakade tahẽkana.

²¹ Usiạ raj do ạuriye gujukʼ hạbicʼ uniyakʼ do murhucʼ jom rog tahẽkana. Uni do mitʼṭecʼ begar oṛakʼreye girobasokʼ kan tahẽkana, ente Probhu Isorakʼ oṛakʼ khone getʼ begar ocoakan tahẽkana. Onate rajakʼ bhar do acʼren hopon Jotham cetanreye paṛaoena.

²² Usiạwakʼ eṭakʼ eṭakʼ kạmiko reakʼ katha do pạhil khon mucạtʼ hạbicʼ Amosren hopon Jisại nạbiye ol dohokeda.

²³ Tayomte Usiạ do acʼren hapṛamko ṭhene calaoena. Ar uni do rapajkoakʼ topa aṛe reakʼ mitʼṭecʼ ṭhạ̃ire uniren hapṛamko sãoteko topakadea, ente hoṛkoko menkeda, “Uni do murhucʼ jom rog hoṛe tahẽkana.” Ar uniyakʼ jaegare uniren hopon Jotham do raje hoyena.