2 Bõsbudạ 12 - সান্তালী বাইবেল

Sisak do Jerusaleme akromonetʼ kan

¹ Rehobiamakʼ raj hudạ tinre keṭecʼena are daṛe idiyena unre uni ar sãoten sanam Israelko do Probhu Isorakʼ ạn-ạriko bạgiyada.

² Probhu Isorre bepạtiạu iạte Rehobiamakʼ rajokʼ mõṛẽakʼ bochorre Misorren Sisak raj do Jerusaleme akromonkeda.

³ Sisak sãote do gelbar sae rãt gạḍiko, turui gel hajar aswariko ar alekha Lubiren, Sukiren ar Kusiren lạṛhại phạdko do Misor khonko hecʼlena.

⁴ Uni do Jihudạ reakʼ pạcrite esetʼ nagrahakoe ạidạriante Jerusalem hạbicʼe hecʼena.

⁵ Semaya nạbi do unre Rehobiam ar Jihudạ mukhiyạko ṭhene hecʼena. Onko mukhiyạko do Sis botorte Jerusalemre hecʼkateko jarwalena. Semaya do onkoe metatʼkoa, “Probhu Isor do niạ kathae meneda, ‘ape dope bạgi giḍiakadińạ, ona iạte iń do ńitokʼ Sisakakʼ tireń jimạ akatʼpea.’ ”

⁶ Onate raj ar Israelren mukhiyạko do apnartetʼ nindhạnenteko menkeda, “Probhu Isor doe dhoromgea.”

⁷ Ar Probhu Isor do tinreye ńelkeda, onko do apnartetʼko nindhạnena unre uni do Semayaye metadea, “Onkoko nindhạn akante bạń marao utạrkote sạjại khon thoṛań aṛakʼkoa. Ińakʼ edre do Sisak hotete Jerusalem cetanre do bạń dul buhạu ocoya,

⁸ menkhan onko do uni gobolre tahen hoyokʼtakoa. Onate iń sewawạń reakʼ ar eṭakʼ eṭakʼ disạmren rajko sapʼsorako talare oka begartetʼ menakʼ onako bujhạu daṛeakʼa.”

⁹ Misorren raj Sisak do Jerusaleme akromonketʼte Probhu Isorakʼ oṛakʼ ar raj oṛakʼ reakʼ sanam dhon-duribkoe idikeda. Uni do sanamakʼgeye idikeda, ar Solomone benao ocoletʼ sona reakʼ ḍhalko hõe idikeda.

¹⁰ Onate Rehobiam raj do onako bodolte rupạ reakʼ ḍhalkoe benao ocokeda. Ar raj dolan reakʼ duạr ṭhen okoe lạṛhại phạdko horhoyetʼ tahẽkan onkoren senaputi ṭhen onako rukhiyại lạgitʼ bhare emkeda.

¹¹ Ar raj do Probhu Isorakʼ oṛakʼte tinreye bolokʼkan tahẽkana unre pahradarko do onako ḍhal sapʼkate uni sãoteko calakʼkan tahẽkana ar tayomte do pahra oṛakʼreko dohokakʼ kan tahẽkana.

¹² Rehobiam do apnartetʼe nindhạnlente uni cetanre Probhu Isorakʼ oka edre tahẽkan ona do thirena ar uni do bae marao ocolena. Unrehõ Jihudạre do thoṛa bhage hoṛko tahẽkana.

Rehobiamakʼ gujukʼ

¹³ Rehobiam raj do Jerusaleme kajakkeda ar raje calao idikeda. Uni do tinre raje hoylena unre uniyakʼ umer do pongel mitʼ bochor umer tahẽkana. Israelren gusṭikoakʼ sanam jaegako modre okaṭakʼ nagraha do Probhu Isorakʼ tahen oṛakʼ menteye bachaoletʼ ona Jerusalem nagrahare Rehobiam do gel eae bochore rajlena. Rehobiamren eṅgatakʼ ńutum do Nakʼama; uni do Amoni maejiue tahẽkana.

¹⁴ Rehobiạm do Probhu Isorakʼ sana leka calakʼ bae moneyatʼte okaṭakʼ bạṛicʼakʼkan onageye kạmikeda.

¹⁵ Rehobiamakʼ eṭakʼ eṭakʼ kạmi reakʼ katha etohopʼ khon mucạtʼ hạbicʼ do Semaya nạbiyakʼ olakʼ kana ar ńeńelicʼ Eddowakʼ olakʼ bõs tạlikare hõ ol menakʼa. Rehobiam ar Jerobiam talare do jaoge lạṛhại hoyokʼkan tahẽkana.

¹⁶ Tayomte Rehobiam do acʼren hapṛamko ṭhene senena ar Dạud nagrahareko topakadea. Ar uniyakʼ jaegare uniren hopon Ạbiại do raje hoyena.