2 Bõsbudạ 14 - সান্তালী বাইবেল

Jihudạren Asa raj

¹ Tayomte Abiạ do acʼren hapṛamko ṭhene senena ar uni do Dạudakʼ nagrahareko topakadea. Ar uniyakʼ jaegare uniren hopon Asa doe rajena. Asakʼ oktere disạmre gel bochor suluk tahẽkana.

² Asa do Probhu Isorakʼ mẽtʼre bhageakʼgeye kạmiyetʼ tahẽkana.

³ Uni do debotakoakʼ pinḍko, than boṭkocʼko ar pujạwakʼ dhirikoe rạputʼ gejer giḍikakʼ kan tahẽkana ar Asera muṭhạnko hõe makʼ giḍikada.

⁴ Uni do Jihudạren hoṛko akoren hapṛamkoren Probhu Isorakʼ sana leka senokʼ ar uniyakʼ ạn-ạriko ar hukumko manao idiy lạgitʼe metakokan tahẽkana.

⁵ Uni do Jihudạ disạm reakʼ mimitʼ atoko ar nagrahako reakʼ than boṭkocʼko ar dhudhup-pinḍkoe marao giḍikada. Uniyakʼ tabere rajosṭi do sulukte perecʼ tahẽkana.

⁶ Disạmre suluk tahẽkante adom adomakʼ atoko doe pạcri esetʼ ocokeda. Onako oktere Asa tulucʼ do okoe hõ bako lạṛhạiylena, ente Isor do sulukteye doholedea.

⁷ Uni do Jihudạren hoṛkoe metatʼko tahẽkana, “Dela bon, noako ato beṛhaete pạcri bon benaoa ar onare usulge pahra oṛakʼ benaokate, phaṭok duạr ar huṛkạṛko bon benaoakʼa ar bon keṭeja. Disạm do ńit hõ aboakʼ tirege menakʼa, ente abo do aboren Probhu Isorakʼ sana leka bon calakʼ kana; onate joto secʼ khon uni do sulukreye doho akatʼbona.” Ar nonkate onko do jotowakʼ kạmireko jo bahayena.

⁸ Jihudạ gusṭiwakʼ ṭoṭhare Asa rajren do ḍhal ar borlom akʼsen lạṛhại phạdko do pe lakh hoṛko tahẽkana, ar Benjạmin gusṭi reakʼ ṭoṭhare do ḍhal ar akʼ sar sasapʼko bar lakh irạlgel hajar lạṛhại phạdko tahẽkana. Noko sanamkoge bir baṅṭako tahẽkana.

⁹ Tayomte Kus disạmren Seraho do gel lakh lạṛhại phạdko ar pe sae rãt gạḍiwante Jihudạren hoṛko upạrteye oḍok hecʼente Maresa hạbicʼe laha hecʼena.

¹⁰ Unre Asa hõ uni upạrteye oḍok calaoena ar banar dolge Maresa ṭhenakʼ Sephata reakʼ buru lodamre lạṛhại lạgitʼko sapṛaoena.

¹¹ Unre Asa do uniren Probhu Isor hohowadeteye metadea, “E Probhu Isor, cetʼleka daṛeankom goṛowako onkage am do nijorko hõm goṛo daṛeakoa. Ona iạte E aleren Probhu Isor, ale goṛowaleme baṛe, ente ale do am cetanrele bhorsakʼkana ar amakʼ ńutumtege noko maraṅ dolrenko upạrtele oḍok hecʼakana. E Probhu Isor, am kangeam aleren Isor do; manwa do am upạrte alom jitạu ocokoa.”

¹² Unre Asa ar Jihudạren hoṛko samaṅ khon Probhu Isor do Kusrenkoe ńẽtʼketʼkoa. Onate Kusren hoṛko doko dạṛkeda.

¹³ Asa ar uniren lạṛhại phạdko do Gera hạbicʼ onkoko khudạu idiketʼkoa. Ar Kusrenko do nunạkʼko gocʼketʼkoa onko do celege jiwetʼ bako sarecʼletʼkoa. Probhu Isor ar uniren lạṛhại phạdko samaṅre sanamgeko marao cabayena. Ar Jihudạren hoṛko do ạḍi utạr luṭakʼ jiniskoko ạgukeda.

¹⁴ Onko do Gera beṛhaeteakʼ sanam atokoko marao giḍikada, ente onḍenko hoṛko do Probhu Isor ạḍiko botoradea. Ar luṭ reakʼ aema jinisko tahẽkante onko do onako atoko luṭkeda.

¹⁵ Onko do mĩhũ meromko tahẽkantako hoṛakʼ tạmbuko ńẽtʼkeda ar onkoren bhiḍiko, meromko, ar ũṭkoko ạguketʼkoa. Ona tayom onko do Jerusalemteko ruạṛena.