1 Samuel 27 - সান্তালী বাইবেল

Philisṭiko talare Dạud

¹ Dạud do mone monteye hudiskeda, “Iń do Sạulakʼ tirege mitʼdin gujukʼ hoyokʼtińạ, onate Philisṭikoakʼ disạmtege dạṛ pharakokʼ bhage hoyokʼ tińạ. Enḍekhan Israel disạmre uni do ar bae sendra baṛayińạ, ar iń hõ uniyakʼ ti khon rukhiyạń ńama.”

² Niạ hudiskate Dạud do acʼ sãoten turui sae hoṛ soṅgekate ona ṭhạ̃iye bạgiyatʼte Maokren hopon Akis ṭhenko parom calaoena. Akis do Gatren raje tahẽkana.

³ Dạud ar uniren hoṛko do Gatre Akis ṭhen girobasokʼko ehopʼena. Uniren hoṛko sãote do onkoakʼ gharońjrenko, ar Dạud sãote do uniren banar bạhu, Jisrayel atoren Ahinoam ar Karmel atoren Abigael tạkin kin tahẽkana. Abigael do Nabalren rạnḍi bạhui tahẽkana.

⁴ Sạul do tinreye baḍaekeda, Dạud do Gatteye dạṛ akada unre ar bae sendra baṛaledea.

⁵ Mitʼdin Dạud do Akise metadea, “Am nońjorre dayań ńamakatʼ khan niạ disạm reakʼ jãhãn mitʼṭecʼ atore thoṛa jaega imạńme jemon onḍe senkateń girobas daṛeakʼ. Amren guti do cedakʼ am sãote raj nagrahareye tahena?”

⁶ Unre Akis do Dạud Siklag nagrahae danadea. Ar un khon teheń hạbicʼ Siklag do Jihudạ rajakʼ tabere tahẽyena.

⁷ Dạud do Philisṭikoakʼ disạmre mitʼ bochor pon candoe tahẽkana.

⁸ Ar inạko dinre uni do acʼren hoṛkoante Gesuriko, Girsiko ar Amalekiko cetanre jhãpe emetʼ tahẽkana. Noko jạtren hoṛ do ḍher laha khonge Tur khon Misor hạbicʼ goṭa ṭoṭhare berel akanko tahẽkana.

^9-10 Dạud do jãhã ṭoṭharege jhãpe emetʼ tahẽkan uni do onḍenko herel ar maejiu jotogeye gocʼetʼko tahẽkana, ar onkoren bhiḍiko, ḍaṅgrako, gadhako, ũṭko ar onkoakʼ kicricʼ khạnḍwạkʼkoe luṭ ạguiyetʼ tahẽkana. Ar tinre uni do Akis ṭhene ruạṛ hijukʼkan tahẽkana unre Akise kulikan tahẽkana, “Teheń do okare luluṭem senlena?” Unre Dạud doe roṛ ruạṛetʼ tahẽkana, Negeb reakʼ Jihudạ ṭoṭhare, Jiramelikoakʼ ṭoṭha se Kenikoakʼ ṭoṭhateń senlena.

¹¹ Dạud do jãhãe herel hoṛ se maejiu Gatte ạguko lạgitʼ jiwetʼ do bae dohoyetʼko tahẽkana, ente uni doe hudisetʼ tahẽkana, onko do akoakʼ reaṅ sanamakʼ kathako lạiya, Dạud do noakoe kạmi akada mente. Philisṭikoakʼ disạmte hecʼkate Dạud do nonkageye kạmiyetʼ tahẽkana,

¹² menkhan Akis do Dạude pạtiạuaekan tahẽkana are hudisetʼ tahẽkana Dạud do niạko kạmi iạte acʼ jạtren Israel hoṛko ṭhen hirkhạwạnicʼe hoyokʼa ar onate jaejug ińren golam akane tahena.