2 Bõsbudạ 2 - সান্তালী বাইবেল

Mundil oṛakʼ benao reakʼ sapṛaokʼ

¹ Solomon do Probhu Isor ńutumte mitʼṭecʼ koejoṅ oṛakʼ ar apnar lạgitʼ mitʼṭecʼ raj oṛakʼ benao lạgitʼe hukumkeda.

² Uni do eaegel hajar hoṛko bojha gokʼ lạgitʼ ar irạlgel hajar hoṛko do burure dhiri gegetʼ lạgitʼ ar pe hajar turui sae hoṛko do onko ńel todarotko lạgitʼe dohoketʼkoa.

³ Solomon do Turren raj Hirạm noa khobore koladea, “Ińren ạpuń Dạudakʼ mitʼṭecʼ raj oṛakʼ benao lạgitʼ cetʼleka debdạru kaṭkom kolletʼ tahẽkan onkage iń hõ debdạru kaṭko kolạńme.

⁴ Ńitokʼ iń do ińren Probhu Isor lạgitʼ mitʼṭecʼ oṛakʼ benao lạgitʼ ar uni ńutumte ona samaṅ lạgitʼ iń sapṛao akana, jemon uni samaṅre jut so mosolako jeredokʼ, ar jaoge samaṅokʼakʼ reakʼ piṭhạ hõ jemon sajao akae tahen ar dinạm hilokʼ setakʼ ar ạyupʼ jokhecʼ, jirạukʼ mãhã hilokʼre, ambas ńutre ar aboren Probhu Isor niṭakatʼ judạ judạ porobre jeredokʼ samaṅokʼ reakʼ porobiń porob daṛeakʼ. Ar niạko palon do Israelko lạgitʼ mitʼṭecʼ jaejug reakʼ niạm kana.

⁵ “Okaṭakʼ oṛakʼ benao iń menjoṅkan ona do maraṅakʼ hoyokʼa, ente aboren Isor do sanam debotako khon hõe maraṅgea.

⁶ Menkhan uni lạgitʼ oṛakʼ do okoeye benao daṛekea? Ente serma, se serma rajrehõ uniyakʼ jaega do cetʼ okulạn hoyokʼa? Uni samaṅre eṭakʼ eṭakʼ samaṅokʼakʼ jinisko jeredokʼ ṭhạ̃i chaḍa ar cekate iń do uni lạgitʼ mitʼṭecʼ oṛakʼ iń benao daṛekea?

⁷ “Ińren ạpuń Dạud do gạkhuṛ kạrigolkoe ṭhik doho akatʼkoa onko do Jihudạ ar Jerusalemre iń ṭhen menakʼkoa. Ar onko sãote kạmi lạgitʼ nonkan mitʼṭen gạkhuṛ kạrigol koleme okoe do sona, rupạ, pitạl ar mẽṛhẽtʼ reakʼ kạmiye baḍae, beguni, arakʼ ar nil roṅakʼ sutạm reakʼ kạmi ar lakʼ rokʼ reakʼ kạmiko hõe kạmi daṛeakʼ.

^8-9 Ona chaḍa debdạru, saro kaṭko, rokot condon kaṭko hõ Lebanon khon kolạńme, ente ińiń baḍaea amren hoṛko do onḍenakʼ kaṭ mamakʼ kạmireko gạkhuṛgea. Ińren hoṛko do amren hoṛ sãoteko kạmiya jemon onko do ạḍi utạr kaṭko emdaṛeạń, ente okaṭakʼ iń benao lạgidokʼkan ona do ạḍi maraṅ ar hahaṛawakʼge hoyokʼa.

¹⁰ Iń do amren hoṛko, metakʼme dare mamakʼko do pe hajar turui sae ṭon holoṅ, pe hajar turui sae ṭon jao, pon lakh pon sae liṭar darkha rasa ar pon lakh pon sae liṭar jạitun sunumiń emakoa.

¹¹ Turren raj Hirạm do Solomon niạ ciṭhiye ol ruạṛadea, “Probhu Isor do acʼren hoṛkoe dulạṛetʼkoa ar onatege am doe raj akatʼmea.”

¹² Hirạm do arhõe olkeda, “Israelren Probhu Isor doe bhạgangea, one okoe do ot ar sermae sirjạu akatʼ. Uni do Dạud raj nonkan mitʼṭen akelan hopone em akawadea uniyakʼ bud ar bujhạu reakʼ daṛe menakʼtae ar okoe do Probhu Isor lạgitʼ mitʼṭecʼ oṛakʼ ar apnar lạgitʼ mitʼṭecʼ raj oṛakʼe benao lạgidokʼkan.

¹³ “Iń do am ṭhen Hirạm ńutuman mitʼṭecʼ ạḍi gạkhuṛ ar budan kạrigoliń kolkedea.

¹⁴ Uniren eṅgat do Dan gusṭikoren hoponera kanae ar uniren apattetʼ do Turren hoṛ kanae. Uni do sona, rupạ, pitạl, mẽṛhẽtʼ, dhiri, kaṭ ar beguni, jeṅgetʼ arakʼ, nil sutạm ar mihi musnạ sutạm reakʼ kạmi ạḍi bhageye baḍaea. Ar joto lekan lakʼ rokʼ kạmire uni doe gạkhuṛgea ar jãhã lekan nạmuna reakʼge uni do kạmi daṛeakʼa. Uni do aperen kạrigolko sãote ar ińren kĩsạ̃ṛ, amren ạpum Dạudren kạrigolko sãoteye kạmiya.

¹⁵ “Onate ińren mạlik am oka lekam menakatʼ ona lekage jao, guhum, jạiutun reakʼ sunum ar darkha rasa do ale ṭhenem kola.

¹⁶ Ale do Lebanon khon amakʼ jạruṛokʼ leka sanam kaṭko makʼkate mitʼ dhaote tolkate doreãore cape ocokate Japho nagraha hạbicʼle idiya. Ar ona tayom do Jerusalemte onakom idi ocokoa.”

Mundil benaokʼkan

¹⁷ Solomon do acʼren apat Dạudakʼ hoṛ lekhako lekage Israelko talareko girobasokʼ kan sanam bidisiạkoe lekha ocoketʼkoa. Onate onkoakʼ lekha do mitʼ lakh mõṛẽgel pe hajar turui sae hoṛko hoyena.

¹⁸ Onko mod khon eaegel hajar hoṛko do bojha gokʼ lạgitʼ, ar irạlgel hoṛko do buru khon dhiri getʼ ạgui lạgitʼ ar onko hoṛkoakʼ kạmiko ńel todarot tako lạgitʼ do pe hajar turui sae hoṛkoe bahalketʼkoa.