2 Bõsbudạ 18 - সান্তালী বাইবেল

Ahab upạrte Mikạwakʼ nạbi katha

¹ Jehosaphatakʼ do ạḍi utạr dhon duribko tahẽkantaea ar manot hõ tahẽkana. Uni do bapla hotete Ahab tulucʼ gateye hoylena.

^2-3 Thoṛa bochor tayom Ahab sãote ńapamokʼ lạgitʼ uni do Samariạteye senena. Ahab do uni ar uni sãoten hoṛko jom ocoko lạgitʼ aeme bhiḍi ar ḍaṅgrakoe gurketʼkoa. Israelren raj Ahab do Jihudạren Jehosaphat raj do Ramot-gileade akromon iạte acʼ tulucʼ calakʼ lạgitʼ nehõradeteye metadea, “Ramot-gilead upạrte cetʼ iń soṅgetem calakʼa. Jehosaphate roṛ ruạṛkeda, “Iń ar am, ińren hoṛ ar amren hoṛko doko mitʼgea; ale do am sãote lạṛhại calakʼ lạgitʼle rạjigea.”

⁴ Tobe Jehosaphat raj do Israelren raj niạ katha hõe metadea, “Pạhilte am do Probhu Isorakʼ solha hataome.”

⁵ Onate Israelren raj do nạbikoe hoho jarwaketʼkoa. Ar onkoakʼ lekha do ponsae tahẽkana. Uni do onkoe kuliketʼkoa, “Ramot-gilead upạrte lạṛhại bon calakʼa se bon ikạkakʼa?” Onkoko menkeda, “Do calakʼme, ente Isor do rajakʼ tire onae jimạ akada.”

⁶ Menkhan Jehosaphate menkeda, “Nonḍe Probhu Isorren jãhãe nạbi do cetʼ bạnukʼkoa one bon kuli daṛekeko?”

⁷ Israelren raj do Jihudạren Jehosaphat raje metadea, “Ńit hõ nonkan mitʼṭen hoṛ menaea one uni hotete Probhu Isor ṭhen bon kuli daṛeke, menkhan iń do uniń kurudae kana, ente uni do ińakʼ bhạlại reakʼ katha do tishõ bae roṛ akada, ar jao ghuṛi ińakʼ bạṛicʼ reakʼ kathageye roṛa. Uni doe hoyokʼkana Imlạ hopon Mika.” Unre Jehosaphate roṛ ruạṛkeda, “Raj do onka baṛe aloe roṛma.”

⁸ Unre Israelren raj do acʼren mitʼṭen guti hohowadeteye metadea, “Am do ńitge Imlạ hopon Mika hoho ạguyem.

⁹ Israelren raj ar Jihudạren raj Jehosaphat do raj posak horokʼkate Samariạ nagraha reakʼ phaṭok duạr ṭhen guhum saphae khạrạire unkin do ạkinakʼ siṅghạsonre kin duṛupʼ akan tahẽkana ar sanam nạbiko do unkin samaṅre tayom daram dinko reakʼko nạbiyetʼ tahẽkana.

¹⁰ Unre Kenanren hopon Sedekiạ do mẽṛhẽtʼ reakʼ dereńe benaokan tahẽkana uni doe menkeda, “Probhu Isore meneda, Aramrenko ạuriko marao utạrokʼ hạbicʼ am do noatem rokʼ pạsirkoa.”

¹¹ Eṭakʼ nạbiko hõ inạ kathageko menkeda. Onko doko menkeda, “Ramot-gileadte rakapʼ calakʼme ar jitạukʼme, ente Probhu Isor do maharajakʼ tire onae jimạ akada.”

¹² Okoeṭakʼ hoṛ do Mika hoho ạguye lạgitʼe senlen uni do nạbiye metadea, “Ńelme, eṭakʼ nạbiko do jotoge rajakʼ jo bahakʼ reakʼ kathageko meneda. Amakʼ katha hõ onkoakʼ katha hõ onkoakʼ leka jemon hoyokʼ ma. Ar bhạlại reakʼ kathage roṛme.”

¹³ Menkhan Mika doe menkeda, “Jiwetʼ Isorre kiriạkateń meneda, ińren Isor okae roṛ ińhõ inạgeń roṛa.”

¹⁴ Ado Mikại hecʼen khan raj do uniye kulikedea, “E Mika, ale do cetʼ Ramot-gilead upạrte lạṛhại lạgitʼle rakapʼ calakʼa se baṅa?” Mika doe roṛ ruạṛkeda, “Ma rakapʼ calakʼpe, ona akromonpe ar jitạukʼpe, ente onḍenko hoṛ do apeakʼ tireko jimạ ocoakana.”

¹⁵ Raj do uniye metadea, “Ar tinạkʼ dhao kiriạ kateń metama, Probhu Isor ńutumte sạriyakʼ chaḍa ar cetʼge alom mena mente?”

¹⁶ Mikại roṛ ruạṛkeda, “Ińiń ńelkeda, Israelko do gupiyicʼ begor bhiḍi leka buru cetanreko chirchạtur akana. Onate Probhu Isore meneda, ‘nokoren do cele mạlikge bạnukʼkotakoa, onate onko do sulukte apan ạpin oṛakʼteko ruạṛ joṅma.’ ”

¹⁷ Unre Israelren raj Jehosaphate menkeda, “Cetʼ laharege bạń men akawatʼmea, uni do iń reaṅ bạṛicʼakʼ chaḍa bhạlại reakʼ katha do bae mena?”

¹⁸ Mikạ do roroṛe ehopʼena, “Enḍekhan Probhu Isorakʼ katha ańjompe. Iń doń ńelkeda Probhu Isor do acʼakʼ siṅghạsonreye duṛupʼ akana ar uniyakʼ jojomsa ar leṅgasa aṛere do sermaren sanam goḍetko menakʼkoa.

¹⁹ Unre Probhu Isore menkeda, ‘Ramot-gilead akromon lạgitʼ Israelren raj Ahab do okoe onḍeye bulạu idiyea jemon uni do onḍegeye gujukʼ? Unre mimitʼ hoṛ do mimitʼ leka kathako roṛkeda.

²⁰ Mucạtʼre mitʼṭen jiu do hecʼkate Probhu Isor samaṅre teṅgoyenteye menkeda, ‘ińiń bulạu idiyea.’ Probhu Isor do uniye kulikedea, ‘cetʼ lekatem bulạueya?’

²¹ Uni doe menkeda, ‘iń do senkate uniren sanam nạbikoakʼ mocare eṛe roroṛ jiu iń hoyokʼa.’ Probhu Isore menkeda, ‘amge uni dom bulạu idi daṛeaea. Amge senkate onkaeme.’

²² Ona iạte Probhu Isor do ńitokʼ amren noko nạbikoakʼ mocare eṛe roṛren jiue emakadea. Amakʼ ḍahao maraokʼ lạgitʼ Probhu Isor do am lạgitʼ bạṛicʼakʼgeye men akada.

²³ Unre Kenanren hopon Sedekiạ do sen sorente johare Mikai thapakedeteye metadea, “Probhu Isorren jiu am tulucʼ katha roṛ lạgitʼ iń ṭhen khon oḍokkate oka horteye senlena?”

²⁴ Mikại roṛ ruạṛkeda, “Am do enhilokʼgem baḍae daṛeakʼa one oka hilokʼ okokʼ lạgitʼ bhitri oṛakʼtem bolokʼ.”

²⁵ Israelren raj do noae hukumatʼkoa, “Mikạ do nagraharen subedar Amon ar Joas ṭhen arhõ kol ruạṛkaepe.

²⁶ Unkinpe metakinạ raje men akada nui do jemon hajotreye doho ocokʼ ar nirạite raj ạuriye ruạṛ hijukʼ hạbicʼ uni do thoṛa dakʼ ar thoṛa piṭhạ chaḍa ar cetʼge alope emaya.”

²⁷ Unre Mikai menkeda, “Nirạitem ruạṛ hecʼlen khan baḍaeme Probhu Isor do iń hotete katha bae roṛakada.” Uni do arhõe menkeda, “Ape sanamkoge ińakʼ katha ańjom dohokakʼpe.”

Ahabakʼ gujukʼ

²⁸ Inạ tayom Israelren Ahab raj ar Jihudạren Jehosaphat raj do Ramot gilead akromon lạgitʼ kin senena.

²⁹ Ahab do Jehosaphate metadea, “Hoṛko jemon aloko orom daṛeạń onate iń do eṭakʼ posak horokʼ kateń lạṛhạiya, menkhan am do amakʼ raj posakge horogme. Ar niạ menkate Israelren raj do eṭakʼ posak horokʼkate lạṛhại lạgitʼe senena.

³⁰ Aramren raj do acʼren rãt gạḍiren subedarko noae hukumatʼko tahẽkana, “Ape do Israelren raj chaḍa ar okoe sãotehõ alope lạṛhạiya.”

³¹ Rãt gạḍiren subedarko do Jehosaphat ńelteko hudiskeda, uni kangeae Israelkoren raj do. Onate onko do ạcurente uni akromone lạgitʼko senena menkhan Jehosaphat doe kikiạu gotʼkeda, unre Probhu Isor do uniye goṛowadea ar onate onko do uni ṭhen khonko calaoena.

³² Onate subedarkoko bujhạukeda, uni do Israelren raj doe baṅkana, onate ar bako khudạuledea.

³³ Menkhan mitʼṭen hoṛ do ạuṛige acʼakʼ sare aṛakʼketʼ khan Israelren raj do tala koṛamre bitʼadea. Unre raj do acʼren rãt gạḍi cakʼlaoyicʼe metadea, “Rãt gạḍi ạcurme ar lạṛhại tala khon bahrete idiyińme. Ente iń doń ghạl akana.”

³⁴ Goṭa din bhor ạḍi botor lạṛhại hoyena ar Israelren raj do Aramrenko samaṅrege rãt gạḍire duṛupʼ akane tahẽyena, ar siń cando hạsurokʼ jokhecʼ doe gocʼena.