2 Bõsbudạ 24 - সান্তালী বাইবেল

Mundil jut arokʼkan

¹ Eae bochor umerre Joas do raje hoyena ar Jerusalemre pongel bochor raje calaokeda. Uniren eṅgat reakʼ ńutum do Sibiạ; uni do Ber-seba nagraharen hoponerae tahẽkana.

² Jehoyada naeke jiwetʼe tahekan bhorge Joas do Probhu Isorakʼ oṛakʼre oka bhage tahẽkan onageye kạmiyetʼ tahẽkana.

³ Jehoyada do bareyae bạhuade tahẽkana ar uniren koṛa hopon ar kuṛi hoponko hoyentaea.

⁴ Tayomte Joas do Probhu Isorakʼ oṛakʼ jut aroe lạgitʼe mon murukkeda.

⁵ Uni do naeke ar Liwiko hohoatʼkoteye metatʼkoa, “Isorakʼ oṛakʼ jut aroe lạgitʼ sanam Israelko ṭhen khon khajna uṭhạu lạgitʼ Jihudạ reakʼ sanam ato ar nagrahakote calakʼpe. Ar niạ kạmi do usạra kạmipe.” Menkhan Liwiko do bako usạraleda.

⁶ Onatege raj do maraṅ naeke Jehoyada hoho ạgukedeteye metadea, “Goha tạmbu lạgitʼ Probhu Isorren guti Mose do Israelko cetanre oka khajnae ṭhik dohoakatʼ ona Jihudạ ar Jerusalem khon uṭhạu lạgitʼ Liwiko do cedakʼ bam kolletʼkoa?”

⁷ Uni bạṛicʼ maejiu Athaliạren hoponko do Probhu Isorakʼ oṛakʼ rạputʼkateko bololena ar sonotakʼ jinisko Bakʼal debotawakʼ pujạ lạgitʼko beoharleda.

⁸ Rajakʼ hukum leka mitʼṭecʼ dan baksa benaokate Probhu Isorakʼ oṛakʼ reakʼ phaṭok duạr bahrere doho hoyena.

⁹ Ona tayom Jihudạ ar Jerusalemre mitʼṭecʼe lại sodorkeda, Isorren guti Mose hahaṅkarre Israelko cetanre oka khajnae bharatʼko tahẽkan hoṛko do onkage jemon Probhu Isor ṭhenko ạguy.

¹⁰ Onate mukhiyạko ar hoṛko do kusite akoakʼ khajna ạgukate ona dan baksare dohoko ehopʼena; ar onate dan baksa do perejokʼ ehopʼena.

¹¹ Liwiko do dinạm hilokʼ ona dan baksa do rajren kạmiyạko ṭhenko idiyetʼ tahẽkana. Ar tinre ona perejokʼkan tahẽkana unre rajren olokʼicʼ ar maraṅ naekeren kạmiạyicʼ do ona dan baksakin khạliyetʼ tahẽkana ar ona tayom do arhõ ona jaegarekin dohokakʼ kan tahẽkana.

¹² Okoe cetanre Probhu Isorakʼ oṛakʼ jut aroe reakʼ bhar tahẽkan raj ar Jehoyada do onkoakʼ tire onako ṭakakin jimạwakʼkoa. Ar onko do Probhu Isorakʼ oṛakʼ arhõ jut aroe lạgitʼ rajmistriko ar kaṭmistriko ar mẽṛhẽtʼ ar pitạlren kạrigolko kạmireko dohoketʼkoa.

¹³ Ar okoe do jut aroe reakʼko kạmikan tahẽkan onko do ạḍiko khaṭaokʼkan tahẽkana, ar onkoakʼ kạmi do laha idikʼkan tahẽkana. Isorakʼ oṛakʼ do lahate lekako hoyocokeda ar ona do ạḍi keṭecʼ hoyena.

¹⁴ Kạmi mucạtʼkate sarecʼ ṭaka do raj ar Jehoyada ṭhenko ạgukeda ar ona ṭakate Probhu Isorakʼ oṛakʼ reakʼ niạko jinisko benao ocokeda: ona do sewa kạmire ar jeredokʼ samaṅokʼakʼ lạgitʼ jinisko, kạṛchuko ar eṭakʼ eṭakʼ sona ar rupạ reakʼ jinisko benao ocokeda. Ar tinạkʼ din Jehoyada jiwetʼe tahẽkan unạkʼ din Probhu Isorakʼ oṛakʼre jaoge jeredokʼ samaṅokʼakʼ reakʼ porobko porobokʼkan tahẽkana.

¹⁵ Jehoyada doe haṛamena ar dinte purungeye tahẽkana ar mitʼsae pegel bochor umerreye gocʼena.

¹⁶ Israelko modre Isor ar uniyakʼ oṛakʼ lạgitʼ bhageakʼe kạmiletʼte uni do Dạudakʼ nagrahare rapajko sãoteko topakedea.

Joasakʼ bạṛicʼ kạmiko

¹⁷ Jehoyada gujukʼ tayom Jihudạren mukhiyạko do hecʼkate rajko ḍobokʼadea ar raj do onkoakʼ kathae ańjomkeda.

¹⁸ Onko do akoren hapṛamkoren Probhu Isorakʼ oṛakʼ bạgikate Asera-muṭhạn ar boṅgako sewawakoko ehopʼena. Onkoakʼ niạ kại iạte Isorakʼ edre do Jihudạ ar Jerusalem cetanre paṛaoena.

¹⁹ Probhu Isor do hoṛko acʼ ṭhen ruạṛ ạguko lạgitʼ nạbikoe kolletʼkoa ar hoṛkoe sontorketʼkore hõ onko do bako ańjomleda.

²⁰ Unre Isorren jiu do Jehoyada naekeren hopon Sekariạ cetanreye decʼena. Uni do hoṛko samaṅre teṅgoyenteye menkeda, “Isor do niạ kathae meneda, ‘Probhu Isorakʼ hukum do cedakʼpe bemanot akada? Ape do bape jo bahakʼa. Ape do Probhu Isorpe bạgi akadete uni hõ apeye bạgi giḍi akatʼpea. ”

²¹ Menkhan hoṛko do Sakariạ upạrteko soṛojontrokeda ar rajakʼ hukumte Probhu Isorakʼ baker racare dhiriteko tiń gocʼkedea.

²² Sakariạren apattetʼ Jehoyada do Joas ṭhen oka pạtiạrtetʼe udukʼletʼ Joas do ona bae disạletʼte uniren hopone gocʼ ocokedea. Sakariạ do gujukʼ jokhecʼe menleda, “E Probhu niạ baṛe hala ruạṛme.”

²³ Dosar bochor Aramren lạṛhại phạdko do Joas upạrteko hecʼena. Onko do Jihudạ ar Jerusalemko akromonketʼte joto mukhiyạko gocʼ cabaketʼkoa ar Damesekre akoren raj ṭhen luṭ reakʼ sanamakʼ jinisko kolkeda.

²⁴ Jihudạren hoṛko do akoren hapṛamkoren Probhu Isorko bạgiyade tahẽkante Aramren lạṛhại phạdko do thoṛageko tahẽkanre hõ Probhu Isor do maraṅ lạṛhại phạdko onkoakʼ tireye jimạkatʼkoa. Nonkate Aramrenko hotete Joas doe sạjại ocoyena.

²⁵ Ar Aramrenko do Joas raj ghạlgeko bạgi oṭoadea. Joas do naeke Jehoyadaren hopone gocʼ ocoledete uniren gutiko hõ uni upạrte soṛojontrokate aṭetʼregeko gocʼkedea. Are gocʼen khan uni do Dạud nagrahareko topakadea, menkhan rapajkoakʼ topare do bako topaledea.

²⁶ Ar okoekin guti do raj upạrtekin soṛojontroletʼ tahẽkan unkin dokin hoyokʼkana Simeat ńutuman Amoni maejiuren hopon Sabad ar Simrit ńutuman mitʼṭen Moabi maejiuren hopon Jehosabad.

²⁷ Joasren hoponkoakʼ biboron, ar uni reaṅ ạḍi utạr nạbi katha ar Isorakʼ oṛakʼ jut aroe reakʼ katha do “Rapajkoakʼ Itihãs ńutuman puthire ol menakʼa. Ona tayom uniyakʼ jaegare uniren hopon Amasiạ do raje hoyena.