2 Bõsbudạ 22 - সান্তালী বাইবেল

Jihudạren Ahasiạ raj

¹ Jerusalemren hoṛko do Jehoramren huḍińicʼ hopon Ahasia do apattetʼakʼ jaegareko rajkedea, ente luluṭko do Arabrenko sãote luluṭ hecʼkate Jehoramren sanam hoponkoko gocʼletʼkoa. Onatege Jihudạren raj Jehoramren hopon Ahasiạ do rajokʼe ehopʼena.

² Ahasiạ do bargel bar bochor umerre raje hoylena ar mitʼ bochor Jerusalemre raje calaokeda. Uniren eṅgatakʼ ńutum do Athaliạ tahẽkana; uni do Omriren goṛomtetʼ kuṛiye tahẽkana.

³ Ahasiạ hõ Ahabakʼ bõsren hoṛkoakʼ hortegeye taṛametʼ tahẽkana, ente uniren eṅgattetʼ do bạṛicʼakʼ kạmi lạgitʼ sopolhae emaekan tahẽkana.

⁴ Ahasiạ do Ahabakʼ bõsren hoṛko lekage Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana, ente uniren apatakʼ gujukʼ tayom ona bõsren hoṛkoge uni do sopolhako emaekan tahẽkana. Onate uni doe ńurena.

^5-6 Onkoakʼ sopolha leka uni do Israelren Ahab rajren hopon Jehoram sãote Ramot-gileadte Aramren raj Hosael upạrte lạṛhại lạgitʼe oḍok calaoena. Unre Aramrenko do Jehoramko ghạlkedea. Ar ona ghạl khon bogekʼ lạgitʼ Jehoram do Jisriyelteye ruạṛ calaoena. Ahabren hopon Jehoram doe ghạl akan tahẽkante Jihudạren raj Jehoramren hopon Ahasiạ do uni ńele lạgitʼ Jisriyelteye calaoena.

⁷ Ar noa hotete Isor do Ahasiại ńur ocokedea. Ahasiạ do onḍe seṭerkate Joram sãote Nimsiren hopon Jehu upạrte lạṛhại lạgitʼe calaoena. Nui Jehuge Probhu Isor do Ahabakʼ bõsko ḍahao marao lạgitʼe bahalledea.

⁸ Jehu do tinre Ahabakʼ bõsren hoṛkoe sạjạiyetʼko tahẽkana unre uni do Ahasiạren gokʼṛoko Jihudạren mukhiyạko ar uniren sanam boehakoren hoponkoe ńelńamketʼko khan onkoe gocʼketʼkoa.

⁹ Ona tayom uni do Ahasiạ sendraye lạgitʼe oḍokena. Ahasiạ do unre Samariạreye oko akan tahẽkana ar hoṛko do uniko sapʼkedete Jehu ṭhen idikateko gocʼkedea. Arko topakadea, ente onkoko metade tahẽkana, “Nui do Jehosaphat ren goṛomtetʼ koṛa kanae uni do goṭa ontorte Probhu Isorakʼ sana lekae calakʼkan tahẽkan.” Ar Ahasiạwakʼ bõsre raj hoyokʼ leka ektiạri do okoeyakʼge baṅ tahẽkana.

Athaliạ ar Joas

¹⁰ Ahasiạren eṅgattetʼ do tinreye ńelkeda acʼren hopon doe gocʼ ocoyena unre uni do Jihudạ rajren sanam hoponkoe gocʼ giḍikatʼkoa.

^11-12 Menkhan sanam raj hoponko ạuriko gocʼ ocokʼre Jehoram rajren hoponera Ahasiạren misera Jehosaba do Ahasiạren hopon Joase kombṛo idikedea. Ar Athaliạ ṭhen khon okore dohoye lạgitʼge Jehosaba do Joas ar uniren jokʼtonicʼ mitʼṭecʼ oṛakʼreye dohokatʼkinạ. Onate Athaliạ do uni bae gocʼ daṛeadea. Jehosaba do naeke Jehoyadaren bạhui tahẽkante Athaliạ oka turui bochor disạmreye rajokʼkan tahẽkan onako dinre Joas do Isorakʼ oṛakʼre okogeye tahẽyena.