1 Thessalonikikko 4 - সান্তালী বাইবেল

Isor kusi ocoye reaṅ

¹ Ado E boehako arhoń mena, Isor kusi ocoye lạgitʼ cetʼleka colon lek kan ona sikhạuna do ale ṭhen khonpe ńamakatʼgea, ar sạrige ape do onkagepe colonetʼ kana. Enhõ Probhu Jisu secʼte solha arle nehõrape kana jemon arhõ bạ̃ṛti onka lekape colon.

² Probhu Jisu ṭhen khon ạidạri ńamkate okakole hukum akawatʼpe ona dope baḍaegea.

³ Isorakʼ monejoṅakʼ do noage, jemon sonotkope hoyokʼ, metakʼme sanam lekan loṭghuṭi khon sahaṛ akae tahenpe,

^4-5 ar okoe Isor bako baḍae akade onko boṅgan hoṛ jạtrenkoakʼ jel reakʼ sana leka do alope colona, bickom mimitʼko apnarakʼ hoṛmo sonot ar manot salakʼ sambṛao doho reakʼ cetʼ joṅpe.

⁶ Noa babotre okoe hõ jemon jãhãe boeha behok lekate aloe ṭhokaye. Ale do laharegele lại akatʼpea arle sontorakatʼpea, noako behokakʼ iạtege Probhu Isor doe sạjạipea,

⁷ ente Isor do be sapha lekate calakʼ lạgitʼ do baṅ, menkhan sonot lekate calakʼ lạgitʼgeye hohoakatʼ bona.

⁸ Onate okoe noa cecetʼakʼ bae hetawakʼ uni do manwa do baṅ, bickom okoe acʼren sonot Jiue dan akawatʼpe uni Isorge bae hetawae kana.

⁹ Boeha dulạṛ reaṅ olape do jãhãn jạruṛ bạnukʼtińạ, ente Isorge ape mimitʼko dupulạṛokʼe cetʼ akawatʼpea.

¹⁰ Ape do sạrige Makedoniạ disạmren sanam boehakope dulạṛetʼkoa. Menkhan E boehako, ape ṭhen aleakʼ nehõr do noage, apeakʼ dulạṛ do arhõ sareṛokʼtape ma.

¹¹ Okaṭakʼle hukum akawatʼpe onka leka nindhạn jion khemaope, ar apnarakʼ kạmire jamaṛ akae tahente apnar tite mehnot reakʼ ahkaokʼpe,

¹² jemon apeakʼ noa bhage cạl-colon iạte bahreren hoṛko ṭhen manotpe ńam ar eṭakʼkore ṭehãḍokʼ reakʼ jạruṛ alo hoyokʼtape.

Probhu Isorakʼ ruạṛ hijukʼ

¹³ E boehako, gocʼ akankoakʼ cetʼ hoyokʼ takoa ona reaṅ bin baḍaepe tahen do bale menjoṅ kana, jemon as bạnukʼtako hoṛko leka dukte alope hadosokʼ.

¹⁴ Jisui gocʼlena are jiwetʼ beretʼena mente bon pạtiạukʼkanre abo do noa hõ bon pạtiạukʼ kana, okoe Jisu tulucʼ kolom mitʼkateko gocʼ akan Isor do onko hõ Jisu sãoteye idikoa.

¹⁵ Probhu Isorakʼ cecetʼakʼ lekatege apele lạiyape kana, okoe jiwetʼ menakʼ bon ar Probhu Isorakʼ ruạṛ hijukʼ hạbicʼ jiwetʼ bon tahen, abo do oka lekate hõ onko gocʼ akanko lahare oho bon calaolena.

¹⁶ Ar ãṭ aṛaṅte hukum são sãote maraṅ utạricʼ goḍetakʼ hoho ar Isorakʼ siṅgạ reakʼ saḍe soṅgete Probhu Isor do serma khone pheḍ hijukʼa. Ar okoe Mạsi tulucʼ mitʼkateko gocʼ akan onkoge pạhilreko jiwetʼ beredokʼa.

¹⁷ Ona tayom do okoeko jiwetʼ ar sarecʼ menakʼ bon, abo hõ sermare Probhu Isor sãote ńapamokʼ lạgitʼ onko tulucʼ rimilre bon rakapʼ ocokʼa. Ar nonkate abo do jaejug hạbicʼ Probhu Isor sãote bon tahena.

¹⁸ Ona iạte noako kathate ape apere jiwi raṛejtape.