2 Bõsbudạ 17 - সান্তালী বাইবেল

Jihudạren Jehosaphat raj

¹ Asawakʼ jaegare do uniren hopon Jehosaphat raje hoyena. Uni do Israel upạrte apnartetʼe keṭecʼena.

² Uni do Jihudạ reakʼ sanam pạcrite esetʼ nagraha ar atokore lạṛhại phạdkoe dohoketʼkoa ar Jihudạ disạm ar uniren apate dokholan tahẽkan Ephrayim reakʼ atoko ar nagrahakore hõ lạṛhại phạdkoe dohoketʼkoa.

^3-4 Probhu Isor do Jehosaphat sãoteye tahẽkana, ente uniren hapṛam Dạud pạhilre cetʼlekae calakʼkan tahẽkan onkage uni hõe calakʼkan tahẽkana. Uni do Bakʼal debota do baṅa bickom uniren hapṛamkoren Isorgeye dewa sewawae kan tahẽkana ar Israelko leka calakʼ baṅkate Isorakʼ hukum lekae calakʼ kan tahẽkana.

⁵ Ona iạte Probhu Isor do uni tabere rajosṭiye ṭarhaokeda. Ar Jihudạren sanam hoṛko do Jehosaphat dan sandesko emadea; onate uniyakʼ dhon-durib do ḍherena ar manot hõ ḍherentaea.

⁶ Probhu Isorakʼ horte calakʼ do ạḍi ahkaokʼ mon tahẽkantaea. Ona chaḍa uni do Jihudạ disạm khon than boṭkocʼko ar Asera-muṭhạnkoe marao giḍi utạrletʼa.

⁷ Uniye rajokʼ tesarakʼ bochorre Jihudạ reakʼ sanam atokoren ar nagrahakoren hoṛko cetʼako lạgitʼ uniren guti Benhayil, Obadiạ, Sekariạ, Nathanel ar Mikay takoye kolketʼkoa.

⁸ Onko sãote do Semaya, Nethania, Sebadia, Asahel, Semiramoth, Jehonatha, Adomiạ, Tobiạ ar Tob-adonia ńutuman adom Liwiko ar Elisama ar Jehoram ńutuman barea naeke kin tahẽkana.

⁹ Probhu Isorakʼ ạn-ạri reakʼ puthi soṅgekate onko do Jihudạ disạm reakʼ sanam jaegare senkate ona khonko cetʼatʼkoa.

Jehosaphatakʼ daṛe

¹⁰ Jihudạ disạm aḍepase reakʼ sanam rajosṭiko cetanre Probhu Isor ṭhen khon nonkan botor rakapʼatʼkoa onko do Jehosaphat sãote ar bako lạṛhạilena.

¹¹ Adom adom Philisṭiko do Jehosaphat ṭhen khajna lekate dan sandesko ar rupạkoko ạgukeda ar Arabrenko do eaehajar eaesae bheḍako ar eaehajar eaesae meromko emadea.

¹² Jehosaphat do onkate artetʼgeye daṛe idiyena. Uni do Jihudạ disạmre adomakʼ gaṛko ar murại nagrahakoe benaokeda.

¹³ Uni do Jihudạ reakʼ nagrahakore aema jiniskoe jogao dohokada ar Jerusalemre do gạkhuṛ lạṛhại birkoe dohoketʼkoa.

¹⁴ Bõs lekate onkoakʼ lekha ar subedarkoakʼ ńutum do nonka leka tahẽkana: Jihudạ gusṭiko khon pạhilicʼ subedar Adna ar uniren pe lakh gạkhuṛ lạṛhại birko;

¹⁵ dosaricʼ subedar Jehohanan ar uniren bar lakh irạlgel hajar lạṛhại birko;

¹⁶ tesaricʼ subedar do Sikri hopon Amasiạ ar uniren bar lakh lạṛhại birko. Amasiạ do Probhu Isorakʼ kạmire kusite apnartetʼe emlena.

¹⁷ Benjạmin gusṭirenko khon namḍak birbanṭaren subedar Eliyada ar uniren akʼ sar ar ḍhal sasapʼ bar lakh lạṛhại birko;

¹⁸ dosaricʼ subedar Jehosabad ar uniren mitʼ lakh irạl gel hajar gạkhuṛ lạṛhại birko;

¹⁹ Noko lạṛhại birko do rajakʼ kạmi lạgitʼko bahal ocoakan tahẽkana. Noko chaḍa hõ Jihudạ reakʼ pạcrite esetʼ ato ar nagrahakore hõ lạṛhại phạdko doho ocolena.