2 Bõsbudạ 21 - সান্তালী বাইবেল

¹ Tayomte Jehosaphat do acʼren hapṛamko ṭhene calaoena ar Dạudakʼ nagrahare uniren hapṛamko sãoteko topakadea. Ar uni bodolte uniren hopon Jehoram do raje hoyena.

Jihudạren Jehoram raj

² Uniren boehako, metakʼme Jehosaphatren hoponkoakʼ ńutum do nonka leka tahẽkana, Asaria, Jehiyel, Sekariạ, Asaria, Mikayel ar Sephatiạ. Noko sanamkoge Israelren raj Jehoshapatren hoponko tahẽkana.

³ Onkoren apattetʼ do sona, rupạ, ar damanakʼ jinisko ar Jihudạ disạmre pạcrite esetʼ ato ar nagrahakoe ematʼkoa, menkhan Jehoram do maraṅicʼ hopone tahẽkante uni do rajosṭiye emade tahẽkana.

⁴ Jehoram do acʼ apattetʼakʼ rajosṭi apnar gobolreye ạguketʼteye keṭecʼkeda. Uni do acʼren sanam boehako ar Israelren adom adom lạṭu hudạren hoṛkoe gocʼketʼkoa.

⁵ Jehoram do pegel bar bochor umer tahẽkantaere raje hoylena ar Jerusalemre irạl bochor raje calaoketʼa.

⁶ Ar Ahabakʼ bõsren hoṛko lekage uni do Israelren rajkoakʼ horteye calakʼkan tahẽkana, ente uni do Ahabren mitʼṭen hoponerae baplaledea. Ar Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana.

⁷ Enhõ Probhu Isor do Dạud lạgitʼ okae bondobose bandhaoletʼ onate uniyakʼ bõsko do bae marao utạrleda. Uni do Dạud ar uni bõsrenko jaejug lạgitʼ mitʼṭecʼ mạli emakoa menteye gokʼletʼ tahẽkana.

⁸ Jehoram oktere Edom disạmren hoṛko do Jihudạ upạrte hulkate ako lạgitʼ mitʼṭenko rajkedea.

⁹ Onate Jehoram do acʼren subedarko ar rãt gạḍikoante onḍeye senena. Ar Edomrenko do uni ar uniyakʼ rãt gạḍiren subedarkoko gherao esetʼketʼkoa, menkhan uni do ńindạ jokhecʼ beretʼente Edomrenko ar onkoren rãt gạḍiren mukhiyạkoe ńẽtketʼkoa.

¹⁰ Onate Edomrenko do teheń hạbicʼ Jihudạ upạrteko bhiṅgṛạu akana. Jehoram do acʼren hapṛamkoren Probhu Isore bạgi akawade tahẽkante Libnarenko hõ ona jokhecʼko hulkeda.

¹¹ Uni do Jihudạ reakʼ burukore than boṭkocʼkoe benaokeda ar ona lạgitʼ Jerusalemren hoṛko do boṅgako sewawakoko ehopʼena ar Jihudạren hoṛko do bạṛicʼ horteko senena.

^12-13 Unre Jehoram do Eliạ nạbi ṭhen khon mitʼṭecʼ ciṭhiye ńamkeda. Onare ol tahẽkana, “Amren hapṛam Dạudren Probhu Isore meneda, ‘am do amren ạpum Jehosaphat se Jihudạren Asa rajakʼ horte do bam taṛameda, menkhan Israelren rapajko lekagem taṛameda. Am iạte Ahab bõsren hoṛko leka Jihudạ ar Jerusalemren hoṛko do boṅga sewa secʼko ạcur akana. Ona chaḍa am do amren boehakom gocʼ ocoakatʼkoa, onko do am khon hõ bhagegeko tahẽkana.

¹⁴ Onate Probhu Isor do ńitokʼ amren hoṛko, amren hoponko ar amren bạhuko cetanre mahamạriye paṛao ocoya ar amakʼ sanam sompottikoe maraotama.

¹⁵ Ar am do lacʼre maraṅ rog paṛaoama ar ona rog iạte amakʼ lacʼ do bogocʼ oḍokokʼ tama.’ ”

¹⁶ Probhu Isor do Jehoram upạrte Philisṭiko ar Kusrenko sorre okoe Arabrenko girobasokʼ kan tahẽkan onkoakʼ monre bạiri lekae hoyocoketʼkoa.

¹⁷ Onko do Jihudạrenko akromonketʼkoa ar onḍe bolokate raj oṛakʼ reakʼ sanamakʼ jinisko, Jehoramren hoponko ar uniren bạhukoko bondi idiketʼkoa. Uniren huḍińicʼ hopon Jehoahas chaḍa ar celege bako sarecʼlena.

¹⁸ Niạko ghoṭna tayom Probhu Isor do Jehoramakʼ lacʼre nonkan mitʼṭecʼ roge kolkeda ona do ar baṅ beslentaea.

¹⁹ Ar dosar bochor reakʼ mucạtʼ secʼ ona ruạ iạte uniyakʼ lacʼ do bogocʼ oḍokentaea ar ạḍi kosṭo ńamkateye gocʼena. Hoṛko do uniren hapṛamko manotko lạgitʼ cetʼleka seṅgelko jeretʼetʼ tahẽkan onka do bako kạmileda.

²⁰ Jehoram do pegel bar bochor umerre raje hoylena ar irạl bochor Jerusalemre raje calaokeda. Uniyakʼ gujukʼre okoe hõ bako duklena. Ar Dạudakʼ nagrahare uniko topakadea menkhan rapajkoakʼ topare do bako baeledea.