1 Samuel 6 - সান্তালী বাইবেল

Goha sinduk ruạṛ hijukʼkan

¹ Probhu Isorakʼ sinduk do Philisṭikoakʼ disạmrege tahẽyena.

² Tayomte Philisṭiren disạm cakʼlaoko do naekeko ar gonokko hohoatʼkote onko ṭhenko kuliyana, “Probhu Isorakʼ sinduk do bon cekaea? Ado ma lạiyalepe, ona do oka lekate acʼakʼ jaegarele kol ruạṛkakʼa?”

³ Onkoko menkeda, “Israelkoren Isorakʼ sinduk kol ruạṛpe menetʼ khan ekenakʼ do alope kol ruạṛkakʼa. Ape do khạṭige uni ṭhen mitʼṭecʼ dos- samaṅokʼakʼpe kola. Enḍekhan ape do mońjpe tahena arpe baḍae daṛeakʼa, cedakʼ uniyakʼ keṭecʼ ti ape cetan khon baṅ ocogokʼ kana mente.”

⁴ Unre disạm cakʼlaoko doko kuliyana, “Dos ńutumte samaṅokʼakʼ lekate ale do uni ṭhen cetʼle kola?” Onkoko menkeda, “Philisṭiren disạm cakʼlaokoakʼ lekha lekate ape do mõṛẽ goṭecʼ sona reakʼ ojo ar mõṛẽ goṭecʼ sonaren goḍo kolgotʼkakope, ente hoṛko cetanre ar onkoren disạm cakʼlaoko cetanre inạ mitʼ lekan dukge hecʼakana.

⁵ Okaṭakʼ ojo ruạ do apeakʼ hoṛmore hoyakan ar okoe goḍoko apeakʼ disạmko jarkharetʼkan onkoakʼ muṭhạn benaope ar Israelkoren Isor mạhimawaepe. Ado pasecʼ uni do ape cetan khon ar aperen Debotako ar disạm cetan khon acʼakʼ keṭecʼ tiye ocogtaea.

⁶ Ape do Pharao ar misriko leka apeakʼ mon do cedakʼpe keṭecʼetʼtapea? Israelkoren Isor do misriko tinre lelhae benaoletʼko unre onko do Israelkoko sen ocowatʼko tahẽkana, arko senlena.

⁷ “Ńitokʼ ape do mitʼṭecʼ nãwã sagaṛ benaope ar toa kin emokʼ nonkan barea gại hataokinpe one unkin cetanre tishõ arãṛ baṅ lade akawatʼkin. Ar unkin do ona sagaṛrepe joṛaokinạ, menkhan unkinren mĩhũ hopon do unkin khonpe ocokʼkinạ.

⁸ Ona tayom Probhu Isorakʼ sinduk do ona sagaṛ cetanrepe dohoya ar dos ńutumte samaṅokʼakʼ lạgitʼ okako sona reakʼ jinis Probhu Isor ńutumtepe kol onako do mitʼṭecʼ baksare sinduk aṛerepe dohoya. Ar nonkape kolgotʼkakʼa jemon ona sinduk do calakʼ.

⁹ Ar noa sinduk do apnar disạm reakʼ ḍaharte Bet-semeste calakʼ enḍekhanpe bujhạu daṛeakʼa, noa duk do Probhu Isor secʼ khonge hecʼakawatʼ bona. Menkhan ona horte baṅ calakʼ enḍekhan bujhạupe abo cetanre niạ duk do uni khon baṅ hecʼakana, noa do emontege abore paṛao akana.”

¹⁰ Onko do unre onkageko kạmikeda. Hoṛko do toa emokʼ barea gại ạgukate sagaṛreko joṛaoketʼkinạ ar unkinren mĩhũ do oṛakʼreko aṭkao dohokatʼkinạ.

¹¹ Ona tayom onko do ona sagaṛ cetanre Probhu Isorakʼ sindukko dohokeda ar ona aṛere ona baksa hõ one onare sonaren goḍo ar sona reakʼ ojoko tahẽkan.

¹² Ar unkin gại do unre leṅga ar jojomsa secʼ ghańjeṛ baṅkate bhokrao bhokraote sojhe ḍaharte Bet-semes secʼkin calao idiyena. Ar Philisṭiren disạm cakʼlaoko hõ sagaṛ tayom tayomte Bet-semes reakʼ simạna hạbicʼko calaoen.

¹³ Unre Bet-semesren hoṛko do buru tala otetre guhumko gegetʼkan tahẽkana. Arko koyokʼketʼ khan sindukko ńelńamkeda ar ạḍiko kusiyena.

¹⁴ Bet-semesre hecʼkate sagaṛ do Josuạwakʼ khet talare mitʼṭecʼ maraṅ okocʼ dhiri aṛere teṅgoyena. Ar Israelko do ona sagaṛ reakʼ kaṭte unkin gại do Probhu Isor ńutumte jeredokʼ samaṅokʼakʼko samaṅkeda.

¹⁵ Inạ lahare Liwiko do Probhu Isorakʼ sinduk ar sona reakʼ jinis sudhạ baksako pheḍketʼte ona maraṅ dhiri cetanreko dohokeda. Ar enhilokʼ Bet-semesren hoṛko do Probhu Isor ńutumte jeredokʼ samaṅokʼakʼko samaṅkeda.

¹⁶ Philisṭikoren onko mõṛẽ goṭen disạm cakʼlaoko do jotowakʼ ńelkate enhilokʼge Ekronteko ruạṛ calaoena.

¹⁷ Probhu ńutumte dos-samaṅokʼakʼ lekate Philisṭiko do okako nagrahako khon mitʼṭecʼkate sona reakʼ ojoko kolletʼ tahẽkan onako do hoyokʼ kana Asdod, Gasa, Askilon, Gad ar Ekron.

¹⁸ Onko mõṛẽ goṭen rapajko tabere Philisṭikoakʼ do mõṛẽ goṭecʼ pạcri esetʼ nagraha ar onako são reakʼ begor pạcri atoko khon sonaren goḍoko kolletʼkoa. Philisṭikoakʼ ṭoṭha do tahẽkana Bet-semesre Josuạwakʼ khet tala reakʼ maraṅ dhiri hạbicʼ, one ona cetanre onko do Probhu Isorakʼ sindukko pheḍ doholetʼ tahẽkan. Ar ona do teheń hạbicʼ hõ onḍege menakʼa.

¹⁹ Bet-semesren adom hoṛ do Probhu Isorakʼ sinduk bhitri secʼko oyoṅletʼte Probhu Isor do onkoe gocʼ giḍikatʼkoa. Uni do unre onḍenko mõṛẽ hajar eaegel hoṛe gocʼketʼkoa. Are ńẽtʼletʼkote hoṛko do rakʼ homorko ehopʼena.

²⁰ Onkoko menkeda, “Nui sonot Probhu Isor samaṅre do okoeye ṭikạu tahẽdaṛeakʼa? Ńit khon uni ṭhen do okoeye kol ocokʼa?”

²¹ Ona tayom onko thoṛa hoṛkoante Kiriạt-Jearimren hoṛko ṭhenko roṛgotʼkada, “Philisṭiko do Probhu Isorakʼ sindukko ruạṛgotʼ akada. Ar pheḍ hijukʼte sinduk do ape ṭhen idipe.”