1 Samuel 24 - সান্তালী বাইবেল

Dạud do Sạule dayawae kan

¹ Sạul do Philisṭiko khudạu khone ruạṛ hecʼen khan hoṛko do uniko khoboradea je, Dạud do Engedi reakʼ hahaṅkarre menaea.

² Unre Sạul do Israelko mod khon pe hajar hoṛe bachaoante Dạud ar uniren hoṛkoakʼ khoj hatao lạgitʼ bir merom buruko metakʼ jaega ṭhene senena.

³ Ar horte calakʼ calakʼte mitʼṭecʼ ṭhạ̃ireye hecʼena onḍe do bhiḍi meromkoakʼ chaṛ tahẽkana. Ar ona sorre mitʼṭecʼ dander tahẽkana. Sạul do khalasokʼ lạgitʼ ona danderreye boloyena. Menkhan ona danderrege Dạud ar uniren hoṛko do bhitri secʼreko duṛupʼ oko akan tahẽkana.

⁴ Unre Dạudren hoṛko menkeda, “Probhu Isor oka din reakʼ kathae metatʼme tahẽkan ona din do teheń seṭer akana. Uni doe menleda, ‘amren bạiri do amakʼ tireń soprotea ar unire am oka bhagem hudis onam onkawaea.’ ” Unre Dạud doe beretʼente hape hapete Sạulakʼ aṅgrop reakʼ ańcare getʼ kuṭrạketʼtaea.

⁵ Sạulakʼ aṅgrop khon ańcare getʼ kuṭrạketʼtae khan Dạud do mon sobokʼentaea.

⁶ Uni do acʼren hoṛkoe metatʼkoa, “Ińren kisạ̃ṛ upạrte, Probhu Isorren ojokʼ bahalicʼ upạrte tiyiń rakab tiń Probhu Isor do ona tishõ bae aṛakʼ akawạdińa, ente uni do Probhu Isorren ojokʼicʼ kanae.”

⁷ Niạ katha menkate Dạud do acʼren hoṛkoe thamaoketʼkoa ar Sạul cetanre jhãp bae emocoatʼkoa. Ar Sạul do dander khone oḍokente acʼakʼ horteye calao idiyena.

⁸ Ona tayom Dạud hõ dander khone oḍokente ãṭ aṛaṅte Sạul hohoateye metadea, “E ińren mạlik, maharaj!” Ar Sạul do tayom secʼe beṅgetʼ ạcurketʼ khan Dạud do otre ombakʼkate Sạule ḍobokʼadea.

⁹ Ar ona tayom do Sạule metadea, “Cedakʼ hoṛkoakʼ kathate ben pạtiạukʼ kana ạliń do abenakʼ loksan taben lạgitʼ liń kurumuṭu kana mente.

¹⁰ Teheń abenakʼ mẽtʼtege coṅ ben ńelketʼ, Probhu Isor do cetʼleka niạ danderre ạlińakʼ tireye soprotletʼ bena. Ar adomko do aben gocʼben lạgitʼko metatʼ liń tahẽkana, menkhan aben cetanre mãyã hecʼatʼ lińạ. Onate liń metatʼkoa ińren mạlik cetanre ti do ohoń rakapʼ daṛelea, ente uni do Probhu Isorren ojokʼicʼ kanae.

¹¹ E ạlińren ạpuń, nõkʼõe ńelben, ạlińakʼ tire abenakʼ aṅgrop reakʼ ańcar kuṭrạ. Ạlińge abenakʼ aṅgrop khon ańcar liń getʼ kuṭrạ akatʼa menkhan aben do bạliń gocʼletʼ bena. Enḍekhan aben do ńitokʼ ben bujhạu daṛeakʼ kana je, aben cetanre ạlińakʼ jãhãn behokakʼ se hulteakʼ do bạnukʼa. Ar aben upạrte kại hõ bạliń kại akada, menkhan enhõ aben do ạliń gocʼliń lạgitʼ ben sendra baṛayetʼlińạ.

¹² Probhu Isorge aben ar ạliń reakʼ baṛeye bicạrma ar ạliń upạrte okaben behok akatʼ ona reakʼ kuṛạiye emaben ma; enhõ aben upạrte ti do bạliń rakab tạlińa.

¹³ Sedaeren hoṛkoakʼ kạhtuk menakʼa, ‘bedhorom khonge bedhorom do oḍok hijukʼa,’ ona iạte ạliń do aben upạrte ti bạliń rakab tạlińa.

¹⁴ “Israelren raj do cele pańjaye lạgitʼe oḍok hecʼakana? Ar okoeye khudạu baṛayede kana? Cedakʼ aben do mitʼṭen gocʼ seta do ben khudạu baṛayedea, cedakʼ aben do mitʼṭen mermeṭecʼ ben khudạuede kana?

¹⁵ Probhu Isorge aben ar ạliń talare bikʼcạricʼe hoyokʼma are bicạr chinḍạu katalaṅ ma. Unige ạlińakʼ mamblae ńeljut ma ar abenakʼ ti khone rukhiyạ liń ma.”

¹⁶ Dạud do kathae mucạtʼketʼ khan Sạule menkeda, “E jãwãe, noa do cetʼ katha ben meneda?” Ar noa menkate Sạul do ãṭ aṛaṅte rarakʼe ehopʼena.

¹⁷ Uni do Dạude metadea, “Aben do ạliń khon hõ ḍher ben dhoromgea, ente ạliń do aben tulucʼ ḍher bạṛicʼ liń beohar akatʼre hõ aben do bhage ben beohar akada.

¹⁸ Ạliń lạgitʼ bhageakʼ ben kạmikan ona do teheń ben baḍae ocoketʼ lińạ. Probhu Isor do abenakʼ tireye soprotletʼ lińre hõ baben gocʼletʼ lińạ.

¹⁹ Jãhãe hoṛ acʼren bạiri cetanre ạt ńamkate uniyakʼ begor loksante cetʼ uniye aṛagea? Teheń ạliń cetanre oka ben kạmiketʼ ona iạte Probhu Isorgeye bhạlại ben ma.

²⁰ Ńitokʼ do liń baḍae daṛeakʼ kana, aben do khạṭige raj ben hoyokʼa ar aben hotetege Israelakʼ rajosṭi do teṅgo ṭarhaokʼa.

²¹ Onate ńitokʼ Probhu Isor ńutumte kiriạ ạliń ben, jemon ạlińren tayom bõsko baben marao utạrko ar ạlińakʼ ńutum hõ ạlińren ạpuńakʼ bõs khon alo ben mohor meṭao giḍikakʼa.

²² Ar Dạud do Sạul ṭhen onageye kiriạyena. Ona tayom Sạul do oṛakʼteye ruạṛ calaoena, ar Dạud do acʼren hoṛkoante gaṛko metakʼkan ona buruteye rakapʼ calaoena.