2Timothi 2 - সান্তালী বাইবেল

¹ Ado E bachatiń, Mạsi Jisuakʼ dayate am do daṛeanicʼ hoyokʼme.

² Aema gohako talare ińakʼ mocate okako cecetʼakʼem ańjomakatʼ ona sapʼ dohoy lạgitʼ am do nonkan hoṛko jimạwakome one okoe do eṭakʼko hõko cetʼ daṛeako.

³ Mạsi Jisuren mitʼṭen lek lekanicʼ sipạhi leka am do ale sãote duk sahaome.

⁴ Lạṛhại senkate okoe hõ gharońj reakʼ do bako dạndikʼa, jemon sipạhi lekate okoeye bhurtikede uniye kusi ocoye.

⁵ Onkage haparaokʼ enecʼre seletʼkate jãhãege niạm lekate bae enecʼ khan uni do jid ṭupri bae ńama.

⁶ Mehnotetʼkan cacas hoṛge pạhilre do phosol reakʼ bhag hatao lek kanae.

⁷ Iń okań menetʼkan ona do alom bhabnakʼa, ente Probhu Isorge jotowakʼ reaṅ bujhạu lạgitʼ daṛeye emama.

⁸ Jisu Mạsi reaṅ noa katha disạ dohoyme, uni do gocʼko khone jiwetʼ beretʼ ocolena ar Dạud bõsren hoṛe tahẽkana. Okaṭakʼ bhage sombat iń porcaretʼkan onarege noa katha do ol menakʼa,

⁹ ar noa bhage sombat porcar iạte iń do duk sasetiń jomakada; ar dusiakatʼ hoṛ leka tol hõń tol ocolena. Menkhan Isorakʼ katha do baṅ tolakana.

¹⁰ Onate Isor okoeye bachao akatʼko onko lạgitʼ jotowakʼ iń sahao akada, jemon onko hõ Jisu Mạsi hotete kại khon bańcaoko ńam ar jaejug ṭhonokko hameṭjoṅ.

¹¹ Noa katha do sạrikana je, Mạsi tulucʼ bon gocʼ akan khan, enḍekhan uni tulucʼ jiwetʼ hõ bon tahena.

¹² Sombhurikate bon sahao daṛeakʼ khan, enḍekhan uni tulucʼ raj hõ bon calaoa. Ar uni bon baṅle khan, enḍekhan uni hõ aboe baṅbona.

¹³ Abo do bepạtiạrko bon hoylenre hõ uni do pạtiạricʼgeye tahena, ente acʼtetʼ do ohoe baṅ daṛelena.

Ạuṛiyakʼ kathate reṭepeṭekʼ reaṅ

¹⁴ Noako katha do hoṛko disạ ocokom. Ar Isor samaṅre sontorkom jemon ạuṛiyakʼ kathakote aloko reṭepeṭekʼ. Noa reakʼ do cetʼ damge bạnukʼa, bickom okoe onako ańjom onko doko bangla bhaṭokʼa.

¹⁵ Okoe cetanre Isor doe dhirpurge, metakʼme, okoeyakʼ do lajaokʼ reakʼ jãhãn karonge bạnukʼ onkan kạmiyạ hoṛ lekate ar sạriyakʼ reakʼ katha ṭhikteye beoharetʼkan onkan hoṛ leka apnartetʼ Isor samaṅre teṅgokʼ lạgitʼ kurumuṭuime.

¹⁶ Isor be bhokti ar bạṛicʼ kathako khon sahaṛokʼme, ente nonkan katha iạte hoṛkoakʼ monre Isor bhokti do kom idikʼa.

¹⁷ Okoe nonkan kathako roṛ onkoakʼ cecetʼakʼ do sea buḍurokʼ ghao leka pasnao idikʼa. Ar nonkan hoṛko talarege Humenaeos ar Philetus hõ menakʼkinạ.

¹⁸ Nukin do Isorakʼ sạriyakʼ khonkin pharak akana. Unkin dokin meneda, biswạsiko do gocʼko khon laharegeko beretʼakana. Nukin do adomkoakʼ biswạskin nosṭoyetʼtakoa.

¹⁹ Enrehõ Isorakʼ gathaoakʼ kajak rehetʼ do teṅgo akana, ar ona cetanre mohor chapakatʼ leka noa kathako ol menakʼa, “Probhu Isor do acʼrenkoe baḍaeyetʼkoa, ar Mạsi do Probhu mente okoeko hohowaekan onko do sanam lekan bedhorom kạmi khonko sahaṛokʼma.”

²⁰ Eken napṛakʼ oṛakʼrege sona ar rupạ reakʼ bhajanko tahena ona do baṅ, menkhan kaṭ ar hasa reakʼ bhajan hõ tahengea. Onako modre adomakʼ do manot lạgitʼ ar adomakʼ do bemanot lạgitʼ beoharokʼkana.

²¹ Okoe do noako bemanotakʼ bhajan leka kanko, onko khon pharakokʼte jãhãe apnare saphakʼ enḍekhan uni do nonkanakʼ bhajan lekae hoyokʼa okaṭakʼ do manot lạgitʼ beoharokʼkan. Sonot lạgitʼge uni doe bachao doho ocokʼa, uni do Probhu Isorakʼ kạmireye lagaokʼa ar sanam lekan bhage kạmi lạgitʼ tear akane tahena.

²² Juạn umer reakʼ bạṛicʼ sanako khon ńirjoṅme ar sapha ontorte okoe do Probhu Isorko hohowaekan onko tulucʼ dhorom, pạtiạr, dulạṛ ar suluk baṛe khudạume.

²³ Lelha, hohakʼ ar reṭe peṭekʼre alom seledokʼa, ente am dom baḍaegea onako do jhogṛae janam ocoya.

²⁴ Okoe doe Probhu Isorren gutikan, uni do jhogṛakʼ baṅ lektaea, bickom sanamkore daya tahentaema. Uni do eṭakʼko cetʼako reakʼ daṛe ar sahao gun tahen hoyokʼtaea.

²⁵ Okoe uni upạrteko teṅgokʼ onko do mạ̃hir salakʼe cetʼako ma. Ona cecetʼakʼ do noa asteye emakoma, Isor do mon ạcur reakʼ ạte emakote onko do Isorakʼ sạriyakʼtetʼ reakʼ khạndritetʼ jemonko baḍae daṛeakʼ.

²⁶ Onate onko do Soetanakʼ jhạli khonko ńir paskaokʼa, ente Soetan do acʼakʼ sana purạu lạgitʼge onkoe sapʼ dohoakatʼko tahẽkana.