2 Bõsbudạ 25 - সান্তালী বাইবেল

Jihudạren Amasiạ raj

¹ Amasiạ do bargel mõṛẽ bochor umerre raje hoylena ar Jerusalemre bargel are bochor raje calaokeda. Uniren eṅgatakʼ ńutum do Jehoyadin tahẽkana; uni do Jerusalemren maejiue tahẽkana.

² Uni do Probhu Isorakʼ mẽtʼre okaṭakʼ bhageakʼkan onageye kạmiyetʼ tahẽkana tobe goṭa monte do bae kạmikan tahẽkana.

³ Ado acʼakʼ tire rajosṭi keṭecʼen khan okoekin guti do, metakʼme uniren apattetʼkin gocʼlede uni hõ unkine gocʼketʼkinạ.

⁴ Menkhan unkinren hoponko do bae gocʼletʼkoa bickom Moseyakʼ puthi reakʼ ạnre oka ol tahẽkan ona lekageye kạmikeda. Ona puthire Probhu Isorakʼ hukum niạ hukum ol tahẽkana, “Gidrạkoakʼ kại gunạkʼte apat se apatakʼ kại gunạkʼte gidrạko do bako gocʼ ocokʼa, menkhan mimitʼko do apnarakʼ kại gunạkʼtege gujukʼ hoyokʼtakoa.”

Edom birudre lạṛhại

⁵ Amasiạ do Jihudạren sanam hoṛkoe hoho jarwaketʼkote bõsko lekate goṭa Jihudạ ar Benjạminren hoṛko mod khon hajarko cetanren subedarko ar saeko cetanren lạṛhại phạdkoren subedarko do gobolreye dohokatʼkoa. Uni do bargel bochor se arhõ bạ̃ṛti umerren hoṛko lekha kateye ńelketʼkoa, pe lakh hoṛ do lạṛhạite oḍok calakʼ leka menakʼkoa ar onko do borlom ar ḍhalko beohar daṛeakʼa.

⁶ Uni do pe hajar are sae keji rupạte Israel khon mitʼ lakh birbanṭae bhaṛa ạguketʼkoa.

⁷ Menkhan Isorren mitʼṭen hoṛ do hecʼente uniye metadea, “E maharaj, Israelren noko lạṛhại phạdko do am sãote jemon aloko calakʼ, ente Probhu Isor do Israelko sãote, metakʼme Ephrayimko sãote hõ bạnuya.

⁸ Onkom idi torako ar dil salakʼem lạṛhạilen khan hõ bạiriko ṭhen Isor doe bhagao ocomea, ente jitạu ocome se bhagao ocome reakʼ dare do eken Isorakʼge menakʼtaea.”

⁹ Unre Amasiạ do Isorren hoṛe metadea, “Noko Israelren lạṛhại phạdko lạgitʼ iń oka pe hajar are sae rupạń emakatʼ ona reakʼ do cetʼ hoyokʼa?” Isorren hoṛe roṛ ruạṛkeda, “Isor do ona khon hõ bạ̃ṛtiye em daṛeama.”

¹⁰ Unre Amasiạ do Epharyim khonko hecʼlen lạṛhại phạdkoe bidạkatʼkote oṛakʼteye kolgotʼkatʼkoa. Onko lạṛhại phạdko do Jihudạren hoṛko cetanre ạḍitetʼko edreyente oṛakʼteko ruạṛ calaoena.

¹¹ Amasiạ do dilkate buluṅ doreãore acʼren lạṛhại phạdkoe ạyurketʼkoa. Ar Seyirren gel hajar hoṛe gocʼketʼkoa.

¹² Jihudạren lạṛhại phạdko do arhõ gel hajar hoṛ jiwetʼteko sapʼketʼkoa ar buru muthnire idikate latarteko ṭhelao ńurketʼkoa. Ar onko sanamgeko talga tạuạkʼena.

¹³ Ar okoe lạṛhại phạdko do Amasiại kol ruạṛletʼko tahẽkan onko do Samariạ khon Bet-horon hạbicʼ Jihudạ reakʼ sanam ato ar nagrahako akromonkeda. Onko do pe hajar hoṛko gocʼketʼkoa ar ạḍi utạr jinisko luṭ idikeda.

¹⁴ Amasiạ do Edomrenko gocʼkateye ruạṛ hijukʼkan tahẽkanre Seyirren hoṛko do boṅgakoko idi toraketʼkoa. Ar onko do acʼren debotako menkateye dohoketʼkote onko sewawako ar onko ńutumte dhup jeretʼe ehopʼena.

¹⁵ Noa iạte Probhu Isor do Amasiạ cetanreye edreyena. Uni do mitʼṭen nạbiye kolkedea. Uni nạbiye menkeda, “Onko hoṛkoren debotako okoe do amakʼ ti khon bako bańcao daṛeatʼko onkoakʼ goṛo do cedakʼem khojkana?”

¹⁶ Nạbiyakʼ katha ạuri mucạdokʼrege raj do uniye metadea, “Ale do cetʼ rajren sosolhayicʼ menkate amle bahal akatʼmea? Thirokʼme, ar baṅ khan am dom gocʼ ocokʼa.” Onate nạbi doe thirena, ar enhõe menkeda, “Ińiń baḍaea, am do noam kạmi akada ar ińakʼ sopolha bam luturatʼte Isor do ame maraome lạgitʼe goṭa akada.”

Israelko birudre lạṛhại

¹⁷ Tayomte Jihudạren raj Amasiạ do acʼren sopolhako sãoteye galmaraoketʼte Jehuren goṛomtetʼ koṛa, metakʼme Jehoahas ṭhene roṛ gotʼkada, “Dela, hijukʼme mẽtʼ mẽtʼ laṅ beṅgetʼange.”

¹⁸ Menkhan Israelren raj do Jihudạren raj ṭhen kathae roṛ gotʼkada, “Lebanon reakʼ aṭkuṭi jạnum do Lebanon reakʼ debdạru dare ṭhen kathae roṛ gotʼkada, ‘ińren koṛa sãote amren hoponera baplayem.’ Ona tayom Lebanonren mitʼṭen bir janwar do hecʼkate aṭkuṭi jạnumkoe lebetʼ gańjao oṭokada.

¹⁹ ‘Edomrenkoń ńẽtʼ akatʼkoa,’ noa katha mone monete hudiskate am do gorbotem phulạu akana. Ńitokʼ do apnarakʼ oṛakʼre tahenme. Cedakʼ muhin dom hoho ạgujoṅkana ar ona sãote Jihudạ reakʼ maraokʼ hõ?”

²⁰ Menkhan Amasiạ do ona katha bae luturada. Noa do Isor khon hoyena, ente hoṛko do Edomren debotakoakʼ goṛoko khojletʼte Isor do Jehoahasakʼ tire onkoe jimạletʼkoa.

²¹ Ona iạte Israelren raj Jehoahas do onkoe akromonketʼkoa. Uni ar Jihudạren raj Amasiạ do Jihudạ reakʼ Bet-Semesrekin samna sạmniyena.

²² Israelko ṭhen Jihudạ doko bhagao ocoyena ar onko mimitʼko do apan ạpin oṛakʼte dạṛ pạnḍucʼkeda.

²³ Israelren raj Jehoahas do Bet-Semesre Ahasiaren goṛomtetʼ koṛa, metakʼme Joasren hopon Jihudạren raj Amasiại bondikedea. Ona tayom Jehoahas do Jerusalemte senkate onḍenakʼ pạcri reakʼ Ephrayim duạr khon konac reakʼ duạr hạbicʼ ponsae moka jeleń bhite rạputʼkeda.

²⁴ Ar Isorakʼ oṛakʼ reakʼ joto sona rupạ ar jinisko reakʼ bhar do Obed-Edom cetanre tahẽkan ona jotowakʼge uni doe idikeda. Ona chaḍa uni do raj oṛakʼ reakʼ dhon durib ar jạmin menkate adom hoṛkoe iditoraketʼkote Samariạteye ruạṛ calaoena.

²⁵ Israelren raj Jehoahasren hopon Jehoasakʼ gujukʼ tayom Jihudạren raj Joasren hopon Amasiạ do arhõ gelmõṛẽ bochor jiwetʼe tahẽkana.

²⁶ Amasiạwakʼ eṭakʼ eṭakʼ kạmi reakʼ katha do pạhil khon mucạtʼ hạbicʼ “Jihudạ ar Israelren rapajkoakʼ Itihãs” ńutumanakʼ puthire ol menakʼa.

²⁷ Amasiạ do Probhu Isorakʼ hor khone ocokʼen khan hoṛko do Jerusalemre uni upạrteko soṛojontrokeda. Onate uni do Lakisteye dạṛkeda, menkhan hoṛko do Lakhiste hoṛ kolkate onḍeko gocʼkedea.

²⁸ Uniyakʼ mạ̃ṛĩ do sadomre ladekate Jihudạ reakʼ nagrahateko ạgukeda ar uniren hapṛamko sãoteko topakadea.