1 Samuel 9 - সান্তালী বাইবেল

Sạul do raj hudạreye ojokʼ bahal ocokʼkan

¹ Kis ńutuman Benjạmin gusṭiren mitʼṭen manotan kisạ̃ṛ hoṛe tahẽkana. Ar Kis do Abiyelren hopone tahẽkana, Abiyel do Seroren hopon, Sero do Bekoratren hopon ar Bekorat do Aphihelren hopone tahẽkana.

² Kisren do Sạul ńutuman mitʼṭen hopone tahẽkantaea. Uni do juạn ar ńelokʼte ạḍi napae koṛae tahẽkana. Israelko modre uni lekan ńelokʼte mońj do ar okoe hõ bako tahẽkana. Uni do eṭakʼko khon mitʼ phuṭ usule tahẽkana.

³ Sạulren apattetʼ Kisren tinạkʼ gadha eṅgako tahẽkan onko do mitʼ dinko atʼena. Onate Kis do acʼren hopon Sạule metadea, “Am do mitʼṭen guti soṅgekate gadha eṅga sendrako lạgitʼ calakʼme.”

⁴ Unre Sạul do sendra sendrate Ephrayim buru ṭoṭha ar Salesa ṭoṭhakoteye calaoena, menkhan onko do bae ńamletʼkoa. Ona tayom unkin do Salim ṭoṭhatekin senena, menkhan onḍe hõ gadha eṅgako do bạkin ńamletʼkoa. Ona tayom unkin do Benjạmin ṭoṭhatekin calaoena, ar onḍe hõ bạkin ńamletʼkoa.

⁵ Unkin do tinre Suph ṭoṭhatekin boloyena unre Sạul do acʼ soṅgeten gutiye metadea, “Alaṅ do dela laṅ ruạṛ calakʼa. Arbaṅ khan baba do hoedaṛeakʼa gadha eṅgakoakʼ cintạ badkate alaṅ lạgitʼe cintạkʼa.”

⁶ Menkhan uni guti doe menkeda, “Ńelme, niạ nagrahare Isorren mitʼṭen hoṛe tahena. Uni do sanamkoko manotea ar uni okae men ona do sạri sạrige hoyokʼa. Dela, alaṅ hõ uni ṭhen laṅ calakʼa. Hoedaṛeakʼa uni doe lại daṛeakʼa oka horte calakʼ hoyokʼ talaṅa mente.

⁷ Sạul do acʼren gutiye metadea, “Onḍe laṅ calakʼ khan tobe do uni hoṛ lạgitʼ cetʼ laṅ iditoraea? Alaṅakʼ thạilạkʼre oka jomakʼ tahẽkan ona ma cabayen. Isorren hoṛ emae leka jãhãn sandes hõ bạnukʼ talaṅa. Menkhan cetʼ menakʼtalaṅa?”

⁸ Uni gutiye roṛ ruạṛkeda, “Ńelme, iń ṭhen do pe gram rupạ menakʼa. Isorren hoṛ do onageń emaea, ar uni doe lại alaṅa oka horte calakʼ hoyokʼ talaṅa mente.”

⁹ (Lahateakʼ dinkore Israel disạmren jãhãe hoṛ Isor ṭhen khon jãhãnakʼ reaṅ baḍae joṅko men khan onko do calakʼ lahareko menetʼ tahẽkana, “Dela, ńeńelicʼ ṭhen bon calakʼa.” Ar ńitokʼ okoe do nạbiye men ocokʼkan uni do lahateakʼ dinkore ńeńelicʼe men ocokʼkan tahẽkana.)

¹⁰ Sạul do acʼren gutiye metadea, “Besgem menakada; dela, alaṅ hõ onḍe laṅ calakʼa.” Ar noa menkate unkin do Isorren hoṛ oka nagrahareye tahẽkan onḍekin senena.

¹¹ Ar nagraha reakʼ ona hortekin rakapʼ calakʼkan tahẽkanre unkin do adom kuṛiko sãotekin ńapamena. Onko kuṛiko do dakʼ loloko oḍok hijukʼkan tahẽkana. Unkin do onko kuṛikin kuliketʼkoa, “Ńeńelicʼ do cetʼ nonḍe menaea?”

¹² Onkoko roṛ ruạṛatʼkinạ, “Hẽ, menaegea; aben do thoṛa laha ńokʼ calakʼben ar usạrae ben. Uni do teheńge aleakʼ nagrahareye hecʼakana, ar boṭkocʼ coṭre hoṛko do teheń janwar samaṅokʼakʼko hoeocoya.

¹³ Aben do nagrahate ben bololen khange uni sãote ben ńapamokʼa. Arben ńelea uni do boṭkocʼte jom lạgitʼe rakapʼ calakʼ kana. Ar uni ạuriye calakʼ hạbicʼ hoṛko do bako jom-ńũiya, ente uni do samaṅakʼ jiniskoe ạsirbadakʼa; ar ona tayom okoeko hoho ocoakan onkoko joma. Aben do ńitge rakapʼ calakʼben, enḍekhan uni sãote ben ńapam daṛeakʼa.”

¹⁴ Niạ katha ańjomkate unkin do nagrahate kin rakapʼ calaoena. Ar nagraha talare senkatekin ńelkedea Samuel do boṭkocʼte rakapʼ calakʼ iạte ạkin secʼgeye hijukʼ kana. Ar horre uni tulucʼkin ńapamena.

¹⁵ Sạul hijukʼ laha hilokʼ Probhu Isor do Sạmuel ṭhen niạ kathae sodorleda,

¹⁶ “Gapa niạ jokhecʼ Benjạmin gusṭiren mitʼṭen hoṛ do am ṭheniń kolea. Ar am do ińren hoṛko metakʼme Israelkoren mukhiyạ hoyokʼ lạgitʼ unigem ojokʼ bahalea. Unige Philistikoakʼ ti khon ińren hoṛkoe bańcaokoa. Iń do ińren hoṛko secʼ iń moneakada, ente onkoakʼ rakʼjoṅakʼ do ińakʼ lutur hạbicʼ seṭer akana.”

¹⁷ Probhu Isor do Sạule ńelkede khan Sạmuele metadea, “Ńelme, nui kangeae uni hoṛ do, one uni reakʼ kathań lạiyatʼme tahẽkan. Nuige ińren hoṛkoe bicạrkoa.”

¹⁸ Sạul do phaṭok-duạr ṭhen Sạmuele kulikedea, “Dayakate lại ạlińme ńeńelicʼakʼ oṛakʼ do okare.”

¹⁹ Sạmuele roṛ ruạṛkeda, “Iń kangeạń ńeńelicʼ do. Am do iń lahate boṭkocʼre rakapʼ calakʼme, ente teheń aben do iń sãoteben joma. Ar gapa setakʼ doń bidạgotʼkabena ar amakʼ monre oka menakʼ onań lạiyama.

²⁰ Pe din lahare amren okoe gadha eṅgako atʼakan onko lạgitʼ do ar alom cintạkʼa; onko doko ńamakana. Israel disạm reakʼ sanam bhageakʼ jinisko do okoe lạgitʼ kana? Ona do cetʼ am ar am apatren bõsrenko lạgitʼ do baṅkana?”

²¹ Sạule roṛkeda, “Am do cedakʼ niạ katha dom mitạń kana? Israelkoakʼ sanam gusṭiko modre Benjạmin gusṭige sanam khon huḍiń utạrakʼ kana, ar iń do ona gusṭiren hoṛ kạnạń. Arhõ Benjạmin gusṭiren tinạkʼ bõsko menakʼle onako modre aleakʼ bõsren do celegele baṅkana.”

²² Samuel do unre Sạul ar uniren gutiye soṅgeketʼkinte jojom oṛakʼteko boloyena ar neota akanko modre joto khon manotakʼ jaegare unkine duṛupʼketʼ kinạ. Neota akanko do lekhare pe gel hoṛko tahẽkana.

²³ Ar okoe hoṛe isin akatʼ Samuel do uniye metadea, “Okaṭakʼ jel do begar dohokakʼ lạgitʼ iń metatʼme tahẽkan ona ạguime.”

²⁴ Onate uni do senkate bulu ar ona sãoteakʼ jel ạgukate Sạul samaṅreye dohokeda. Ar Samuel do Sạule metadea, “Noa do am lạgitʼge doho akan tahẽkana; ne jomme. Am do teheń nonḍem joma iạte hoṛko neotako jokhecʼge noa do am lạgitʼiń begar dohoakatʼ tahẽkana.

²⁵ Inạ tayom onko do ona usul ṭhạ̃i khon nagrahateko ruạṛ hecʼena. Ar Samuel do acʼakʼ oṛakʼ reakʼ chatre Sạul sãoteye galmaraokeda.

²⁶ Dosar hilokʼ ạḍi setakʼre onko do jạpitʼ khonko beretʼena. Ar marsalen khan Sạul chatreye tahẽkanrege Samuel do uniye metadea, “Ma sapṛaokʼme ńitokʼ doń bidạkama.” Sạul ar Sạmuel dokin sapṛaoena arkin oḍok calaoena.

²⁷ Ar nagraha reakʼ simạna ṭhenkin seṭeren khan Sạmuel do Sạule metadea, “Amren guti do calao lahakʼ metaeme, menkhan am do thoṛa ghạṛicʼ lạgitʼ nonḍe teṅgonme. Isor okae menetʼ onań ańjom ocomea.” Onate uniren guti doe calao lahayena.