2 Bõsbudạ 16 - সান্তালী বাইবেল

Asawakʼ mucạtʼ jion

¹ Asawakʼ rajokʼ pegel turui bochorre Israelren Basa raj do Jihudạren hoṛko upạrte senkate Rama nagraha do gaṛ lekae benao rakapʼkeda jemon okoe hõ Jihudạren raj Asa ṭhen aloko sen hecʼ daṛeakʼ.

² Unre Asa do Probhu Isorakʼ oṛakʼre ar apnarakʼ raj khajańci oṛakʼ khon sona ar rupạkoe oḍokketʼte Aram disạmren raj Benhadad ṭhene kolkeda. Unre Benhadad do Damesek nagrahareye girobasokʼ kan tahẽkana. Ar Asa do uni ṭhen kathae roṛgotʼkada,

³ “Ińren ạpuń ar amren ạpum leka dela, alaṅ hõ mitʼṭecʼ laṅ bandhaokakʼrege. Iń do sona ar rupạko dan lekateń kolatʼmea. Am do ńitokʼ Israelren raj Basa sãote okaṭakʼem bandhao akatʼ ona baṛe rạpudme, enḍekhan uni do iń ṭhen khone ruạṛ calakʼa.”

⁴ Asa rajakʼ kathate Benhadad doe rạjiyena ar Israelkoakʼ ato ar nagrahako upạrte acʼren subedarkoe kolketʼkoa. Onko do Ison, Dan, Abel-mayim ar Napthali atoko reakʼ sanam murại nagrahakoe hatkeda.

⁵ Basa do niạ kathae ańjomketʼ khan Ramare gaṛ nagraha benaoe thirena.

⁶ Unre Asa raj do Jihudạren sanam hoṛkoe ạguketʼkote Basa okako dhiri ar kaṭko beoharetʼ tahẽkan onako do Rama khone idikeda. Onakote uni do Geba ar Mispare gaṛ lekae benaokeda.

Hanani nạbi

⁷ Onako dinre ńeńelicʼ Hanani do hecʼkate Jihudạren Asa raje metadea, “Amren Probhu Isor cetanre bhorsa baṅkate am do Aramren raj cetanrem bhorsalente Aram rajren lạṛhại phạdko do amakʼ ti khonko puskucʼena.

⁸ Kusrenko ar Lubiạko do ḍher rãt gạḍiko ar aswariko sudhạge cetʼ bako tahẽkana. Unre am do Probhu Isor cetanre bhorsa akanem tahẽkante uni do amakʼ tireye jimạkatʼkoa.

⁹ Okoe do Probhu Isorko botorae onko rukhiyạko lạgitʼ uniyakʼ mẽtʼ do dhạrti reakʼ sanam jaegakore tahena. Am do lelhawakʼem kạmi akada. Ńit khon am do ghane ghạṛicʼ lạṛhạirem paṛaokʼa.”

¹⁰ Niạ katha ańjomkate uni do ńeńelicʼ cetanre ạḍiye raṅgaoente hajot khanareye bhoraokadea. Ar onako dinre Asa raj do adom hoṛko cetanreye julumkeda.

¹¹ Asa rajakʼ eṭakʼ eṭakʼ kạmi reakʼ katha do pạhil khon mucạtʼ hạbicʼ “Jihudạ ar Israelkoren rapajkoakʼ Itihãs” ńutumanakʼ puthire ol menakʼa.

¹² Asa raj rajokʼ pegel areakʼ bochorre uni do jaṅgare mitʼṭecʼ rog ńamkedea. Ar noa rog do sạrdi idiyentaere hõ uni do Probhu Isorakʼ goṛo hatao baṅkate eken ḍaktarkoakʼ goṛogeye hataokeda.

¹³ Tayomte uniyakʼ rajokʼ pongel mitʼakʼ bochorre uni do acʼren hapṛamko ṭhene senena.

¹⁴ Ar ạḍi lekan jut so mosola ar aema lekan mońj so teakʼ jinisate aṭetʼreko giticʼkadea ar Dạudakʼ nagrahare uni do acʼ lạgitʼ topa okareye ṭhik doholetʼ onḍegeko topakedea. Hoṛko do uni manote lạgitʼ maraṅ okocʼ seṅgelko jolkeda.