2 Bõsbudạ 19 - সান্তালী বাইবেল

Nạbi do Jehoshaphate cigạriwae kan

¹ Jihudạren raj Jehosaphat do Jerusalemte acʼakʼ raj doṅgolte nirạiteye ruạṛ hecʼena.

² Unre Hananren hopon ńeńelicʼ Jehu do uni ṭhen senkateye menkeda, “Bạṛicʼ hoṛko goṛowako ar okoe do Probhu Isorko hirkhạwae onko dulạṛko am do cetʼ lek getama? Ona iạte Probhu Isorakʼ edre do am cetanre pheḍ hecʼakana.

³ Tobe amre thoṛa bhageakʼ hõ menakʼa, ente am do disạmren Asera-muṭhạnkom marao giḍi akatʼkoa ar Isorakʼ sana leka calakʼ lạgitʼ amakʼ monem keṭecʼakada.”

Bikʼcạrkoe bahaletʼko

⁴ Jehosaphat do Jerusalemreye girobasokʼ kan tahẽkana. Uni do Ber-seba khon ehopʼkate Ephrayim reakʼ buru ṭoṭha hạbicʼ hoṛko ṭhen senkate onkoren hapṛamkoren Probhu Isor secʼ arhõ mone ruạṛketʼtakoa.

⁵ Uni do disạm talare, metakʼme Jihudạ reakʼ mimitʼ goṭecʼ pạcrite esetʼ ato ar nagrahakore bikʼcạrkoe bahalketʼkoa.

⁶ Uni do bikʼcạrkoe metatʼkoa, “Ape do sontorte jotowakʼpe kạmiya, ente jãhãe manwa lạgitʼ do baṅa bickom Probhu Isor lạgitʼgepe bicạra. Bicạr reakʼ ray emokʼ oktere uni do ape sãoteye tahena.

⁷ Probhu Isorge baṛe botoraepe. Ar sontorte bicạrpe, ente behok, mẽtʼãhã beṅgetʼakʼ ar ghus jojomko tulucʼ aboren Isorakʼ do cetʼ helmelge bạnukʼtaea.”

^8-9 Jehosaphat do Jerusalemre hõ Probhu Isor huyạte bikʼcạr reakʼ ray emokʼ lạgitʼ ar jhogṛa jhạṭi miṭ maṭkatako lạgitʼ adom Liwiko, naekeko ar Israel bõsren mathakoe bahalketʼkoa. Raj ar uniren hoṛko do Jerusalemteko ruạṛ hecʼen khan uni do bikʼcạrkoe hukumatʼkoa, “Probhu Isorge botoraepe ar pạtiạr salakʼ goṭa monte kạmipe.

¹⁰ Eṭakʼ eṭakʼ ato ar nagrahakore girobasokʼ kan hoṛko ṭhen khon jãhã lekan mamblage hijukʼ: baṅ do mãyãm joro ocoakanakʼ, baṅ do ạn-ạri ar niạmko, baṅ do hukumkoge: ape do onkope sontorkoa jemon Probhu Isorakʼ mẽtʼre dusi aloko hoyokʼ. Ar baṅ khan ape ar aperen hoṛko cetanre Probhu Isorakʼ edre do pheḍ hijukʼa. Ar nonkage kạmipe, jemon dusi alope hoyokʼ.

¹¹ “Probhu Isor do sanamakʼre maraṅ naeke Amoriạ ar rajakʼ jotowakʼre Jihudạ gusṭiren mukhiyạ Ismael ren hopon Sebadia do ape cetanrekin bahal ocoyena, ar Liwiko do apeko goṛowapea. Ape do dil salakʼpe kạmiya. Ar okoe dhorom reakʼe kạmi Probhu Isor do uni sãotegeye tahena.”