2 Bõsbudạ 11 - সান্তালী বাইবেল

Semayakʼ nạbi katha

¹ Jerusalem seṭerkate Rehobiam do Jihudạ ar Benjạmin gusṭiren sanam hoṛko lạṛhại lạgitʼe jarwaketʼkoa. Onate mitʼ lakh irạlgel hajar lạṛhại phạdko hoyena. Noa do hoyena jemon Israelko sãote lạṛhạikate rajosṭi do arhõ Rehobiamakʼ tireko ruạṛ ạguy.

² Menkhan Isorren hoṛ Semaya ṭhen Isorakʼ niạ katha do sodorena,

³ “Am do Jihudạren raj Solomonren hopon Rehobiam ar Benjạmin ṭoṭharen sanam Israelko ar Jihudạrenkom metakoa,

⁴ Probhu Isore meneda akoren boehako upạrte jemon lạṛhại do aloko oḍok calakʼ. Menkhan oṛakʼteko ruạṛ calakʼma, ente noa do Probhu Isorakʼ kạmikana.” Onate onko do Probhu Isorakʼ kathako bataoketʼte Jerobiam upạrte lạṛhại do ar bako senlena.

Rehobiam do Jihudại kajakketʼa

^5-6 Rehobiam do Jerusalemre girobasokʼe ehopʼena ar Jihudạ disạm rukhiyại lạgitʼ Bethlehem, Etam, Tekoa,

⁷ Beth-Sur, Soko, Adulam,

⁸ Gat, Maresa, Siph,

⁹ Adorayim, Lakis, Aseka,

¹⁰ Sora, Aijalon ar Hebron ńutumanakʼ Jihudạ ar Benjạmin ṭoṭha reakʼ adomakʼ atoko ar nagrahako do pạcriteye esetʼketʼte onakoe keṭecʼkeda.

¹¹ Uni do onako rukhiyại lạgitʼ subedarkoe dohoketʼkoa. Onḍe uni do onko lạgitʼ jomakʼko, sunumko ar darkha rasakoe dohokeda.

¹² Uni do onako ato ar nagrahakore ḍhal ar borlomkoe dohoketʼte onako do ạḍiye kajakketʼa. Nonkate Jihudạ ar Benjạmin ṭoṭha do acʼ gobolre tahẽyena.

Naekeko ar Liwiko do Jihudạteko hecʼen

¹³ Israelren sanam ṭoṭharen naekeko ar Liwiko do uni secʼko tahẽkana.

¹⁴ Onko do akoren janwarkoakʼ ạtiń ṭạnḍiko ar sompottikoko bạgiyatʼte Jihudạ ar Jerusalemteko hecʼena, ente Jerobiam ar uniren hoponko do Probhu Isorakʼ naeke hudạ khon onkoko ocokʼletʼkoa.

¹⁵ Jerobiam do than boṭkocʼko lạgitʼ ar bạṛicʼ jiuko lạgitʼ ar acʼe benao ocolede mĩhũ muṭhạn lạgitʼ acʼren naekekoe bahalletʼkoa.

¹⁶ Israelren sanam gusṭiko modre okoe do Israelren Probhu Isorakʼ sana baḍaejoṅ lạgitʼko udgạulen onko do akoren hapṛamkoren Probhu Isor ńutumte Liwiko soṅgekate Jerusalemteko hecʼena.

¹⁷ Onko do pe bochor hạbicʼ Jihudạ rajosṭi ar Solomonren hopon Rehobiamakʼ tiko keṭecʼletʼtaea, ente niạ pe bochor do Dạud ar Solomonakʼ horteko taṛamleda.

Rehobiamakʼ gharońjrenko

¹⁸ Rehobiam do Dạudren hopon Jerimotren hoponera Mahalate baplaledea. Mahalatren eṅgattetʼ do Abihayiel do Jisạiren hopon Eliabren hoponerae tahẽkana.

¹⁹ Mahalatakʼ kukhire do Jeus, Semariạ ar Saham ńutuman pea hoponkoakʼ janam hoylena.

²⁰ Ona tayom Rehobiam do Absalomren hoponera Makaye baplakedea. Uniyakʼ kukhire do Ạbiạ, Atai, Sisa ar Selomit takoakʼ janam hoylena.

²¹ Rehobiam do acʼren eṭakʼ bạhuko ar chuṭi erako khon Absalomren hoponera Maka do ạḍi bạ̃ṛtiye dulạṛede kan tahẽkana. Uniren do jotote gel irạl bạhuko ar turui gel chuṭki erako, bargel irạl hoponko ar turui gel hoponerako tahẽkantaea.

²² Rehobiam do Makaren hopon Ạbiạ do raj mente hoeocoye lạgitʼ uniren boehako mod khone maraṅkedea.

²³ Uniren adom hoponko do Jihudạ ar Benjạmin ṭoṭha reakʼ pạcrite esetʼ nagrahateye kolketʼkoa. Ar ạḍi utạr anajkoe ematʼkoa ar bạhukoe ńamatʼkoa.