1 Samuel 28 - সান্তালী বাইবেল

Sạule hadosokʼkan

¹ Dạud Siklagre tahen jokhecʼ Philisṭiko do Israelko upạrte lạṛhại lạgitʼ akoren lạṛhại phạdkoko jarwaketʼkoa. Unre Akis do Dạude metadea, “Khạṭigem bujhạu daṛeakʼ kana, am ar amren hoṛko do lạṛhại phạdko sãote seledokʼte iń sãote calakʼ hoyokʼtapea.”

² Dạude menkeda, “Bhagegea, amem ńela iń amren guti do cetʼ iń ceka daṛeakʼa mente.” Akise menkeda, “Bhagegea. Iń do jiwetʼ bhor ińren rurukhiyạyicʼ menteń dohomea.”

³ Noa laharege Samuel doe gocʼ akan tahẽkana, ar Israelren sanam hoṛ do uni lạgitʼko homor halaṅleda ar uniyakʼ nagraha Ramareko topa akade tahẽkana. Okoe gocʼ hoṛkoren jiu tulucʼ kathako roṛ ar bạṛicʼ jiuko sãote jopoṛaoko dohoy Sạul do nonkan hoṛko disạm khone laga ńirletʼko tahẽkana.

⁴ Philisṭiko do mitʼ sãoteko jarwa mitʼente Sunemreko ḍerayena. Ar Sạul hõ Israelren sanam lạṛhại phạdkoe jarwaketʼkote Gilboa burureye ḍerayena.

⁵ Philisṭiren lạṛhại phạdko ńelte Sạul do botor caṛhaoadea ar dhak dhakaokʼe ehopʼena.

⁶ Ar cetʼe cekaea mente Probhu Isor ṭhene kuliyana, menkhan Probhu Isor do kukmũte hõ baṅ, Urim ar Thumimte hõ baṅ se nạbiko hotete hõ bae roṛ ruạṛadea.

⁷ Unre Sạul do acʼren kạmiyạkoe metatʼkoa, “Nonkan mitʼṭen maejiu sendra ńamepe, okoe do gocʼ hoṛkoren jiu tulucʼ kathae roṛ daṛeakʼ, jemon uni ṭhen senkateń kuli daṛeae cetʼ iń cekaea mente.” Onkoko metadea, “Edonre onkan mitʼṭen maejiu menaea.”

⁸ Niạ katha ańjomkate Sạul do eṭakʼ lekan kicricʼe horokʼkeda ar acʼakʼ oprome okoketʼte bar hoṛ soṅgekate ńindạ jokhecʼ uni maejiu ṭhene senena. Ar uni maejiue metadea, “Am do boṅga bintikate gocʼ hoṛren jiu tulucʼ helmel dohoyte okoeyiń ńume uni nonḍem rakapʼ ocoyea.”

⁹ Unre maejiue menkeda, “Am do khạṭigem baḍaea Sạul do noako reaṅ cetʼe ceka akada mente. Okoe gocʼ hoṛren jiu sãote kathae roṛ se bạṛicʼ jiuko tulucʼ jopoṛaoe dohoy uni do nonkan hoṛko disạm khone laga ńir akatʼkoa. Enḍekhan cedakʼ am do iń lạgitʼ nonkanakʼ jhạli dom oḍaoeda jemon onate ińakʼ gujukʼ hoyokʼtiń?”

¹⁰ Unre Sạul do Probhu Isor ńutumte kiriạkateye menkeda, “Jiwetʼ Isor ńutumteń metam kana, niạ iạte am cetanre cetʼ sạjạige baṅ hijukʼa.”

¹¹ Khange uni maejiue menkeda, “Enḍekhan am lạgitʼ do okoeyiń rakapʼ ạguiyea?” Sạule menkeda, “Samuel ạguiyem.”

¹² Uni maejiu do Sạmuele ńelkede khan ạḍi garteye kikiạu gotʼkeda ar Sạule metadea, “Cedakʼem ṭhokakedińa? Am mam Sạul kange coṅ.”

¹³ Raj do uniye metadea, “Alom botorokʼa; cetʼem ńeleda?” Maejiue menkeda, “Iń do mitʼṭen debota ot khon rakapʼ hijukʼ kaniń ńelekana.”

¹⁴ Sạul do uniye kulikedea, “Uni do okoe lekae ńelokʼ kana?” Uni doe menkeda, “Mitʼṭen haṛam hoṛ rakapʼ hijukʼ kaniń ńelekana; uni do cadorteye oyoakana.” Onate Sạul doe bujhạukeda, uni doe Samuel kana. Ar otreye ombakʼente uniye ḍobokʼadea.

¹⁵ Samuel do Sạule kulikedea, “Cedakʼ rakapʼ ạgukateyem ạṛisedeń kana?” Sạule menkeda, “Ạḍi muhinreń paṛao akana. Philisṭiko do iń upạrteko lạṛhạikana ar Isor hõe bạgi giḍi akadińạ. Uni do nạbiko hotete hõ baṅ, ar kukmũte hõ bae roṛ ruạṛạń kana. Ona iạte ńitokʼ cetʼ cekae jạruṛtińạ ona baḍae lạgitʼge amiń rakapʼ ạgu ocoakatʼmea.”

¹⁶ Sạmuele menkeda, “Probhu Isorgeye bạgi giḍi akatʼme khan ar am upạrteye senakan khan enḍekhan am do cedakʼem kuliyediń kana?

¹⁷ Iń hotete uni okaṭakʼe roṛletʼ onageye kạmi akada. Uni do amakʼ ti khon rajosṭiye hatao akada ar am pheḍren hoṛ Dạude emakawadea.

¹⁸ Am do Probhu Isorakʼ katha bam ańjomakada ar Amelekiko upạrte uniyakʼ oka edre tahẽkan amakʼ kạmi hotete ona hõ bam sodor akada, ar onatege teheń uni do am upạrte noae nonka akada.

¹⁹ Probhu Isor do Philisṭikoakʼ tire am ar am sãoten Israelkoe soprotpea. Gapa am ar amren hoponko do iń tulucʼpe soṅgekʼa. Uni do Israelren lạṛhại phạdko hõ Philisṭikoakʼ tireye soprotkoa.”

²⁰ Samuelakʼ katha ańjomkate Sạul do ạḍitetʼ botor caṛhaoadea ar unrege otre tocʼ tocʼe bhindạṛena. Uni do goṭa din ar goṭa ńindạ cetʼge bae jomakatʼ tahẽkante uniyakʼ hoṛmore daṛege baṅ tahẽlena.

²¹ Uni maejiu do Sạul ṭhen senkateye ńelkedea, Sạul do ạḍi bạṛicʼ botor caṛhao akadea. Onate uniye metadea, “Ńelme, amren kạ̃ṛmĩ do amakʼ hukume batao akada. Ar okaṭakʼ cekae lạgitʼem metadiń ona do jiwi cuputʼ kategeń kạmi akada.

²² Ńitokʼ do dayakate amren kạ̃ṛmĩyakʼ mitʼṭecʼ katha ańjomme. Iń do am samaṅre thoṛa jomakʼ iń ạguiya. Ar onam jomle khan horte calakʼ reakʼ daṛem ńama.

²³ Menkhan Sạul do jom lạgitʼ bae rạmjạulenteye menkeda, “Baṅa, iń do bạń joma.” Menkhan uniren hoṛko hõ uni maejiu sãote jormoṭeko ehopʼena. Unre uni do onkoakʼ kathae ańjomkeda ar ot khon beretʼkate parkomreye duṛupʼena.

²⁴ Uni maejiuren do mitʼṭen lodgopʼ phẽṭãṛe tahẽkana. Uni do usạrateye gurkedea ar thoṛa holoṅ sipikate bin khạmiyanakʼ piṭhại benaokeda.

²⁵ Ar ona tayom do Sạul ar uniren hoṛko samaṅreye ạgukeda ar onko do onako jomkeda. Ar onko doko uṭhạuente ńindạge onḍe khonko ruạṛ calaoena.