1 Samuel 5 - সান্তালী বাইবেল

Philisṭiko talare Probhu Isorakʼ goha sinduk

¹ Philisṭiko do Isorakʼ sinduk Ebeneser khon Asdod nagrahateko idikeda.

² Isor reakʼ sinduk onko do Dagonakʼ mundilte idikate Dagonakʼ muṭhạn aṛereko dohokada.

³ Dosar hilokʼ hoṛko do setakʼre beretʼkateko ńelkeda Dagon do Probhu Isorakʼ sinduk samaṅre otre taberteye bhindạṛ akana. Ar unre onko do Dagonakʼ muṭhạnko teṅgoketʼte acʼakʼ jaegareko dohokeda.

⁴ Ona dosar hilokʼ hõ onko do ạḍi setakʼre beretʼkateko ńelkeda Dagon do Probhu Isorakʼ sinduk samaṅre otre taberteye bhindạṛ akana. Uniyakʼ ti ar bohokʼ do rạputʼkate duạr ganaḍe cetanre ńur akana, ar hoṛmo do goṭage menakʼa.

⁵ Noa iạte Dagonren naeke ar eṭakʼ sanam hoṛko do Asdodren Dagonakʼ mundilre bolokʼ jokhecʼ teheń hạbicʼ okoe hõ ona mundil reakʼ duạr ganaḍere do bako lebedokʼ kan tahẽkana.

⁶ Ar Probhu Isor do Asdod ar ona aḍepase jaegaren hoṛkoe toras ocoketʼkoa ar ojo ruạkoteye ńẽtʼketʼkoa.

⁷ Niạ ńelte Asdodren hoṛko menkeda, “Israelkoren Isorakʼ sinduk do abo ṭhen ar babon dohokakʼa, ente uni do abo ar aboren debota Dagon cetanre ạḍi bạṛicʼe kạmi akada.”

⁸ Onate onko do hoṛ kolkate Philisṭikoren sanam disạm cakʼlaoko mitʼ ṭhen hoho ạgukateko kuliketʼkoa, “Israelkoren Isorakʼ sinduk dobon cekaea?” Onkoko menkeda, “Israelkoren Isorakʼ sinduk do Gad nagrahate idikʼma.” Onate Asdodren hoṛ do Israelkoren Isorakʼ sinduk do Gadteko idikeda.

⁹ Onko do sinduk onḍeko idiketʼ khan Probhu Isor do ona nagraha upạrte tiye rakapʼketʼtaea. Onate onḍenko hoṛ do ạḍiko botorena. Isor do nagraharen kạṭicʼ lạṭu sanam hoṛkoe hạnketʼkoa, ar onate sanamkoge ona ojo ruạ ńamketʼkoa.

¹⁰ Unre onko do Isorakʼ ona sinduk Ekron nagrahateko kolgotʼkada. Isorakʼ sinduk do Ekronte idiyen khan Ekronren hoṛko do ãṭ aṛaṅteko menkeda, “Onko do abo ar aboren hoṛko gocʼ bon lạgitʼge Israelkoren Isorakʼ sinduk do abo ṭhenko ạguakada.”

¹¹ Onate onko do hoṛ kolkate Philisṭikoren disạm cakʼlaoko mitʼ ṭhen hoho jarwakateko metatʼkoa, “Israelkoren Isorakʼ sinduk do nonḍe khon kol giḍikakʼpe. Ona do acʼakʼ jaegatege ruạṛ calakʼma. Ar baṅ khan ona do abo ar aboren hoṛkoe gocʼ cababona.” Isor do ona nagrahae hạnletʼ tahẽkante hoṛkoakʼ monre gujukʼ botor do bololena.

¹² Ar okoeko hoṛ bako gocʼlen onko hõ ona ojo ruạ do ńamletʼkoa. Onate nagraharen hoṛkoakʼ rakʼ homor reakʼ aṛaṅ do serma hạbicʼ seṭerena.