2 Bõsbudạ 10 - সান্তালী বাইবেল

Rehobiam upạrte Israelkoakʼ hul

¹ Rehobiam do Sikemteye senena, ente sanam Israelko do uni raje lạgitʼ onḍeko senlena.

² Unre Nabatren hopon Jerobiam do Misor khone ruạṛ hecʼena. Uni do Solomon raj samaṅ khone dạṛletʼte onḍeye tahẽkana. Ar onḍe tahen jokhecʼge uni do Rehobiamakʼ rajokʼ reakʼ khobore ańjomleda.

³ Hoṛko do Jerobiamko hoho ạgukede khan uni ar sanam Israelko do Rehobiam ṭhen senkateko menkeda,

⁴ “Amren ạpum do ale cetanre mitʼṭecʼ hamal arãṛe lade akawatʼlea, menkhan ńitokʼ am do aleakʼ hamal arãṛ baṛe rawal kataleme; enḍekhan ale do am ṭhenle khaṭaokʼa.”

⁵ Rehobiame roṛ ruạṛatʼkoa, “Ape do pe din hilokʼre arhõ ruạṛ hijukʼpe.” Onate onko hoṛ doko ruạṛ calaoena.

⁶ Okoe murubbiko acʼren apattetʼ Solomon oktereko sapʼ soraekan tahẽkan Rehobiam do onko sãote galmaraoketʼteye menkeda, “Sopolhawạńpe onko hoṛ do cetʼ iń roṛ ruạṛakoa?”

⁷ Onkoko roṛ ruạṛadea, “Teheń onko hoṛko sãote bhagem beoharte onkom kusi ocoko ar onkoakʼ nehõr joṅakʼem ańjomtako enḍekhan onko do jao okte amren golam menteko tahena.”

⁸ Menkhan Rehobiam do murubbikoakʼ solha bae hetawatʼte juạn koṛako tulucʼe solhawana, okoe do acʼ sãoteko haralen ar uniko sapʼsorae kan tahẽkan.

⁹ Uni do onkoe metatʼkoa, “Hoṛko meneda, ‘amren ạpum okaṭakʼ hamal arãṛe gokʼ akawatʼle ona do ńitokʼ rawal kataleme.’ Niạ babotre apeakʼ sopolha do cetʼ? Abo do cetʼbon roṛ ruạṛakoa? ”

¹⁰ Onko juạnkoko roṛ ruạṛadea, “Okoeko hoṛ do amren ạpumakʼ hamal arãṛ rawal reakʼ kathako menetʼ onkom metakoa, ińakʼ sicʼ kạṭupʼ do ińren ạpuńakʼ ḍanḍa khon hõ moṭagea.

¹¹ Ar amren ạpum okaṭakʼ hamal arãṛe ladeyatʼko tahẽkan ona do arhõ hamal ocoytakome. Amren ạpum do cạbukteye dalletʼkoa menkhan am do kidiń kaṭkomkotem dalkoa.”

¹² Rajakʼ katha leka pe din hilokʼre Jerobiam ar sanam Israelko do Rehobiam ṭhenko senena.

¹³ Raj do murubbikoakʼ sopolha bae hetawatʼte ạḍi keṭecʼ kathateye roṛ ruạṛatʼkoa.

¹⁴ Ar onko juạnkoakʼ sopolha lekageye metatʼkoa, “Ińren ạpuń do apeakʼ arãṛe hamal ocoleda menkhan iń do artetʼgeń hamal ocoya. Ińren ạpuń doe cạbukteye dalletʼpea, menkhan iń do kidiń kaṭkomkoteń dalpea.”

¹⁵ Nonkate raj do hoṛkoakʼ katha bae luturada. Siloren Ạhiạ hotete Probhu Isor do Nabatren hopon Jerobiamakʼ oka kathae menletʼ ona purạu lạgitʼ Isor khonge noa ghoṭna do hoyena.

¹⁶ Israelkoko ńelkeda raj do onkoakʼ katha bae ańjomeda unre onko do rajko metadea, “Dạud cetanre jãhãn dạbiteakʼ do bạnukʼtalea. Jisạiren hopon cetanre aleakʼ ạidạri hõ bạnukʼtalea. E Israelko, ape do apan ạpin oṛakʼte ruạṛ calakʼpe. E Dạud, ńitokʼ amakʼ gusṭi do amtege ńel joṅme.” Onate Israelko do apan ạpin oṛakʼteko ruạṛ calaoena.

¹⁷ Menkhan Jihudạ gusṭirenko reakʼ atoko ar nagrahakore okoe Israelkoko girobasokʼ kan tahẽkan Rehobiam do onko cetanre rajokʼe ehopʼena.

¹⁸ Ar okoe do kạmi lạgitʼko jormoṭ ocokʼkan tahẽkan ar onko cetanre okoeyakʼ bhar tahẽkan Rehobiam do uni Adoram Israelko ṭhene kolkadea, “Menkhan onko do dhirite uniko tiń gocʼkedea. Unre Rehobiam raj do acʼakʼ rãt gạḍire decʼkate Jerusalemteye dạṛkeda.

¹⁹ Nonkate Israelko do Dạudren bõsko cetanreko hulkeda; ar teheń hạbicʼ hõ onkage menakʼa.