1 Thessalonikikko 2 - সান্তালী বাইবেল

Thessalonikiạre Pạulakʼ kạmi

¹ E boehako, baḍaegeape, ape ṭhen aleakʼ calakʼ do ạuṛiyakʼ baṅ hoyakantalea.

² Ar noa katha hõpe baḍaegea, noa lahare ale do Philipi nagraharele khed ocolena ar bemanot hõle bemanot ocolena. Menkhan noa tạkicʼakʼko tahẽkanre hõ aboren Isor ṭhen khon dil ńamkate uniyakʼ bhage sombat reakʼ katha ale do khulạsategele lạiyatʼpe tahẽkana.

³ Aleakʼ solha do bulạuteakʼ do baṅkana, ar bạṛicʼ monsubạ hõ baṅa, se phor phunditeakʼ jãhãn katha hõ bale roṛeda;

⁴ bickom lek kanale mente bhage sombat baḍae ocoko reakʼ bhar Isor do alereye emakatʼte ona lekatele roṛeda. Manwa kusi ocoko lạgitʼ do baṅ menkhan okoe aboakʼ ontore biḍạu aṭkaretʼ uni Isor kusi ocoye lạgitʼgele roṛeda.

⁵ Baḍaegeape heṛem heṛem kathako do tishõ bale roṛakada, ar lalocakʼko okokate bulạuakʼ jãhãn katha hõ bale roṛakada, Isorge onaren goha do.

⁶ Hoṛko ṭhen khon, metakʼme ape ṭhen se eṭakʼ jãhãeko ṭhen khon sarhao ńam reakʼ do bale kurumuṭu akada. Ale do Mạsiren apostolko lekate aleakʼ ạidạri ape cetanrele khaṭao daṛekea,

⁷ menkhan ona bodolte cetʼleka gogo do acʼren gidrạkoe jotonetʼko, onkage ale hõ apeko talare tahen jokhecʼ lạlu bạcule beoharleda.

⁸ Apere khạndri dulạṛ menakʼtalete eken Isorakʼ bhage sombat moto do bale emapekana, bickom ape lạgitʼ apnarakʼ jiwi sudhạ emokʼ lạgitʼ hõ rạjigele tahẽkana, ente aleren do ạḍi dulạṛiạko kanape.

⁹ E boehako, aleakʼ mehnot ar kosṭo reakʼ katha do khạṭigepe disạ akada. Ape ṭhen Isorakʼ bhage sombat porcar jokhecʼ ale do siń ńindạle mehnot akada, jemon ape okoeren bojha hõ alole hoyokʼ.

¹⁰ Ar okoekope pạtiạu akan, ape tulucʼ aleakʼ beohar do, sonot, dhorom ar niphuṭge tahẽkana, ar onaren gohako do Isor ar apege.

^11-12 Baḍaegeape, cetʼleka apat do acʼren gidrạkoe udgạuetʼko ar jiwi raṛecʼe emakokan are bintiyako kan, onkage ale hõ ape mimitʼkole ematʼpea, jemon Isorren hoṛpe hoyokʼte lek lekape colon. Ente Isor do acʼakʼ rajosṭi ar ṭhonokren bhạgiyạdarko hoyokʼ lạgitʼe hohowape kana.

¹³ Ale do siń sạṭupʼ Isorle gun manao joharae kana, ente Isorakʼ katha ańjomkate tinrepe pạtiạulena unre manwawakʼ katha mente do baṅ, menkhan Isorakʼ katha mentegepe ataṅkeda. Ar sạrige ona do Isorakʼ katha kangea. Ape okoepe pạtiạu akan, apeakʼ ontorrege ona katha doe kạmiyeda.

¹⁴ E boehako, Jihudạ Prodesre Mạsi Jisure kolom mitʼakan Isorakʼ oka manḍerko menakʼ, onkage ape hõpe hoyakana. Jihudikoakʼ tite onko do oka duk ar kosṭoko jomakatʼ, onkage ape hõ apnar disạmren hoṛkoakʼ tite duk ar kosṭope jomakada.

¹⁵ Onko Jihudikoge Probhu Jisu ar nạbikoko gocʼ letʼkoa, ar ale hõko khedletʼlea. Onko do Isorko monduk ocoakadea, ar sanam manwako cetanre bạiri mon menakʼtakoa.

¹⁶ Onko do aleko tạkicʼ darametʼlea jemon boṅgan hoṛ jạtrenko kại khon bańcaoko lạgitʼ jãhãn kathako alole lại daṛeako. Nonkate onko Jihudiko do siń sạṭupʼ kại cetan kạiko bojha joṅkana, ar Isorakʼ edre do purạte onkore hecʼ paṛaokʼ kana.

Biswạsiko ńelko lạgitʼ Pạulakʼ gagoj

¹⁷ Ado E boehako, mon secʼte baṅre hõ hoṛmo secʼte ape ṭhen khon thoṛa ghạṛicʼ lạgitʼle begar akana. Onate gagoc mon salakʼle kurumuṭuleda jemon arhõ ape tulucʼle ńepel ńapam daṛeakʼ.

¹⁸ Onate ale do, asokaete iń Pạul do ạḍi dhaoge ape ṭhen hijukʼiń menletʼ tahẽkana, menkhan Soetan do aleye tạkicʼ daramletʼlea.

¹⁹ Ente aboren Probhu Jisui hijukʼre apege cetʼ uni samaṅre aleakʼ as, rạskạ ar ṭhonok reakʼ mukuṭ dope baṅkana?

²⁰ Sạrige, apege aleakʼ ṭhonok ar apege aleakʼ rạskạ do.