1 Samuel 30 - সান্তালী বাইবেল

Dạud do Amelikiko tulucʼe lạṛhạikan

^1-2 Dạud do acʼren hoṛkoante tesar hilokʼ Siklagteye seṭerena. Menkhan inạko dinre Amalekiko do Negebre Philisṭikoakʼ ṭoṭhare ar Siklagreko luṭ akatʼ tahẽkana. Onko do Siklag ńẽtʼkate seṅgelteko ḍahao marao akatʼ tahẽkana ar onḍeko tahẽkan sanam maejiuko ar huḍiń lạṭu joto do bondikateko idiakatʼko tahẽkana. Menkhan gocʼ do okoe hõ bako gocʼakatʼko tahẽkana, eken ruạṛ calakʼ jokhecʼko soṅge toraletʼko tahẽkana.

³ Dạud do acʼren hoṛkoante Siklagteye ruạṛ hecʼen khan nagraha do seṅgelte ḍahao marao akatʼe ńelkeda ar akoren bạhuko, hoponko, hoponerako do bondikateko idiakatʼkoa.

⁴ Noa ńelte Dạud ar uniren hoṛko do kạuạ rạuwạ rarakʼko ehopʼena. Ar nonka hoyena rakʼ rakʼteko aralkoral cabayena.

⁵ Dạudren banar bạhu, Jisreyelren Ahinoam ar Karmel Nabalren rạnḍi bạhu Abigael tạkin hõkin bondi idioco akan tahẽkana.

⁶ Unre Dạud do ạḍi muhinreye paṛaoena, ente hopon ar hoponerako iạte uniren hoṛkoakʼ mon do Dạud cetanre nonka haṛhatʼentakoa, onko do dhirite Dạud tińe lạgitʼko roṛ baṛayetʼ tahẽkana. Menkhan Dạud do acʼren Probhu Isor cetanre bhorsakate ontorre dile ńam ruạṛkeda.

^7-8 Unre Dạud do Ahimelekren hopon maraṅ naeke Abiathare metadea, “Iń ṭhen Ephod ạguiyme.” Ar ona ạgu hoyen khan Dạud do Probhu Isore kulikedea, “Iń do cetʼ onko hạhạnkoń khudạukoa? Onko do cetʼ iń sapʼ tiyokʼ daṛeakoa?” Probhu Isore roṛ ruạṛadea, “Hẽ, do khudạukom. Ar khạṭigem sapʼ tiyokʼkoa ar sanamkom bańcao daṛeakoa.”

⁹ Unre Dạud do acʼren turui sae hoṛe soṅgeketʼkoa. Onko do Besor ńutumanakʼ mitʼṭecʼ buru nala ṭhenko seṭerena. Ar onḍe thoṛa hoṛkoe doho oṭokatʼkoa.

¹⁰ Ente barsae gan hoṛ do laṅga iạte ona nala do bako parom daṛeada. Menkhan Dạud do ponsae hoṛkoante bạirikoe khudạu idiketʼkoa.

¹¹ Uniren hoṛko do ṭạnḍire mitʼṭen misri hoṛko ńamkedea. Onko do Dạud ṭhenko ạgukedea ar jomakʼko emadete uni doe jomkeda.

¹² Ona tayom loa piṭhạ ar bar thoka kismisko jom ocokedea. Uni do pe siń pe ńindạ jomakʼ se ńũiyakʼ cetʼge bae jomakatʼ tahẽkana, onate niạko jomkate uni doe cerṭha ruạṛena.

¹³ Dạud do uni hoṛe kulikedea, “Am dom okaren hoṛ kana? Ar oka khonem hecʼakana?” Uni hoṛ doe menkeda, “Iń do mitʼṭen misri hoṛ kạnạń, Ar Amalekikoren mitʼṭen gutige. Teheń pe din khon iń doń ruạkʼ kana, onate ińren kisạ̃ṛ do ińe bạgi giḍiakadińạ.

¹⁴ Ale do Negeb reakʼ Korethikoakʼ dạkhin nakha reakʼ, Jihudạ reakʼ thoṛa hĩs ar Kaleb reakʼ dạkhin ṭoṭhate luluṭle senlena ar Siklog do seṅgeltele jharkhar akada.”

¹⁵ Dạude menkeda, “Onko luluṭko ṭhenem idi daṛeạńạ?” Uni doe roṛ ruạṛkeda, “Isor ńutumte kiriạwạńme bam gojeńa se ińren kisạ̃ṛ ṭhen bam jimạkạńạ. Enḍekhan iń do onko ṭheniń idimea.”

¹⁶ Uni do onko ṭhen Dạude idikedea. Unre onko do ṭạnḍire hanḍe nanḍeko pasnao akan, jojom arko ńũńũkan, ar bubulakʼ ńũkateko enecʼ sereń joṅkan tahẽkana, ente Philisṭikoakʼ disạm ar Jihudạkoakʼ ṭoṭha khon onko do ḍher jinisko luṭ ạguakatʼ tahẽkana.

¹⁷ Unre Dạud do enhilokʼ ạyupʼ bela khon ehopʼkate dosar hilokʼ ạyupʼ hạbicʼ onko sãoteye lạṛhạiyena. Onkoren cele hõ rukhiyạ do bako ńamleda, eken ponsae juạn koṛa do ũṭre decʼkateko dạṛ pạnḍucʼkeda.

¹⁸ Amalekiko okaṭakʼ luṭkateko ạguletʼ ona do jotowakʼgeye rukhiyạkeda. Ar acʼren banar bạhukin hõe bańcaoketʼkinạ.

¹⁹ Onkoren thoṛa se ḍher umerren hoṛ, onkoren hopon ar hoponerako ar okako jinis Amalekikoko luṭ idiletʼ ona do jotowakʼgeye ruạṛ ạgukeda.

²⁰ Uni do Amalekikoren sanam ḍaṅgrako bhiḍikoe ạguketʼkoa. Uniren hoṛko do eṭakʼ pal janwarko laha lahateko laga idiketʼkoa. Onko doko menkeda, “Noko do Dạudren luṭ jinis kanako.”

²¹ Okoe barsae hoṛ Besor nalare laṅga iạte Dạud sãote bako calao daṛeatʼ tahẽkan, onko ṭhen Dạud doe ruạṛ hecʼena. Onko hoṛ do Dạud ar uni sãoten hoṛko daram ạguko lạgitʼko oḍok hecʼlena. Dạud ar uniren hoṛko do onko ṭhenko seṭeren khan Dạud do onkoakʼ khoj khobore hataokeda.

²² Menkhan Dạud sãote okoe haḍrap hoṛko tahẽkan onkoko menkeda, “Okoe abo sãote bako senlen onko do ona rukhiyạ ạguakatʼakʼ khon do babo emakoa. Onko do eken akoren bạhu ar onkoren hopon ar hoponerakoko idikotakoma.”

²³ Dạude roṛ ruạṛkeda, “Baṅa, E ińren boehako, Probhu Isor okaṭakʼe emakawatʼ bon ona do alope nonkaea. Uni doe rukhiyạ akatʼbona ar aboren luluṭko aboakʼ tireye soprotketʼkoa.

²⁴ Apeakʼ niạko kathare okoehõ bako rạjikʼa. Okoe do lạṛhạiko senlen ar okoe do jinisko horhoyetʼ tahẽkan onko jotoge inạ mitʼ leka hạṭińko ńama.”

²⁵ Enhilokʼ khon Dạud do Israelko lạgitʼ ona lekage niạme ṭhikkeda ar teheń hạbicʼ hõ ona do onkage menakʼa.

²⁶ Siklogte ruạṛ hecʼkate Dạud do Jihudạ gusṭiren murubbiko ṭhen luṭteakʼ jinis reakʼ thoṛa hĩse kolkeda. Onko do uniren gateko tahẽkana. Uni do onko ṭhen niạ kathae roṛgotʼkada, “Probhu Isorren bạiriko ṭhen khon luṭ ạguwakʼ jinisko reakʼ thoṛa dan do ape ṭheniń kolkeda.”

²⁷ Ar okoe murubbiko ṭhen onako kol hoyen onako do Bethlehemrenko lạgitʼ, Negeb reakʼ Ramotrenko lạgitʼ, Jatirrenko lạgitʼ,

^28-31 Aroerrenkko lagitʼ, Sipmotrenko lạgitʼ, Estemoarenko lạgitʼ, Rakalrenko lạgitʼ tahẽkana. Ona chaḍa Jerameli ar Kenikoakʼ nagraharenko lạgitʼ ar Hormarenko lạgitʼ, Borasanrenko lạgitʼ, Athakrenko lạgitʼ, Hebronrenko murubbiko lạgitʼ hõ tahẽkana ar okako ṭhạ̃ire Dạud ar uniren hoṛko dãṛãletʼ tahẽkan onḍenko murubbiko ṭhen hõ uni do onakoe kolkeda.