1 Samuel 3 - সান্তালী বাইবেল

Probhu Isor do Samuele hohoaekan

¹ Huḍiń koṛa Samuel do Eli tabere tahẽkate Probhu Isore sapʼsoraekan tahẽkana. Ar onako dinre Probhu Isorakʼ katha do ḍher do baṅ ańjomokʼkan tahẽkana ar uniyakʼ dorson hõ mitʼ talao do bań ńamokʼkan tahẽkana.

² Un jokhecʼ Eliyakʼ mẽtʼ do nunạkʼ nijor idiyentaea, uni do ṭhikleka bae ńeńelkan tahẽkana. Mitʼ din ńindạ Eli do acʼakʼ jaegareye giticʼ akan tahẽkana.

³ Ar Isor ńutumte okaṭakʼ diuhe jeretʼ tahẽkan ona do un hạbicʼ hõ baṅ ĩṛĩcʼ akan tahẽkana. Unre Samuel do Probhu Isorakʼ oṛakʼreye giticʼ akan tahẽkana. Ona oṛakʼre Isorakʼ goha sinduk tahẽkana.

⁴ Un jokhecʼ Probhu Isor do Samuele hohoadea. Ar Samuel doe roṛ ruạṛkeda, “Nõkʼõe minạńgea.”

⁵ Noa menkate uni do Eli ṭhen ńir senkateye menkeda, “Minạńgea, am do cetʼ ińem hohoạń kana?” Eliye menkeda, “Baṅ, iń do bacoń hohoakatʼme. Am do senkate giticʼkokʼme.” Unre Samuel do senkateye giticʼena.

⁶ Probhu Isor do arhõ Samuele hohoadea ar Samuel do beretʼkate Eli ṭhen senkateye menkeda, “Minạńgea; am do cetʼ ińem hohoạń kana?” Eliye menkeda, “Baṅ, iń do bạń hohoakatʼmea. Do senkate giticʼkokʼme.”

⁷ Samuel do unhạbicʼ hõ Probhu Isor do bae orom akade tahẽkana; ar Probhu Isor hõ unhạbicʼ uni tulucʼ katha bae roṛakatʼ tahẽkana.

⁸ Probhu Isor do tesar dhao Samuele hohoadea ar Samuel do beretʼkate Eli ṭhen senkateye menkeda, “Iń do minạńgea, ar amgem hohoakadińạ.” Unre Eli doe bujhạu daṛeada uni do Probhu Isorgeye hohoaekana.

⁹ Ona iạte Eli do Samuele metadea, “Am do senkate giticʼ ruạṛokʼme. Ar niạ dhao uniye hohoam khan menme, ‘E Probhu Isor ma roṛme, amren guti doń ańjometʼgea.’ ” Unre Samuel do senkate acʼakʼ jaegareye giticʼ ruạṛena.

¹⁰ Ona tayom Probhu Isor do hecʼkate onḍeye teṅgoyena ar eṭakʼ dhao lekageye hohokeda, “Samuel, E Samuel.” Unre Samuele menkeda, “Ma roṛme, amren guti doń ańjometʼgea.”

¹¹ Probhu Isor do Samuele metadea, “Ńelme, Israelko talare nonkanakʼ iń cekae lạgidokʼ kana one uniyakʼ katha ańjomte sanamkoko comkao rakabokʼ.

¹² Iń do Eliyakʼ bõs reaṅ okako kathań roṛakatʼ ona reakʼ pạhil khon mucạtʼ hạbicʼ Eli upạrte jotowakʼgeń purạua.

¹³ Iń do uniń menakadea, bedhorom iạte uniren bõsko do jaejug hạbicʼ iń sạjạikoa. Eli doe baḍaekan tahẽkana, acʼren hoponkin do apnartege bohokʼre sạjạikin ạgu akawana, menkhan uni do sontorkin reakʼ bae kurumuṭuleda.

¹⁴ Ona iạte Eliyakʼ bõsko reaṅ iń do kiriạkateń meneda, janwar samaṅokʼakʼ se eṭakʼ jãhãn samaṅokʼakʼ hotete hõ uniyakʼ bõsko reakʼ behokakʼko do tisge baṅ puruchunokʼ takoa.”

¹⁵ Ar Samuel do setakʼ hạbicʼ giticʼgeye tahẽyena, ar ona tayom beretʼkate Probhu Isorakʼ oṛakʼ reakʼ duạrkoe jhicʼkeda; menkhan niạ dorson reakʼ katha Eli ṭhen lạlại do bae dilleda.

¹⁶ Unre Eli do uniye metadea, “E Samuel.” Samuele roṛ ruạṛkeda, “Ma roṛme.”

¹⁷ Eliye kulikedea, “Isor do cetʼe menakatʼ mea? Ar iń ṭhen ona do alom danaṅkakʼa. Uni okae menakatʼ ona reakʼ thoṛagan hõ iń ṭhenem danaṅ dohokakʼ enḍekhan uni do maraṅ sạjạiye emam ma.”

¹⁸ Unre Samuel do Eli sanamakʼ kathae lạiyadea, cetʼge bae oko dohokada. Ona ańjomkate Eli doe menkeda, “Uni doe Probhu Isor kana; uni oka bhageye hudisetʼ onage baṛeye onkaema.”

¹⁹ Nonkage Samuel doe hara idiyena ar Probhu Isor do uni sãoteye tahẽyena ar nạbi lekate roṛakʼ oka kathage Probhu Isor do bae ạuṛiyakʼ ocoletʼtaea.

²⁰ Onate Dan ṭoṭha khon Berseba hạbicʼ sanam Israelko doko baḍaekeda, Samuel do Probhu Isorren mitʼṭen nạbiye hoyakana.

²¹ Ar Probhu Isor do Silore arhõ dorsonte ńel ocokʼe ehopʼena ente Silore uni do acʼakʼ katha hotete Samuel ṭhene sodorokʼkan tahẽkana;