1 Thessalonikikko 5 - সান্তালী বাইবেল

^1-2 E boehako, oka okte ar oka dinre ona hoyokʼa, ona reaṅ thoṛa olape reakʼ do jãhãn jạruṛ bạnukʼa. Ape do pusṭạutepe baḍaegea, ńindạ cetʼleka kombṛoe hijukʼa, onkage Probhu Isorakʼ ona din hõ hijukʼa.

³ Ar tinre hoṛko mena, “Suluk hoyakana, botor reakʼ do cetʼge bạnukʼa,” Unre bhạrti hoṛmo akan maejiuko acka bedon rakapʼako leka onko hoṛ doko ḍahao maraokʼa. Ar oka lekate hõ bako rukhiyạ daṛeakʼa.

^4-5 Menkhan E boehako, ape do ńutre bạnukʼpea, onate ona din do kombṛo leka hecʼ paṛao apea. Ape sanamkoge marsal ar sińren hoṛ kanape. Ńindạ se ńutren hoṛ do bon baṅkana.

⁶ Onate eṭakʼko leka alo bon jạpitʼ joṅma, bickom jagwar akae bon tahente apnar bon sambṛaokʼma.

⁷ Okoeko jạpid onko do ńindạgeko jạpida, ar okoeko bulokʼ onko do ńindạgeko bulokʼa.

⁸ Menkhan abo do sińren hoṛ kanabon; onate koṛam aḍ lạgitʼ pạtiạu ar dulạṛte koṛam aḍkate ar bohokʼ aḍ lạgitʼ bańcaokʼ reakʼ as bohokʼre horokʼkate delaṅ apnar bon sambṛaokʼma.

⁹ Sạjại ńam lạgitʼ do baṅ bickom aboren Probhu Jisu Mạsi hotete bańcao ńam lạgitʼge Isor doe ṭhik dohoakatʼ bona.

¹⁰ Mạsi do abo lạgitʼe gocʼlena, onate jiwetʼ bon tahen ar bon gujukʼ, abo do jemon uni tulucʼ jiwetʼ bon tahen.

¹¹ Onate ńitokʼ okape cekayetʼkan onkage mimitʼko udgạu emakope ar ape mimitʼko benao rakabokʼpe.

Mucạtʼ katha

¹² E boehako, nehõrape kanale, okoe ape talareko mehnotetʼkan, ar Probhu Isorreko calaoetʼpe arko sikhạu paṛhaoetʼpe, onko baṛe manotkope.

¹³ Onko okako cekayetʼkan ona lạgitʼ dulạṛ monte manotkope. Ar ape apere sulukte tahenpe.

¹⁴ E boehako, ale do noale sikhạuetʼpe kana, okoeko kuṛhiạge onko sontorkope; ar okoeyakʼ dil bạnukʼtako onko do dil emakope; okoeko nijorge onko goṛowakope ar sanamko secʼ sombhurikate sapahaope.

¹⁵ Ńelpe, okoe hõ bạṛicʼ bodol bạṛicʼ do jãhãe aloe halawae ma. Ape do jaoge eṭakʼ sanamko lạgitʼ bhạlại reakʼ kurumuṭuipe.

¹⁶ Jao okte rạskạkʼpe,

¹⁷ ar mitʼ talao koejoṅpe,

¹⁸ jotowakʼre Isor gun manao joharaepe; ente Jisu Mạsi hotete ape lạgitʼ Isorakʼ monejoṅakʼ do nonka kangea.

¹⁹ Sonot Jiu do alope ĩṛĩjea.

²⁰ Okoeko nạbi lekate Isorakʼ kathako lạiyetʼkan, onkoakʼ kathako alope nihạ̃t giḍiya, bickom jotowakʼko biḍạu aṭkarpe.

²¹ Bhageakʼ sapʼ doho joṅpe,

²² ar joto lekan bạṛicʼakʼ khon sahaṛ akae tahenpe.

²³ Sulukren Isor do acʼgeye sonot utạrpema, ar aboren Probhu Jisu Mạsiye hijukʼre apeakʼ hoṛmo, mon ar jiu do purạ puri bin dusạn baṛe dohoytape.

²⁴ Disạipe, okoeye hohoakawatʼpe uni doe pạtiạrgea; ar uni do khạṭigeye onkaea.

²⁵ E boehako, ale lạgitʼ koejoṅpe.

²⁶ Dulạṛ monte jotoko joharakope.

²⁷ Iń do Probhu Isor ńutumte noań hukumape kana, jemon noa ciṭhi sanam boehako ṭhen paṛhao ańjomokʼ.

²⁸ Aboren Probhu Jisu Mạsiyakʼ daya ape tulucʼ baṛe tahen ma.