1 Samuel 29 - সান্তালী বাইবেল

Akis do Dạude kol ruạṛede

¹ Unre Philisṭiko do Ophekre akoren sanam lạṛhại phạdko jarwaketʼkoa. Ar Israelko do Jisrayelakʼ dakʼ jharna ṭhenko ḍerayena.

² Philisṭiren disạm cakʼlaoko do sae saeko ar hajarkoante laha secʼko calao idiyena, ar onko tayomte do Dạud ar uniren hoṛko.

³ Onko ńelte Philisṭikoren subedar doko kuliyana, “Noko Israelko do nonḍe cedakʼ menakʼkoa?” Akise menkeda, “Nui do Israelren raj Sạulren golam Dạud kanae. Nui do ḍher din ar bochor khon iń ṭhen menaea. Uni do Sạule bhiṅgṛạu akade tayom khon teheń hạbicʼ unire jãhãn dosge bạń ńam akada.”

⁴ Niạ katha ańjomkate Philisṭi subedarko do Akis cetanre raṅgaoenteko menkeda, “Nui hoṛ do ruạṛkaeme. Okare jaegam emakawade onḍegeye ruạṛ calakʼma. Abo sãote lạṛhại do bae sen daṛeakʼa. Uni do lạṛhại senkate abo upạrteye teṅgokʼa. Uniren mạlike kusi ocoye khan aboren hoṛkoakʼ bohokʼtegeye kusi ocoyea.

⁵ Nui do cetʼ uni Dạud doe baṅkana, one uni babotre enecʼateko sereńletʼ, ‘Sạul doe gocʼketʼkoa hajar hajar ar Dạud doe gocʼketʼkoa ojut ojut?”

⁶ Unre Akis do Dạud hohoadeteye metadea, “Jiwetʼ Probhu Isor ńutumteń metamkana, ińiń baḍaea am dom soṛa hoṛkana. Noko lạṛhại phạdko talare oḍok bolokʼ do iń nońjorre boge kangea. Amem hecʼen hilokʼ khon teheń hạbicʼ amre jãhãn behokakʼ do bạń ńelakada, menkhan eṭakʼ rapajko amre kusi do bạnukʼkoa.

⁷ Onate am do ruạṛ calakʼme; ar nonkan jãhãnakʼ alom kạmiya one onate Philisṭikoren rapajko am cetanre bekusi aloko tahen.

⁸ Unre Dạud doe kuliyana, “Menkhan iń do cetʼ iń caka akatʼte? Ińiń hijukʼ hilokʼ khon teheń hạbicʼ iń amren gutiyakʼ cetʼ dosem ńamakatʼte ińren mạlik maharajren bạiriko upạrte lạṛhại lạgitʼ bạń calao daṛeakʼa.”

⁹ Akise roṛ ruạṛadea, “Ińiń baḍaea iń ṭhen do Isorren mitʼṭen goḍet lekagem bhagea; enhõ Philisṭikoren rapajko iń soṅgete lạṛhại lạgitʼem calakʼ do bako khojkana.

¹⁰ Onate am ar amren mạlikren okoeko hoṛ am soṅgeteko hecʼakan ape do gapa setakʼre beretʼkate marsalokʼ são sãote oḍokʼ calakʼpe.”

¹¹ Onate Dạud ar uniren hoṛko do Philisṭikoakʼ disạmte ruạṛ calakʼ lạgitʼ setakʼreko beretʼena, ar Philisṭiko do Jisreyelteko rakapʼ calaoena.