1 Samuel 26 - সান্তালী বাইবেল

Dạud do arhõ Sạule dayawae kan

¹ Siphren hoṛ do Gibeate Sạul ṭhen senkateko metadea, “Jesimon purub secʼre menakʼ Hakila burure Dạud doe oko akana.”

² Unre Sạul do pe hajar bachao hoṛkoante Siph hahaṅkarre Dạude sendra baṛakedea.

³ Ar Sạul do Jismon khon purub secʼ hor aṛe reakʼ Hakila burureye ḍerayena ar unre Dạud do hahaṅkarreye tahẽkana. Ar Dạud doe bujhạukeda Sạul do acʼ sendra hahaṅkarteye hecʼakana.

⁴ Onate uni do hoṛe kolketʼkoa ar sạrigeye baḍaekeda, Sạul do acʼ sendra lạgitʼe hecʼakana.

⁵ Ar Dạud do Sạul okareye ḍera akan tahẽkan onḍeye senen khan Sạul ar uniren subedar Ner hopon Abner do giticʼ akane ńelketʼkinạ. Unre Sạul do ḍera reakʼ maljalko talare ar uni beṛhaete do lạṛhại phạdko giticʼ akana.

⁶ Unre Dạud do Hitti hoṛ Ahimelek ar Seruya hopon Joabren boeha Abisae tạkine metatʼkinạ, “Sạulakʼ ḍerate iń tulucʼ do okoeye calakʼa?” Abisaeye menkeda, “Ińiń calakʼa.”

⁷ Ạyupʼ jokhecʼ Dạud ar Abisae do Sạulren lạṛhại phạdko talare kin boloyena. Unre Sạul do ḍera reakʼ maljal talareye jạpitʼ akatʼ tahẽkana. Ar uniyakʼ borlom do acʼakʼ bohokʼ secʼre otre bitʼ akatʼ tahẽkana. Uniren subedar Abner ar lạṛhại phạdko do uni beṛhaeteko giticʼ akan tahẽkana.

⁸ Noa ńelte Abisae do Dạude metadea, “Isor do teheń acʼren bạiri amakʼ tireye soprot akadea. Ma hukumạń me, ińakʼ borlomte uni do otren sobokʼ jaladea. Bar dhao do baṅ lagaoạńạ.”

⁹ Dạud do uniye metadea, “Baṅa, uni do alom gojea. Probhu Isorren ojokʼicʼ cetanre hat lagaokate jãhãe do cetʼ bin dusạne tahẽ daṛekokʼa.?

¹⁰ Jiwetʼ Isor ńutumteń meneda, Probhu Isorge uni do sạjạiye emaea. Uni do acʼtegeye gujukʼa, ar baṅ khan lạṛhạire senkateye marao utạrokʼa.

¹¹ Menkhan Probhu Isorren ojokʼicʼ hoṛ cetanre hat lagao do tishõ Probhu Isor do bae aṛakʼ akawạdińa. Dela, ńitokʼ do uniyakʼ bohokʼ ṭhen khon borlom ar dakʼ bhajan laṅ hataoa ar laṅ ruạṛ calakʼa.”

¹² Ona tayom Dạud do Sạulakʼ bohokʼ ṭhen khon uniyakʼ borlom ar dakʼ bhajan hataokateye calaoena. Onko do celehõ bako ńelletʼkinạ, ar baḍae hõ bako baḍaeleda, ar okoe hõ bako ebhenlena. Jotoge acetko jạpitʼ akatʼ tahẽkana, ente Probhu Isor do kajak jạpitʼe ematʼko tahẽkana.

¹³ Inạ tayom Dạud do ḍera khon thoṛa sạṅgiń reakʼ mitʼṭecʼ burure rakapʼkateye teṅgoyena.

¹⁴ Ar lạṛhại phạdko ar Nerren hopon Abner hohowadeteye metadea, “E Abner, jãhãnakʼ cetʼ bam roṛa?” Abnere roṛ ruạṛkeda, “Am dom okoe kante, rajem hohowae kana?”

¹⁵ Dạude menkeda, “Am do cetʼ mitʼṭen bir kanam? Israelko modre am leka do cetʼ jãhãe menakʼkoa? Cedakʼ enḍekhan bạiriko khon amren mạlik maharaj do bam pahra doholedea? Amren mạlik maharaj goje lạgitʼ mitʼṭen hoṛ do onḍeye calaoena.

¹⁶ Am do ṭhikakʼ bam kạmi akada. Jiwetʼ Probhu Isor ńutumteń metam kana, am ar amren hoṛko do gujukʼ lek kanape, ente aperen mạlik, okoe doe ojokʼ bahal ocoakan, uni do bạiriko khon bape horho akadea. Rajakʼ bohokʼ ṭhen oka borlom ar dakʼ bhajan tahẽkan onakin do okayena?”

¹⁷ Sạul do Dạudakʼ aṛaṅe oromketʼteye menkeda, “E jãwãe, noa do cetʼ abenakʼ aṛaṅkangea?” Dạude menkeda, “Hẽ, maharaj, noa do abenren gutiyakʼ aṛaṅkangea.”

¹⁸ Ona tayom uni do arhõe menkeda, “Cedakʼ ạlińren mạlik do acʼren gutiye khudạu baṛayede kana? Ạliń do cetʼ liń ceka akatʼte? Ar cetʼ liń behok akada?

¹⁹ E ạlińren maharaj, ạlińren mạlik, ńitokʼ do dayakate abenren gutiyakʼ katha ańjom ben. Probhu Isorge ạliń upạrteye teṅgo akatʼ ben khan tobe do ạlińakʼ samaṅokʼakʼ uni ṭhen ataṅokʼma. Ar manwako onka akatʼ khan tobe do Probhu Isorakʼ sarap onkore paṛaokʼma, ente teheń do Probhu Isore em akatʼ sompottire ạlińakʼ oka bhag menakʼ ona khon laga ńir liń reakʼko kurumuṭu kana. Onko doko meneda, ‘Do calakʼme, ar debotako pujạwakome.’

²⁰ Menkhan aben ṭhen ạlińakʼ nehõr do noage, Probhu Isor bạnui nonkan sạṅgiń jãhã ṭhạ̃ire ạlińakʼ mãyãm jemon alo jorokʼ. Burure cetʼleka hoṛ do citri cẽṛẽ sendarko calakʼ onkage Israelkoren raj hõ mitʼṭen tejo sendraye lạgitʼe oḍokʼ hecʼakana.”

²¹ Unre Sạule menkeda, “Aliń doliń kại akada. E jãwãe, aben do dela ruạṛ hijukʼ ben. Teheń ạlińakʼ jiwi do aben ṭhen ạḍi damakʼge tahẽkana; ạliń do abenakʼ loksan reakʼ ar bạliń kurumuṭuya. Sạrige noa maraṅ behok iạte lelha leka liń kạmi akada.”

²² Khan Dạude roṛ ruạṛkeda, “E maharaj, nõkʼõe ona borlom do, abenren jãhãe hoṛ hecʼkate onako idiyaben ma.

²³ Probhu Isor do mitʼke mitʼ hoṛ acʼakʼ pạtiạr ar dhorom reakʼ kuṛạiye emaea. Probhu Isor do teheń ạlińakʼ tireye soprotletʼ bena, menkhan ạliń do Probhu Isorren ojokʼicʼ cetanre ti rakab do bạliń khojkana.

²⁴ Teheń ạliń ṭhen abenakʼ jiwi tinạkʼ damanakʼ hoyen onkage Probhu Isor ṭhen ạlińakʼ jiwi hõ onka damanakʼ hoyokʼ tạlińa. Uni do joto lekan muhin khone bańcaoliń ma.”

²⁵ Unre Sạul do Dạude metadea, “E jãwãe, bhạgangea ben, aben do khạṭige maraṅ maraṅakʼ ben kạmiya arben jitạukʼa.” Inạ tayom Dạud do acʼakʼ horteye calaoena ar Sạul hõ oṛakʼteye ruạṛena.