1 Samuel 31 - সান্তালী বাইবেল

Sạul ar Jonathanakʼ gujukʼ

¹ Philisṭiko do Israelko tulucʼko lạṛhạiyena ar Israelko do onko samaṅ khonko dạṛkeda. Onko modren ḍherkoge Gilboa burure Philisṭiko hoteteko gocʼ ocoyena.

² Philisṭiko do Sạul ar uniren hoponko khudạu idiketʼkote Jonathan, Abinadab ar Malkisau tekoko gocʼketʼkoa.

³ Ona tayom Sạul upạrte lạṛhại do artetʼ sạrdi idiyena. Dhinkiạko hõ uniko ńamkedea arko hạnkedea.

⁴ Unre Sạul do acʼren khanḍa bhanḍa asenicʼ hoṛe metadea, “Amakʼ tarwaṛe oḍokkate ińakʼ hoṛmo sobokʼ tabme. Ar baṅkhan onko bin khatna hoṛko hecʼkateko bemanotińạ.” Menkhan uniren khanḍa bhanḍa asenicʼ hoṛ do bae rebenlena, ente uni do ạḍitetʼ botor caṛhao akawade tahẽkana. Unre Sạul do acʼakʼ tarwaṛe cetanreye bhindạṛena.

⁵ Uni khanḍa bhanḍa asenicʼ do Sạule gocʼena menteye ńelkede khan acʼ hõ acʼakʼ tarwaṛereye bhindạṛena are gocʼena.

⁶ Nonkate enhilokʼ do Sạul, ar uniren pea hopon, ar uniren khanḍa bhanḍa akʼsenicʼ ar uni sãoten hoṛko mitʼ domteko gocʼena.

⁷ Ar okoe Israelko do buru lodam reakʼ eṭakʼ aṛe secʼreko tahẽkan ar okoe do jordan gaḍa hanasa aṛereko tahẽkan onko do tinreko ńelkeda Israelren lạṛhại phạdko dạṛkeda, ar Sạul ar uniren hoponko gocʼ ocoyena unre onko hõ akoakʼ nagraha bạgikateko dạṛkeda, ar Philisṭiko do hecʼkate onako nagrahako dokholkeda.

⁸ Dosar hilokʼ Philisṭiko do gocʼ hoṛkoakʼ jinisko luṭ idijoṅ lạgitʼko hecʼen khan Gilboa burure Sạul ar uniren pea hoponkoakʼ mạ̃ṛĩ giḍi akanko ńelkeda.

⁹ Onko do Sạulakʼ bohokʼko makʼ kuṭrạketʼte uniyakʼ kicricʼ ar khanḍa bhanḍako hataoketʼtaea. Ar niạ rạskạ sombat do onkoren boṅga oṛakʼkore ar hoṛko ṭhen lại pasnao lạgitʼ Philisṭi disạm reakʼ sanam jaegate sombatko kolkeda.

¹⁰ Ona tayom Sạulakʼ khanḍa bhanḍa hataokate Astarot reakʼ mundilreko dohokada ar uniyakʼ hoṛmo do Betsan nagraha reakʼ bhitreko akakada.

¹¹ Philisṭiko Sạul cetanre okako cekaketʼ ona katha do Jabes Gileadren hoṛko ańjomkeda.

¹² Unre onḍenko dilgiriạ hoṛ do goṭa ńindạ taṛamate senkate Betsam reakʼ pạcri bhit khon Sạul ar uniren hoponkoakʼ mạ̃ṛĩko pheḍkeda ar Jabeste idikate onḍeko atar giḍikeda.

¹³ Ona tayom onko do onkoakʼ jaṅko hataokate onḍenakʼ mitʼṭecʼ hesel dare buṭạreko topakada ar eae mãhã hạbicʼko upạskeda.