2 Bõsbudạ 23 - সান্তালী বাইবেল

Athaliah upạrte hul

¹ Eaeakʼ bochorre Jehoyada do apnartetʼe daṛeyente Jehoramren hopon Asariạ, Jehohanan hopon Ismael, Obedren hopon Asariạ, Adayren hopon Maseya ar Sikri hopon Elisaphat teko sãote mitʼṭecʼ bondobose bandhaokeda. Noko sanamkoge sae saeko cetanren subedarko tahẽkana.

^2-3 Noko do Jihudạ reakʼ sanam jaegare senkate sanam nagraha ar atoko khon Liwiko ar Israelkoren sanam bõsren mukhiyạkoe jarwa mitʼketʼkoa. Onko do Jerusalemte hecʼkate jotoko mitʼdomte Isorakʼ oṛakʼre Joas raj tulucʼ mitʼṭecʼko bondoboskeda. Jehoyada do onkoe metatʼkoa, “Dạudren bõsko babotre Probhu Isor okaṭakʼe gokʼ akatʼ ona lekate rajren hoponge rajosṭi doe calaoa.

⁴ Ńitokʼ apeakʼ kạmi do hoyokʼa: okoeko naeke ar Liwiko jirạukʼ mãhãre mundilreko kạmi onkoren pe hạṭiń reakʼ mitʼ hạṭińrenko do phaṭok duạrpe horhoea,

⁵ pe hạṭiń reakʼ dosar hạṭińrenko do raj oṛakʼpe pahraea ar pe hạṭiń reakʼ tesar hạṭińrenko do asolakʼ duạr ṭhenpe tahena ar sarecʼ sanamko do Probhu Isorakʼ oṛakʼ reakʼ bakher racareko tahena.

⁶ Naekeko ar sapʼsosor kạmire tahen Liwiko chaḍa ar okoe hõ Probhu Isorakʼ oṛakʼre do bako bolokʼa. Onko doko bolokʼa, ente onko do Isor ńutumteko begar doho ocoakana, menkhan eṭakʼ sanam hoṛko do Probhu Isorakʼ hukum leka bahrereko tahẽna.

⁷ Ar Liwiko do apan ạpin khanḍa bhanḍa sapʼkate raj beṛhaeteko tahena. Ar jãhãege mundil oṛakʼteye bolokʼ unigeye gocʼ ocokʼa. Ar jãhãtege raje calakʼ onḍege ape do uni sopor soporpe tahena.”

⁸ Naeke Jehoyada okae hukumketʼ Liwiko ar Jihudạren sae sae cetanren subedarko do onkageko kạmikeda. Subedar do jotoge apan ạpin hoṛko, metakʼme jirạukʼ mãhãre okoe do pạli bodolko hecʼlen ar okoe do kạmi khonko ruạṛ calakʼkan tahẽkan onkoko ạguketʼkoa. Onko dolren okoehõ naeke Jehoyada do chuṭi bae ematʼkoa.

⁹ Dạud rajakʼ okako borlom, kạṭicʼ ar lạṭu ḍhalko Probhu Isorakʼ oṛakʼre tahẽkan onako hataokate uni do subedarkoe ematʼkoa.

¹⁰ Raj rukhiyạye lạgitʼ Jehoyada do noko hoṛko khanḍa bhanḍa sapʼkate mundil oṛakʼ samaṅ reakʼ pinḍ ṭhen dạkhin secʼ khon utạr secʼ hạbicʼe teṅgoketʼkoa.

¹¹ Ona tayom Jehoyada ar uniren hoponko do rajren hoponko oḍok ạgukedete uniyakʼ bohokʼre mukuṭko horokʼadea. Onko do uniyakʼ tire bondobos reakʼ puthiko caladea ar raj menteko ojokʼ bahalkedea. Unre hoṛko do ãṭ aṛaṅte hohoateko menkeda, “Maharaj do jiwetʼe tahenma.”

¹² Athaliạ do hoṛkoakʼ ńir baṛae ar rajko sarhaoede reakʼ hoho ańjomkate Probhu Isorakʼ oṛakʼte onko ṭhene calaoena.

¹³ Uni doe ńelkeda, Probhu Isorakʼ oṛakʼte bolokʼ reakʼ horre raj do acʼakʼ khunṭi ṭhene teṅgo akana ar subedarko ar sakwa okʼroṅko do raj beṛhaeteko teṅgoakana. Ar disạmren sanam hoṛ doko rạskạkʼ kana ar sakwako oroṅeda ar sekʼreńko do bajnawateko sereńeda. Noa ńelte Athaliạ do acʼakʼ kicricʼe oṛecʼketʼte ãṭ aṛaṅteye menkeda, “Hul! hul!”

¹⁴ Unre Jehoyada naeke do lạṛhại phạdko cetanreye bahal akatʼko subedarko bahrete hohowatʼkoteye metatʼkoa, “Uni do lạṛhại phạdkoakʼ sạr tala talate oḍok idiyepe. Ar okoe uni tayomteye hijukʼ uni hõpe gojeya.” Niạ lahare uni doe hukumatʼko tahẽkana, Probhu Isorakʼ oṛakʼ talare Athaliạ goje do baṅ ṭhika.

¹⁵ Onate onko do Athaliạko sapʼkedea ar raj oṛakʼ reakʼ sadom duạrte bolokʼ horre idikateko gocʼkedea.

Jehoyadawakʼ kạmiko

¹⁶ Ona tayom Jehoyada do hoṛko ar raj talare bondoboskoe bandhaokeda, onko do Probhu Isorren hoṛko tahena.

¹⁷ Ona tayom sanam hoṛko do Bakʼal debotawakʼ mundilte bolokate murtiko rạputʼ giḍikatʼkoa. Onko do pinḍ ar murtikoko rạputʼ gejerketʼkoa. Ar Bakʼal debotaren naeke Matan do pinḍ samaṅregeko gocʼkedea.

¹⁸ Ona tayom Jehoyada do Probhu Isorakʼ oṛakʼ ńel todarot reakʼ bhar do naekekoakʼ tireye jimạkeda. Noko do Liwiko tahẽkana. Noko cetanrege Dạud do Probhu Isorakʼ oṛakʼ reakʼ bhare emleda jemon onko do Dạudakʼ hukum leka rạskạ salakʼ sereń sereńte Moseyakʼ ạn-ạri lekate Probhu Isor ńutumte jeredokʼ samaṅokʼakʼ reakʼ porobko porob daṛeakʼ.

¹⁹ Ar jãhãe besapha hoṛko jemon aloko bolo daṛeakʼ onate uni do Probhu Isorakʼ oṛakʼ reakʼ phaṭokʼkore rurukhiyạkoe dohoketʼkoa.

²⁰ Jehoyada do subedarko, lekman hoṛko, mukhiyạko ar disạmren sanam hoṛko soṅgekate Probhu Isorakʼ oṛakʼ khon raje oḍok ạgukedea. Onko do cetan duạr secʼte raj oṛakʼteko boloyena ar raj do siṅghạsonreye duṛupʼena.

²¹ Athaliyại gocʼ ocoyen khan nagraha do nijhumena ar disạmren sanam hoṛko rạskạyena.