2Timothi 4 - সান্তালী বাইবেল

¹ Mạsire ruạṛ hijukʼ ar uniyakʼ raj reaṅ disạ dohoyte Isor samaṅre, okoe do jiwetʼko ar gocʼkoe bicạrko uni Jisu Mạsi samaṅre iń do noań hukumam kana.

² Isorakʼ katha lại jạhirme; batarre ar bin batarre, am do jao okte lại jạhir lạgitʼ sapṛao akae tahenme; ạḍi sobori salakʼ cetʼakote hoṛkoakʼ dosko udukʼakome, onko sontorkom ar sopolha emakom.

³ Nonkan okteko hijukʼa tinre hoṛko do sạriyakʼ reakʼ sikhnạt bako sahao daṛeakʼa, bickom akoakʼ sana purạu lạgitʼ nonkan aema gurukoko ḍạṅjoṅa okoe do onko kusi ocoko leka sikhnạtko emokʼ.

⁴ Onko do Isorakʼ sạriyakʼtetʼ reaṅ ańjom baṅkate kạhniko kusiyakʼa.

⁵ Menkhan am do sanamakʼre sambṛao akae tahenme, duk sahaome ar Mạsi reaṅ bhage sombat porcarme, ar Isor okako kạmiye emakatʼme ona purạume.

⁶ Ente iń do ńit hoń coḍor ocokʼ kana; ar ińakʼ gujukʼ okte do seṭer akana.

⁷ Bhage lạṛhại iń lạṛhại kana, iń lạgitʼ ṭhik akatʼ horre mucạtʼ hạbicʼ iń ńir calao akana ar Mạsiyakʼ dhorom biswạsiń sapʼ dohoakada.

⁸ Onate iń lạgitʼ dhorom reakʼ jit ṭupri do dohoakana. Bicạr dinre dhorom bikʼcạricʼ Probhu Isor do kuṛại lekate jit reakʼ ona malae danạńạ. Ar eken iń eskargeye danạńạ ona do baṅ, menkhan okoe soborikate uniyakʼ ruạṛ hijukʼ reakʼko koyokʼ horakatʼ onko sanamkoe danakoa.

Timothi nije lạgitʼ katha

⁹ Am do kurumuṭuime, jemon hakopako iń ṭhenem hecʼ daṛeakʼ,

¹⁰ ente Demas do nonḍenakʼ dhạrtiye dulạṛetʼkante iń bạgikate Thessalonikiteye calaoena. Ona chaḍa Kreskes do Galatiạteye calaoena ar Titus do Dalmatiạte;

¹¹ Eken Luk eskarge iń soṅgere menaea. Am do Mark soṅgekate ạgu darayem, ente ińakʼ kạmi lạgitʼ uniyakʼ do ạḍi jạruṛ menakʼa.

¹² Tikhikus do Ephesusteń kolkedea.

¹³ Troasre Karpos ṭhen hoṛmo reakʼ okaṭakʼ kicricʼ iń hiṛiń oṭoletʼ tahẽkan, hijukʼ jokhecʼ ona baṛe ạgu daraeme. Ona chaḍa guṛhe dohoakan puthiko, biseskaete hartare olakʼ, onako hõ soṅge daraeme.

¹⁴ Okoe Aleksander do tama reakʼe kạmikan uni do ińakʼ ạḍiye loksan akada. Uni okaṭakʼe ceka akatʼ ona do Probhu Isorgeye halawaema.

¹⁵ Am hõ uni khon sontorakae tahenme, ente uni do aleakʼ kathako ạḍiye tạkicʼ darametʼ tahẽkana.

¹⁶ Pạhil dhaoiń bicạr ocolenre okoe hõ bako goṛowạdiń tahẽkana, bickom sanamgeko bạgi giḍiwạdiń tahẽkana; ona do alo baṛe lekhakʼtako ma.

¹⁷ Menkhan Probhu Isor do iń sãoteye tahẽkana ar daṛeye dan ạdiń tahẽkana. Onate iń do purạte bhage sombatiń porcar daṛeakʼ tahẽkana ar sanam boṅgan hoṛ jạtrenkoko ańjomleda. Isor do dhạcri kulakʼ moca khone rukhiyạledińạ.

¹⁸ Probhu Isor do sanam bạṛicʼakʼ kạmi khone rukhiyạyińạ ar acʼakʼ serma rajreye idi seṭerińạ. Uniyakʼge ṭhonok hoyokʼtaema jug cetan jug. Amen.

Mucạtʼ katha

¹⁹ Priskilạ ar Ạkuilạ ar Onesiphoros gharońjrenko ińakʼ johar emakom.

²⁰ Erastus do Korinthreye tahẽyena, menkhan Trophimus do Miletusre ruạkʼgeń bạgi oṭoadea.

²¹ Am do kurumuṭuime rabaṅ din ạurire jemon nonḍem hecʼ daṛeakʼ. Eubulus ar Pudens ar Linus ar Klaudiạ ar joto boehakoko joharam kana.

²² Probhu Isor do am tulucʼ baṛeye tahenma. Isorakʼ daya ape tulucʼ tahẽakan tahenma.