2 Bõsbudạ 13 - সান্তালী বাইবেল

Jihudiren Abiạ raj

¹ Jerobiamakʼ rajokʼ gel irạlakʼ bochorre Abiạ do Jihudạren raje hoyena.

² Uni do Jerusalemre pe bochore rajlena. Uniren eṅgattetʼakʼ ńutum do Maka; uni do Gibiạ Uriạlren hoponerae tahẽkana. Abiạ ar Jerobiam talare lạṛhại hoylena.

³ Unre Abiạ do pon lakh bachao akan lạṛhại birkoante lạṛhại lạgitʼe oḍok senena ar Jerobiam hõ irạl lakh bachao akan lạṛhại birko uni upạrte lạṛhại lạgitʼe sapṛaoketʼkoa.

⁴ Abiạ do Ephrayem reakʼ buru ṭoṭhare Semarayim buru cetanre teṅgoyenteye menkeda, “Jerobiam ar Israelren sanam hoṛko, ińakʼ katha ańjompe.

⁵ Ape do cetʼ bape baḍaea, Israelren Probhu Isor do jaejug reakʼ bondobos hotete Dạud ar uni bõsren hoṛko ṭhen jaejug hạbicʼ Israelko lạgitʼ raj hudại emakada mente?

⁶ Enhõ Dạudren hopon Solomonren guti Nabatren hopon Jerobiam do acʼren mạlik upạrteye hulkeda.

⁷ Jerobiam do adomko okoḍa ar bhạṅgwạ hoṛko jarwakate Solomonren hopon Rehobiam upạrteye teṅgoyena. Ona jokhecʼ Rehobiam do juạn koṛa ar gạkhuṛ secʼte do komgeye tahẽkana; ar onko teṅgo daramko leka daṛe hõ baṅ tahẽkantaea.

⁸ “Ńitokʼ Dạudren hoponkoakʼ tire Probhu Isorakʼ okaṭakʼ rajosṭi menakʼ ape do ona upạrte teṅgokʼpe menetʼkana. Ape do sạrige gadel lạṛhại phạdko kanape ar ape talare do sonaren mĩhũ muṭhạnko menakʼkoa ar Jerobiam do aperen debotako hoyokʼ lạgitʼte onkoe benao akatʼkoa.

⁹ Ape do Probhu Isorren naekeko, metakʼme Aronren hoponko ar Liwikope laga ńir akatʼkoa ar eṭakʼ eṭakʼ disạmren hoṛko leka apnar lạgitʼ naekepe bahal akatʼkoa. Naeke lekate apnartetʼ begarokʼ lạgitʼ jãhãege mitʼṭen damkom ar eae goṭen bheḍae ạguko unige onko debotakoren naekeye hoedaṛeakʼa.

¹⁰ “Menkhan ale do onka dole baṅkana, Probhu Isorge aleren Isor do. Ale do bale bạgi giḍiakadea. Okoeko naeke do Probhu Isorko sewawae kan onko do Aron bõsren hoṛ kanako, ar Liwiko hõ akoakʼ niṭ akatʼakʼ reakʼgeko kạmikana.

¹¹ Onko do dinạm hilokʼ setakʼ ar ạyupʼ jokhecʼ Probhu Isor ńutumte jeredokʼ samaṅokʼakʼko samaṅeda ar jut so dhupko jeretʼeda. Onko do saphawakʼ ṭebilre dohoakan samaṅakʼ piṭhạko sajao dohokakʼ kana ar din hilokʼ ạyupʼ jokhecʼ sona reakʼ diuhe dohowakʼre diuheko jeretʼeda. Ale do aleren Probhu Isorakʼ hukum lekatele kạmikana, menkhan ape do unipe bạgi giḍiakadea.

¹² Isor do ale sãore menaea; unikangeae aleren mukhiyạ do. Uniren naekeko do sakwako oroṅetʼte ape upạrte lạṛhại lạgitʼ ale sãote menaea. E Israelren hoṛko, aperen hapṛamkoren Probhu Isor upạrte do alope lạṛhạiya, ente bape jo baha daṛeakʼa.”

¹³ Jerobiam do hape hapete Jihudạren lạṛhại phạdkoakʼ tayom secʼ mitʼ dol lạṛhại phạdkoe kolketʼkoa; onate uniren mitʼ dol lạṛhại phạdko do Jihudạ samaṅ secʼre ar mitʼ dol lạṛhại phạdko do Jihudạ tayom secʼreko tãṛãkʼena.

^14-15 Jihudạren hoṛko do ạcuren khanko ńelkeda, lạṛhại phạdko do ako samaṅ ar tayom banar secʼrege menakʼko. Unre onko do Probhu Isor ṭhenko rakʼkeda. Ar naekeko do akoakʼ sakwako oroṅkeda ar Jihudạren hoṛko do lạṛhại lạgitʼko hohokeda. Ar onko do lạṛhại reakʼ tinreko hohokeda unre Abiạ ar Jihudạren hoṛko samaṅ khon Isor do Jerobiam ar sanam Israelkoe bhagaoketʼkoa.

¹⁶ Jihudạ samaṅ khon Israelko doko dạṛkeda ar Isor do Jihudikoakʼ tireye jimạkatʼkoa.

¹⁷ Abia ar uniren hoṛko do ạḍi utạr hoṛko gocʼketʼkoa. Onate Israelkoren bachao akan hoṛko mod khon mõṛẽ lakh hoṛko gocʼena.

¹⁸ Nonkate Israelren hoṛko doko bhagao ocoyena, ar Jihudạren hoṛ doko jitạuena, ente onko do akoren hapṛamkoren Probhu Isor cetanreko bhorsalena.

¹⁹ Abia do Jerobiame khudạukedea ar uni ti khon Bethel, Jesana ar Ephron nagraha ar ona aḍepase reakʼ ṭoṭhakoe hatkeda.

²⁰ Abiạ oktere Jerobiam do ar bae daṛelena. Probhu Isor do uniye ńẽtʼkedea ar uni doe gocʼena.

²¹ Ar Abiạ do daṛe idikʼtegeye tahẽyena. Uniren do gelpon bạhuko ar bargel bar hoponko ar gel turui hoponerako tahẽkantaea.

²² Abiạwakʼ eṭakʼ eṭakʼ kạmiko reakʼ katha ar uni okakoe roṛletʼ ona do Eddor nạbiyakʼ Itihãs puthire ol menakʼa.